- વર્લ્ડ કપ 2023માં ઓસ્ટ્રેલીયાએ જીતીને ખાતું ખોલ્યું
- ઓસ્ટ્રેલિયાના ડેવિડ વોર્નર 11 રનના સ્કોર પર આઉટ થયો હતો
- DRSમાં ઓનફિલ્ડ કોલમાં પણ આઉટ જાહેર કરવામાં આવ્યો
ઓસ્ટ્રેલિયાએ વર્લ્ડ કપ 2023માં જીતનું ખાતું ખોલ્યું છે. ટીમે શ્રીલંકા સામે 5 વિકેટે જીત મેળવી હતી. પ્રથમ બેટિંગ કરતા શ્રીલંકાની ટીમ માત્ર 209 રનમાં ઓલઆઉટ થઈ ગઈ હતી. આ પછી ઓસ્ટ્રેલિયાના બેટ્સમેનોએ 35.2 ઓવરમાં 5 વિકેટ ગુમાવીને 215 રન બનાવીને જીત નોંધાવી હતી. આ મેચમાં ડેવિડ વોર્નરનો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયો તેના આઉટ થયા પછીનો છે.
ઓસ્ટ્રેલિયાના ઓપનર ડેવિડ વોર્નરે વર્લ્ડ કપ 2023માં શ્રીલંકા સામેની મેચમાં ઝડપી શરૂઆત કરી હતી. ઇનિંગ્સની પહેલી જ ઓવરમાં સિક્સર ફટકારી હતી પરંતુ તે ચોથી ઓવરમાં 11 રનના સ્કોર પર આઉટ થયો હતો. દિલશાન મદુશંકાના બોલ પર અમ્પાયર જોએલ વિલ્સને વોર્નરને LBW જાહેર કર્યો હતો. જો કે એ બાદ DRSમાં ઓનફિલ્ડ કોલને કારણે રિવ્યુ થયો હતો પરંતુ એમાં પણ તેને આઉટ જાહેર કરવામાં આવ્યો હતો.
વોર્નર અમ્પાયર પર ગુસ્સે થયો
સ્ક્રીન પર ઓનફિલ્ડ કોલમાં તેને આઉટ જાહેર કરતાંની સાથે જ ડેવિડ વોર્નર અમ્પાયર પર ગુસ્સે થઈ ગયો હતો. પહેલા તેણે ગુસ્સામાં પોતાનું બેટ તેના પેડ પર માર્યું. આ પછી, તેણે અમ્પાયર તરફ બૂમો પાડવાનું શરૂ કર્યું. શ્રીલંકાના દિલશાન મદુશંકાએ બોલ ફેંક્યો અને વોર્નરના બેટથી બચી ગઈ એ બોલ પેડ સાથે અથડાયો હતો. એવું લાગતું હતું કે બોલ લેગ સ્ટમ્પની બહાર ગયો હશે, પરંતુ અમ્પાયર જોએલ વિલ્સને અપીલ પર આંગળી ઉંચી કરી.
વોર્નર સામે પગલાં લેવાશે?
આ મામલે ડેવિડ વોર્નર વિરુદ્ધ કાર્યવાહી કરવામાં આવે તેવી પૂરી શક્યતા છે. ઓસ્ટ્રેલિયાના ઓપનિંગ બેટ્સમેન પર પ્રતિબંધની શક્યતા ઘણી ઓછી છે પરંતુ તેની મેચ ફી ચોક્કસપણે કાપી શકાય છે. ICC આચાર સંહિતા હેઠળ અમ્પાયરના નિર્ણય બાદ આવી રીતે વર્તન કરે તો ખેલાડીઓને દંડ થઈ શકે છે.
મેચમાં શું થયું
લેગ સ્પિનર એડમ ઝમ્પા (47 રનમાં ચાર વિકેટ) અને કેપ્ટન પેટ કમિન્સ (32 રનમાં બે વિકેટ)ના નેતૃત્વમાં બોલરોના શાનદાર પ્રદર્શનને કારણે ઓસ્ટ્રેલિયાએ શ્રીલંકાની ઇનિંગ્સને 43.3 ઓવરમાં માત્ર 209 રનમાં સમેટી લીધી હતી. શ્રીલંકાએ ઓપનર કુસલ પરેરા (78) અને પથુમ નિસાન્કા (61)ની અડધી સદી અને 130 બોલમાં 125 રનની ભાગીદારીના આધારે મજબૂત શરૂઆત કરી હતી, પરંતુ આ ભાગીદારી તૂટ્યા બાદ તેમની ઈનિંગ્સ એક સાથે પડી ગઈ હતી. ઓસ્ટ્રેલિયાએ ખરાબ શરૂઆતમાંથી બહાર નીકળીને 36મી ઓવરમાં મેચ જીતી લીધી હતી.જોશ ઈંગ્લિસે અણનમ 58 અને મિચેલ માર્શે 52 રન બનાવ્યા હતા.
