ઈમિગ્રેશન કૌભાંડ / એજન્ટ થ્રુ વિદેશ જતા વિદ્યાર્થીઓ ચેતી જજો: 3500થી વધુ ગુજરાતીઓની ઓસ્ટ્રેલિયામાં તપાસ, 24 એજન્ટો રડારમાં

• એજન્ટ થ્રુ વિદેશ જતા વિદ્યાર્થીઓ ચેતી જજો
• ઓસ્ટ્રેલિયામાં સામે આવ્યું ઈમિગ્રેશન કૌભાંડ
• ઓસ્ટ્રેલિયામાં 3500 ગુજરાતીઓની ચાલી રહી છે તપાસ

હજુ તો તાજેતરમાં જ IELTSમાં 8 બેન્ડ મેળવીને મહેસાણાના 4 યુવકોને USA મોકલવાનું કૌભાંડ આચર્યાની ઘટનાને ઝાઝો સમય નથી થયો. ત્યાં તો વધુ એક કૌભાંડ સામે આવ્યું છે. ઓસ્ટ્રેલિયામાં IHRA (ઈન્ટરનેશનલ હ્યુમન રાઈટ્સ એસોશિએશન) ની તપાસમાં મસમોટું ઈમિગ્રેશન કૌભાંડ સામે આવ્યું છે. જેમાં ચોંકાવનારી વિગતો બહાર આવી છે. આથી, એજન્ટ થ્રુ વિદેશ જતા વિદ્યાર્થીઓ સાવધાન.

ઓસ્ટ્રેલિયામાં ચાલી રહી છે 3,500 ગુજરાતીઓની તપાસ

ઈમિગ્રેશન કૌભાંડમાં ખોટા બેન્ડ મળ્યાના સર્ટિફિકેટથી અનેક વિદ્યાર્થીઓને ઓસ્ટ્રેલિયા મોકલવામાં આવ્યા હોવાનું કૌભાંડ સામે આવ્યું છે. વિદ્યાર્થીઓને બોગસ બેન્ડ સર્ટિ, બોગસ ડિગ્રી અને બોગસ એજ્યુકેશન બેન્ક લોન સર્ટિથી વિદેશ મોકલવામાં આવ્યા હોવાનું સામે આવ્યું છે. હાલમાં ઓસ્ટ્રેલિયામાં 3 હજાર 500 જેટલાં ગુજરાતીઓની તપાસ ચાલી રહી છે.

40થી 50 લાખ લઈને ગેરદાયદે વિદેશ મોકલનારા એજન્ટો રડારમાં

ખૂબ મોટી રકમ લઈને એજન્ટો વિદ્યાર્થીઓને ઓસ્ટ્રેલિયા મોકલતા હોવાનું મસમોટું કૌભાંડ સામે આવ્યું છે. આથી, રૂપિયા 40થી 50 લાખ લઈને ગેરદાયદે વિદેશ મોકલનારા એજન્ટો રડારમાં આવ્યા છે. ગેરકાયદે મોકલનારા એજન્ટો વિદ્યાર્થીઓને ખોટા ડોક્યુમેન્ટ સુધી બનાવી આપે છે. આ બોગસ ડોક્યુમેન્ટ્સના આધારે વિઝા મેળવવામાં આવે છે. નોંધનીય છે કે, IHRAના સભ્યો ઓસ્ટ્રેલિયામાં છેલ્લા બે વર્ષથી તપાસ કરતા હતા.

ગુજરાતના ત્રણ શહેરના 24 જેટલાં એજન્ટો હાલ રડારમાં

વિદ્યાર્થીઓએ IELTS, TOFEL, CAE અને PTE જેવી પરીક્ષાની બોગસ બેન્ડ શીટ મેળવી હતી. 4 બેન્ડ પણ ન મળે તેવા વિદ્યાર્થીઓ 8 બેન્ડ સાથે ઓસ્ટ્રેલિયા પહોંચ્યા હતા. આ મામલે ગુજરાતના ત્રણ શહેરના 24 જેટલાં એજન્ટો હાલ રડારમાં છે.

ગુજરાતમાંથી ચાલી રહ્યું છે કરોડોનું મહાકૌભાંડ: IHRAના ચેરમેન

આ મામલે ઈન્ટરનેશનલ હ્યુમન રાઈટ્સ (IHRA) ના ચેરમેને નિવેદન આપતા જણાવ્યું કે, 'અમારી પાસે ગેરકાયદે ઘૂસી ગયેલા લોકોની યાદી પણ છે. આ મામલે ગુજરાતમાંથી કરોડો રૂપિયાનું મહાકૌભાંડ ચાલી રહ્યું છે. અમારી પાસે એજન્ટ વિરુદ્ધના પુરાવાઓ પણ છે. આગામી સમયમાં તમામ એજન્ટોને જેલમાં ધકેલવામાં આવશે.'

જુઓ 2 વર્ષની ગુપ્ત તપાસમાં શું બહાર આવ્યું?

• ઈન્ટરનેશનલ હ્યુમન રાઈટ્સ એસોસિએશન બે વર્ષથી કરી રહ્યું હતું તપાસ
• ગેરકાયદે વિદેશમાં ઘૂસનારા વિદ્યાર્થીઓમાંથી મોટાભાગના વિદ્યાર્થી બોગસ
• વિદ્યાર્થી હોવાનું જણાવી ઓસ્ટ્રેલિયામાં લીધો પ્રવેશ
• બોગસ વિદ્યાર્થીઓએ IELTS, TOFEL, CAE, PTE જેવી પરીક્ષાની બોગસ બેન્ડ શીટ મેળવી
• 4 બેન્ડ ન મેળવી શકનારા 8 બેન્ડ સાથે ઓસ્ટ્રેલિયા પહોંચ્યા
• 3 હજાર 500થી વધુ બોગસ ગુજરાતી ઓસ્ટ્રેલિયા પહોંચ્યા
• ટૂંક સમયમાં તમામ બોગસ વિદ્યાર્થીને ભારત મોકલવામાં આવશે