રાજકારણ / 'અમારી પાસે એવાં અનેક ચહેરા છે જે...' જુઓ PM પદના ફેસને લઇ અખિલેશ યાદવે શું કહ્યું

• લોકસભા ચૂંટણીને લઈ તમામ રાજકીય પક્ષો હરકતમાં
• બધાની નજર ઉત્તર પ્રદેશની 80 લોકસભા સીટો પર 
• ભાજપ આ તમામ બેઠકો પર એકતરફી જીતનો કરી રહી છે દાવો 
• વિપક્ષનું OBC મુદ્દે ભાજપને હરાવવાનું આયોજન 
• સમાજવાદી પાર્ટીના સુપ્રીમો અખિલેશ યાદવે કરી મોટી અપીલ  

લોકસભા ચૂંટણીને લઈ તમામ રાજકીય પક્ષો હવે કવાયતમાં લાગ્યા છે. એક તરફ ભાજપ હેટ્રિક કરવાનો દાવો કરી રહી છે તો બીજી તરફ વિરોધ પક્ષો મહાગઠબંધનની કવાયતમાં લાગેલા છે. બધાની નજર ઉત્તર પ્રદેશની 80 લોકસભા સીટો પર છે. ભાજપ આ તમામ બેઠકો પર એકતરફી જીતનો દાવો કરી રહી છે ત્યારે વિપક્ષ OBC મુદ્દે ભાજપને હરાવવાનું આયોજન કરી રહ્યું છે. આ બધા માટે સમાજવાદી પાર્ટીના વડા અખિલેશ યાદવે યુપીની તમામ વિપક્ષી પાર્ટીઓને તેમની સાથે આવવાની અપીલ કરી છે.

સમાજવાદી પાર્ટીના સુપ્રીમો અખિલેશ યાદવે કહ્યું કે, યુપીમાં જે પણ થઈ રહ્યું છે તે કેમેરામાં કેદ થઈ રહ્યું છે. યુપીમાં જમીન પર કંઈ નથી પહોંચી રહ્યું. બધા રોકાણકારો ક્યાં ગયા? ભાજપ પાસે કોઈ વિકલ્પ નથી. વિપક્ષના પીએમ ચહેરા અંગે તેમણે કહ્યું કે. વડાપ્રધાનનો ચહેરો પછી પણ નક્કી થઈ શકે છે. પહેલા ભાજપને હરાવવા જરૂરી છે. જે બાદ વડાપ્રધાનનો ચહેરો નક્કી કરવામાં આવશે. આપણી પાસે એવા ઘણા ચહેરા છે જે વડાપ્રધાન નરેન્દ્ર મોદીને હરાવી શકે છે. પરંતુ ભાજપ પાસે એક જ ચહેરો છે.

શું કહ્યું અખિલેશ યાદવે ? 
અખિલેશ યાદવે ઉત્તર પ્રદેશની તમામ વિપક્ષી પાર્ટીઓને અપીલ કરી હતી કે, જે પણ ભાજપને હરાવવા માંગે છે તે સમાજવાદી પાર્ટી સાથે આવે અને મોટું દિલ બતાવે. તેમણે કહ્યું કે, સમાજવાદી પાર્ટીએ અગાઉ પણ તેમનું સન્માન કર્યું છે. ભવિષ્યમાં પણ માન આપશે. કોંગ્રેસ અને માયાવતી સાથે આવવા પર અખિલેશ યાદવે કહ્યું કે, જે પણ ભાજપને હરાવવા માંગે છે, જે પણ પાર્ટી સમાજવાદી પાર્ટી સાથે આવવા માંગે છે, સમાજવાદી પાર્ટીએ પહેલા પણ તેમનું સન્માન કર્યું છે અને ભવિષ્યમાં પણ તેમનું સન્માન કરશે.

વિપક્ષી પાર્ટીઓની બેઠક અંગે મોટું નિવેદન 
અખિલેશ યાદવે  23 જૂને યોજાનારી વિપક્ષી પાર્ટીઓની બેઠક અંગે કહ્યું કે, તમામ પક્ષો ત્યાં બેસી જશે, કોઈને કોઈ રસ્તો ચોક્કસ નીકળશે. તેમણે કહ્યું કે, ચૂંટણી લડવા અંગે હજુ સુધી તેમની સામે કોઈ ફોર્મ્યુલા કે ડ્રાફ્ટ આવ્યો નથી. મીડિયામાં તેની ચર્ચા જ થઈ રહી છે. બેઠકમાં જે પણ ચર્ચા થશે, જે પણ ફોર્મ્યુલા પર ચર્ચા થશે, તેની ચર્ચા થશે અને ચોક્કસ આગળ વધવા માટે કોઈ ને કોઈ રસ્તો શોધી કાઢવામાં આવશે.

લોકસભાને રાજ્યોમાં જીતથી જોઈ શકાતી નથી: અખિલેશ 
આ સાથે કર્ણાટકમાં કોંગ્રેસની જીત બાદ, 2024ને લઈને કોંગ્રેસના મજબૂત દાવા પર અખિલેશ યાદવે કહ્યું કે, ગત વખતે પણ ઘણી એવી પાર્ટીઓ છે જેનું રાજ્યોમાં સારું પ્રદર્શન હતું. પરંતુ લોકસભામાં તે સારું ન હતું. એટલા માટે લોકસભાની ચૂંટણીને રાજ્યોમાં મળેલી જીત પરથી જોઈ શકાતી નથી. PDA 2024ની ચૂંટણીમાં NDAને હરાવી દેશે. એટલે કે પછાત દલિત લઘુમતીનું જોડાણ ચૂંટણીમાં ભાજપને હરાવશે.