PSM 100 / એક મહિના સુધી ધામધૂમથી ઉજવણી બાદ આજે શતાબ્દી મહોત્સવની પૂર્ણાહુતિ, 60 લાખ હરિભક્તોએ નમાવ્યું શીશ

• આજે પ્રમુખ સ્વામી શતાબ્દી મહોત્સવની પૂર્ણાહુતિ
• 1 મહિના સુધી ધામધુમથી શતાબ્દી મહોત્સવની ઉજવણી 
• 60 લાખથી પણ વધુ શ્રદ્ધાળુએ પ્રમુખસ્વામી નગરની લીધી મુલાકાત 
• આજે પુર્ણાહુતી કાર્યક્રમમાં મહંત સ્વામીની રહેશે હાજરી

ભવ્યાતિભવ્ય PSM પ્રમુખસ્વામી શતાબ્દી મહોત્સવની આજે પૂર્ણાહુતિ થઈ છે. નોંધનીય છે કે, 1 મહિના સુધી શતાબ્દી મહોત્સવની ધામધુમથી ઉજવણી કરાઈ હતી. આ પ્રમુખસ્વામી શતાબ્દી મહોત્સવમાં 60 લાખથી પણ વધુ શ્રદ્ધાળુઓએ પ્રમુખસ્વામી નગરની મુલાકાત લીધી હતી. આજે મહંત સ્વામીની હાજરીમાં પુર્ણાહુતિ કાર્યક્રમ યોજાશે. 

પ્રમુખસ્વામી શતાબ્દી મહોત્સવ
અમદાવાદના ઓગણજ પાસે આયોજીત પ્રમુખસ્વામી શતાબ્દી મહોત્સવની આજે પૂર્ણાહૂતિ થઇ છે. છેલ્લા એક મહિનાથી આયોજિત ભવ્ય મહોત્સવ શાંતિપૂર્ણ માહોલમાં પૂર્ણ થયો છે. એક મહિના સુધી ચાલેલા પ્રમુખ સ્વામી શતાબ્દી મહોત્સવમાં 60 લાખથી પણ વધુ લોકોએ મુલાકાત કરી ધન્યતા અનુભવી હતી. 

PM મોદીએ કરાવ્યો હતો પ્રમુખસ્વામી શતાબ્દી મહોત્સવનો પ્રારંભ 
પ્રમુખ સ્વામી શતાબ્દી મહોત્સવનો પ્રારંભ વડાપ્રધાન નરેન્દ્ર મોદીના હસ્તે 14 ડિસેમ્બરે કરવામાં આવ્યો હતો. આ પ્રસંગે મુખ્યમંત્રી ભૂપેન્દ્ર પટેલ, રાજ્યપાલ આચાર્ય દેવવ્રત અને સ્વામિનારાયણના સંતો સહિત મોટી સંખ્યામાં લોકો ઉપસ્થિત રહ્યા હતા. આ મહોત્સવનું ઉદ્ધાટન વડાપ્રધાન નરેન્દ્ર મોદી અને મહંતસ્વામી મહારાજના હસ્તે કરવામાં આવ્યું હતું. આ મહોત્સવની શરૂઆત શાસ્ત્રોક્ત વિધિ સાથે કરવામાં આવી હતી.

80 હજારથી વધુ સ્વયંસેવકોએ આપી સેવા 
પ્રમુખ સ્વામી શતાબ્દી મહોત્સવમાં 80 હજારથી વધુ સ્વયંસેવકોએ સેવા આપી હતી. મહત્વનું છે કે, આ સ્વયંસેવકો પોતાના નોકરી-ધંધા, રોજગાર છોડી ખડેપગે રહી ભક્તોની સેવામાં રહ્યા હતા. આ સાથે દેશ વિદેશના સ્વયંસેવકોએ પણ સેવા આપી હતી. તો બીજી તરફ આ પ્રમુખ સ્વામી શતાબ્દી મહોત્સવમાં અનેક લોકોએ દીક્ષા પણ લીધી હતી. 

600 એકર જમીન પર બનાવાયું હતું પ્રમુખસ્વામી નગર 
અમદાવાદના ઓગણજ પાસે 600 એકર જમીન પર આ પ્રમુખસ્વામી નગર બનાવાયું હતું. જેમાં તા. 380 ફૂટ લાંબો અને 52 ફૂટ ઉંચા નગરના 7 કલાત્મક સંસ્કૃતિક પ્રવેશદ્વાર બનાવવામાં આવ્યાં હતા. આ સાથે આદિ મહાન સંતો-વિભૂતિઓની પૂર્ણ કદની 28 પ્રતિમાઓ મુકવામાં આવી હતી. પ્રમુખસ્વામી નગરમાં 17 એકરમાં ભવ્ય બાળ નગરી, 30 એકરમાં ગ્લો ગાર્ડન બનાવાયું હતું.  આ સાથે 25 હજાર વ્યક્તિઓની ક્ષમતા ધરાવતો ભવ્યાતિભવ્ય લાઈટ એન્ડ સાઉન્ડ શોનું પણ આયોજન કરવામાં આવ્યું હતું.