કરુણાંતિકા / મોરબીમાં 30 વર્ષીય યુવકનું હાર્ટ એટેકથી મોતઃ ચાલુ કારે એકાએક ઉપડ્યો છાતીમાં દુખાવો, પરિવારમાં રોકકળાટ

• મોરબી જિલ્લાના વાંકાનેર નજીકની ઘટના 
• ચાલુ કારે હાર્ટ એટેકથી યુવાનનું મોત
• 30 વર્ષીય યુવાનને આવ્યો હતો હાર્ટ એટેક

છેલ્લા ઘણા દિવસથી નાની ઉંમરના વ્યક્તિઓમાં હાર્ટ એટેકના બનાવો વધ્યા છે. લગ્નમાં નાચતી વખતે, ક્રિકેટ રમતી વખતે, વાહન ચલાવતી વખતે કે પછી જીમમાં કસરત કરતી વખતે હાર્ટ એટેક આવવાની સાથે જ સ્થળ પર જ મૃત્યુના કિસ્સાઓ દિવસેને દિવસે સામે આવી રહ્યા છે. ત્યારે હાર્ટ એટેક બાદ મોતનો વધુ એક બનાવ સામે આવ્યો છે. 

30 વર્ષીય યુવકનું મોત 
મોરબી જિલ્લામાં ચાલુ કારે હાર્ટ એટેક આવતા યુવકનું દુઃખદ અવસાન થયું છે. મળતી માહિતી અનુસાર, મોરબી જિલ્લાના વાંકાનેર નજીક વઘાસીયા ટોલનાકા પાસે ચાલુ કારે 30 વર્ષીય યુવકને હાર્ટ એટેક આવ્યો હતો. મોરબીથી પરત જતી વખતે ચાલુ ગાડીમાં 30 વર્ષીય નરપત ઉભડિયા નામના યુવાનને હાર્ટ એટેક આવ્યા બાદ તેનું મોત નીપજ્યું છે. હાલ યુવકના મૃતદેહને હોસ્પિટલ ખાતે ખસેડવામાં આવ્યો છે.  

સુરતના યુવકનું હાર્ટ એટેકથી મોત
આપને જણાવી દઈએ કે, આ પહેલા બે દિવસ અગાઉ સુરતમાં એક યુવકનું હાર્ટએટકથી મોત નીપજ્યું હતું. સુરતમાં 27 વર્ષીય શનિ કાલે નામના યુવકનું હાર્ટ એટેકથી મોત થયું હતું. યુવક ગઈકાલે મિત્રો સાથે હોટલમાં જમવા ગયો હતો. જમીને ઘરે પરત ફરતી વખતે યુવકને ચાલુ બાઈકે છાતીમાં દુખાવો ઉપડ્યો હતો. જેથી મિત્રોએ યુવકને સારવાર અર્થે હોસ્પિટલમાં ખસેડ્યો હતો. જ્યાં ટૂંકી સારવાર બાદ યુવકનું મોત નીપજ્યું છે. 27 વર્ષીય યુવકનું હાર્ટ એટેકથી મોત થતાં પરિવારમાં ગમગીની છવાઈ હતી.  

રાધનપુર એસ.ટી ડેપોમાં ડ્રાઈવરનું થયું હતું મોત 
તો આજ દિવસે રાધનપુર એસ.ટી ડ્રાઈવરનું હાર્ટ એટેકથી મોત થયું હતું. રાધનપુર એસ.ટી ડેપોમાં ડ્રાઈવર તરીકે ફરજ બજાવતા ભારમલભાઈ આહીર આજે સોમનાથથી રાધનપુર જવા બસ લઈને નીકળ્યા હતા. રાધનપુરથી માત્ર 1 કિલોમીટર દૂર પહોંચ્યા બાદ તેમને છાતીમાં દુઃખાવો ઉપડ્યો હતો. જેથી તેઓ બસને પરત રાધનપુર ડેપોમાં લાવ્યા હતા. જે બાદ તેમને સહકર્મચારીઓ સારવાર માટે હોસ્પિટલ ખાતે લઈ ગયા હતા.