- રાજસ્થાનના જયપુરથી અજીબો-ગરીબ કિસ્સો સામે આવ્યો
- હનીમૂનમાં ગયેલા પતિને છોડી પત્ની ફરાર
- પત્નીને શોધવા પતિને આવ્યા મોઢે ફીણ
રાજસ્થાનના જયપુરથી અજીબો-ગરીબ કિસ્સો સામે આવ્યો છે. જેમાં પતિ-પત્ની હનીમૂન મનાવવા ગયા હતા. આ દરમિયાન થિએટરમાં ફિલ્મની મોજ માણી રહ્યા હતા. જ્યારે ઇન્ટરવલ વેળાએ પતિ નાસ્તો લેવા માટે ગયો અને જે પરત આવતા તેમની પત્ની લાપતા બની હોવાનું સામે આવ્યું હતું. આથી પતિએ હાફડોફાફડો થઈ અનેક સ્થળોએ પત્નીની તલાશી હાથ ધરી હતી. જોકે પત્નીની ભાળ ન મળતા અંતે પોલીસ ગુમ નોંધ જાહેર કરાઈ હતી. બાદમાં પરિણીતાએ સામેથી પોલીસ મથકે હાજર થઈ આ લગ્નથી ખુશ ન હોવાનું નિવેદન આપ્યું હતું.
પત્ની સામેથી પોલીસ મથકે દોડી આવી
શિકર ખાતે રહેતા યુવાનના તાજેતરમાં જ લગ્ન થયા હતા. લગ્નના સાત દિવસ બાદ તે પોતાની પત્ની સાથે જયપુર ખાતે હનીમૂન બનાવવા માટે ગયા હતા. આ દરમિયાન રૂમ બુક કરી અને તેઓ પિંક સ્કવોયર મોલમાં પત્ની સાથે પિક્ચર જોવા ગયો હતો. જ્યાં બપોરે 12:00 વાગ્યાનો શો બુક કરાવ્યો હતો. આ દરમિયાન બંને પિક્ચર ની મોજ માણી હતી. જેમાં 1: 30 વાગ્યાના સમયગાળાએ ઇન્ટરવલ પડતા પતિ પોતાની પત્ની માટે નાસ્તો લેવા ગયો હતો. જે નાસ્તો લઈને પરત આવતા જ પત્ની ગાયબ જોવા મળી હતી. આથી પતિના પગ નીચેથી જમીન સરકી ગઈ હતી અને તે પત્નીને શોધવા માટે થિયેટર અને મોલ માથે લીધા હતા. આ ઉપરાંત પત્નીને ફોન પણ કર્યો હતો પરંતુ પત્ની ફોન બંધ કરી અને ફરાર થઈ ગઈ હતી. બાદમાં 33 વર્ષીય યુવાને પોલીસમાં ગુમ નોંધ કરાવી હતી.
યુવાને એકલા પરત ફરવું પડે તેવી સ્થિતિ
આ દરમિયાન વાર્તામાં નવો ટ્વિસ્ટ આવ્યો હતો. આ બાજુ ફરિયાદને આધારે પોલીસે પરણીતાની શોધ ખોળ હાથ ધરી હતી તો બીજી તરફ પરિણીતા ખુદ જયપુરના શાહપુરા પોલીસ મથકે સામેથી આવી હતી અને તેમણે નિવેદન આપ્યું હતું કે તે આ લગ્નથી ખુશ નથી અને તેના જ કારણે તે પોતાના પતિને થિયેટરમાં છોડી અને ભાગી આવી હતી.આ વાત જણાવ્યા બાદ પરિણીતા બસ મારફતે પોતાના પિયર ચાલી ગઈ હતી. હાલ ઘરના સભ્યો તેને સમજાવવામાં લાગ્યા છે. બીજી બાજુ હનીમૂનમાં ગયેલા યુવાને એકલા પરત ફરવું પડે તેવી સ્થિતિ જન્મી છે.
