લાલબત્તી / બાળકોના હાથમાં મોબાઈલ આપતાં ડરી જજો તેવી ઘટના બની, છોકરો પહોંચ્યો મરણતોલ હાલતમાં હોસ્પિટલે

• યુપીના મથુરાની ચોંકાવનારી ઘટના
• છોકરાના હાથમાં ફાટયો મોબાઈલ
• ઘરમાં ગેમ રમી રહ્યો હતો
• હાથ અને ચહેરો ગંભીર રીતે બળી ગયા
• હોસ્પિટલમાં મોત સામે લડી રહ્યો છે 

મોબાઈલ ફોનમાં બ્લાસ્ટની વધુ એક ઘટના બની છે. યુપીના મથુરામાં 13 વર્ષીય બાળક જ્યારે ગેમ રમી રહ્યો હતો ત્યારે તેના હાથમાં મોબાઈલ ફાટ્યો હતો અને તેનો હાથ અને ચહેરો ગંભીર રીતે દાઝી ગયા હતા. આ ઘટના બાદ લોકોને હવે તેના બાળકોને મોબાઈલ આપવામાં પણ જોખમ લાગી રહ્યું છે.  મથુરામાં મોબાઈલમાં ગેમ રમી રહેલા એક બાળકનો મોબાઈલમાં અચાનક બ્લાસ્ટ થતાં તે ગંભીર રીતે દાઝી ગયો હતો. આ ઘટના મથુરાના કોતવાલી વિસ્તારના મેવાતી મહોલ્લાની છે, જ્યાં એક ઘરમાંથી વિસ્ફોટનો અવાજ સંભળાયો હતો. લોકો અવાજ સાંભળીને ઘટના સ્થળે પહોંચ્યા ત્યારે તેમણે જોયું કે ત્યાં મોબાઈલમાં બ્લાસ્ટ થયો હતો અને તે મોબાઈલ પર ગેમ રમતા બાળકને ઈજા થઈ હતી. પરિવાર અને વિસ્તારના લોકો તાત્કાલિક બાળકને લઈને હોસ્પિટલ દોડી આવ્યા હતા.

ગેમ રમતી વખતે મોબાઈલમાં બ્લાસ્ટ 
મેવાતી મહોલ્લાના રહેવાસી મોહમ્મદ જાવેદે જણાવ્યું કે, તેનો 13 વર્ષનો પુત્ર મોહમ્મદ જુનૈદ મોબાઈલમાં આ ગેમ રમી રહ્યો હતો. ઘરની અંદર ગેમ રમતી વખતે અચાનક મોબાઈલમાં બ્લાસ્ટ થયો હતો. મોબાઇલના ધડાકાને કારણે જુનૈદ ગંભીર રીતે દાઝી ગયો હતો. જુનૈદને ગંભીર હાલતમાં જિલ્લા હોસ્પિટલમાં દાખલ કરવામાં આવ્યો હતો. 

એમઆઈનો હતો મોબાઈલ 
જુનૈદના પિતા મોહમ્મદ જાવેદે જણાવ્યું હતું કે, થોડા સમય પહેલા જ તેમણે શાઓમી કંપનીનો એમઆઈનો મોબાઈલ ફોન લીધો હતો તે વખતે તો કંઈ તકલીફ નહોતી પરંતુ અચાનક તેવી રીતે બ્લાસ્ટ થઈ ગયો તે સમજમાં નથી આવતું.