આરોપ પર જવાબ / 1 કિમી રોડ માટે 251 કરોડ ખર્ચાંયા? કેગ રિપોર્ટ ઉડાવી મૂકતા નીતિન ગડકરીએ કર્યો મોટો ખુલાસો

• દ્વારકા એક્સપ્રેસ વે બનાવવામાં કૌભાંડનો કેગનો ઉલ્લેખ
• 1 કિમી રોડ માટે 18 કરોડનું ફંડ હતું
• તેને બદલે 251 કરોડ રુપિયા ખર્ચવામાં આવ્યાં
• કેન્દ્રીય મંત્રી નીતિન ગડકરીએ કેગના રિપોર્ટને ફગાવ્યો 

દ્વારકા એક્સપ્રેસ વે પર કેગના રિપોર્ટને લઈને કેન્દ્ર સરકાર પર સવાલો ઉઠી રહ્યા છે. કેગના રિપોર્ટમાં કહેવાયું હતું કે 1 કિમીના રોડ માટે 18 કરોડનું બજેટ હતું તેમ છતાં એક કિમીનો રોડ બનાવવા માટે 251 કરોડનો ખર્ચ કરવામાં આવ્યો. કેન્દ્રીય મંત્રી નીતિન ગડકરીએ આ અંગે પહેલીવાર જવાબ આપ્યો છે. કેગના રિપોર્ટ પર બોલતા ગડકરીએ કહ્યું કે દ્વારકા એક્સપ્રેસ વે પર કૌભાંડની વાત ખોટી છે. ઉલ્ટાનું દ્વારકા એક્સપ્રેસ વે પર 12 ટકા રૂપિયાની બચત થઈ છે. 

કેગના રિપોર્ટ પર શું બોલ્યાં નીતિન ગડકરી 
કેગના રિપોર્ટ પર ઉઠાવવામાં આવેલા સવાલ પર નીતિન ગડકરીએ કહ્યું કે, આ રિપોર્ટનું આકલન યોગ્ય નથી. તેમણે કહ્યું કે દ્વારકા એક્સપ્રેસવે 29 કિમી લાંબો છે. અમે મોકલેલી કેબિનેટ નોટમાં લખ્યું હતું કે અમે 5 હજાર કિલોમીટરનો ટૂ લેન રોડ બનાવીશું અને તેનો ખર્ચ 91 હજાર કરોડ રૂપિયા થશે. તેમાંથી અંદાજિત ડીપીઆર બન્યા બાદ ફ્લાયઓવર અને રિંગરોડની કિંમત નક્કી કરવાની હતી. સમસ્યા એ છે કે જેને તેઓ 29 કિ.મી. કહી રહ્યા છે તે 230 કિ.મી. તેમાં કુલ 29 ટનલ છે અને તે 230 કિમીનો કુલ લેન રોડ છે. આ ટેન્ડર પ્રતિ કિ.મી. 206 કરોડનું હતું. ગડકરીએ કહ્યું કે અમે આ પ્રોજેક્ટ પાછળ 12 ટકા ઓછો ખર્ચ કર્યો છે.

મોદી સરકારમાં મેં 50 લાખ કરોડના કામ કર્યાં 
ગડકરીએ કહ્યું કે, અમારા અધિકારીઓએ આ મામલાને કેગની સામે રાખ્યો હતો. ચર્ચામાં અધિકારીઓ અમારી સાથે સહમત થયા હતા. પરંતુ અમારી ભૂલ એ હતી કે અમે તેમને લેખિતમાં આપી ન હતી. "જ્યાં સુધી આ કૌભાંડની વાત છે, હું મીડિયાથી લઈને વિપક્ષને કહું છું કે, અમે સમયબદ્ધ, પરિણામલક્ષી અને ભ્રષ્ટાચાર મુક્ત છીએ. એટલું જ નહીં ગડકરીએ કહ્યું કે આ સરકારમાં મેં 50 લાખ કરોડ રૂપિયાનું કામ કર્યું છે. જો કોઇ કોન્ટ્રાક્ટર કે અન્ય કોઇ એમ કહે કે કોઇ કામમાં એક પણ પૈસો આપ્યો છે તો તેઓ જે કહે સજા ભોગવવા તૈયાર છે.

10 ઓગસ્ટે સંસદમાં રજૂ કરાયો હતો કેગનો રિપોર્ટ 
10 ઓગસ્ટે સંસદમાં રજૂ કરવામાં આવેલા કેગના રિપોર્ટમાં કહેવામાં આવ્યું છે કે દ્વારકા એક્સપ્રેસ વેના નિર્માણમાં નિર્ધારિત રકમથી વધુ રકમ ખર્ચ કરવામાં આવી છે. આ અંગે વિપક્ષે સરકાર પર સવાલો ઉઠાવ્યા છે. દિલ્હી વિધાનસભામાં ચાલી રહેલા સત્ર દરમિયાન શુક્રવારે આમ આદમી પાર્ટી (આપ)ના ધારાસભ્યોએ વડાપ્રધાન નરેન્દ્ર મોદી પર જોરદાર નિશાન સાધ્યું હતું. આપના ધારાસભ્યોએ દ્વારકા એક્સપ્રેસ-વેના નિર્માણ સહિત કેન્દ્ર સરકારની વિવિધ યોજનાઓ અંગેના કેગના અહેવાલને ટાંકીને કેન્દ્ર પર હુમલો કર્યો હતો.