અવિરત વરસાદ / બેન્કમાં પાણી, કોઝ-વે ધોવાયા, વુક્ષો ધડામ, ગુજરાતમાં મેઘ મલ્હાર અનેક જગ્યાએ મુસીબત બની વરસ્યો

• અમદાવાદમાં વરસાદનાં કારણે ઘણા માર્ગો પર ભરાયા પાણી
• પૂર્વ,પશ્ચિમ અને એરપોર્ટ વિસ્તારમાં ભરાયા પાણી 
• વલસાડમાં વરસાદને કારણે તોતિંગ વૃક્ષ ધરાશાયી થયું

અમદાવાદ સહિત સમગ્ર દક્ષિણ ગુજરાતમાં મેઘરાજા મનમુકીને વરસ્યા છે. ત્યારે અમદાવાદમાં ભારે વરસાદને લઈ શહેરનાં અનેક વિસ્તારોમાં પાણી ભરાયા હતા. તેમજ પૂર્વ, પશ્ચિમ અને એરપોર્ટ વિસ્તારમાં પણ પાણી ભરાયા હતા. એરપોર્ટ સર્કલ પાસે રસ્તા પર પાણી ભરાયા હતા. એરપોર્ટ રોડ પર પાણી ભરાતા વાહન ચાલકોને ભારે હાલાકીનો સામનો કરવો પડ્યો હતો.

ધોબી તળાવ વિસ્તારમાં વૃક્ષ ધરાશાયી
વલસાડમાં સતત વરસાદનાં કારણે અનેક જગ્યાએ વૃક્ષ ધરાશાયી થવાનાં બનાવો બન્યા છે. ધોબી તળાવ વિસ્તારમાં એક વૃક્ષ ધરાશાયી થયું હતું. ત્યારે તોતિંગ વૃક્ષ બાઈક ચાલક ઉપર પડ્યું હતું. સદનસીબે બાઈક ચાલકનો આબાદ બચાવ થયો હતો. વૃક્ષ ધરાશાયી થતા રસ્તો બંધ કરવામાં આવ્યો હતો. 

પંચાયત હસ્તકના 23 રસ્તા બંધ કરવામાં આવ્યા
તાપી જીલ્લામાં અવિરત વરસાદનાં કારણે મોટા ભાગનાં રસ્તાઓ બંધ કરવામાં આવ્યા છે. જેમાં પંચાયત હસ્તકનાં 23 રસ્તા બંધ કરવામાં આવ્યા છે. તેમજ વ્યારાના 3, ડોલવણનાં 2, વાલોડનાં 3 રસ્તા બંધ કરાયા છે. તેમજ સોનગઢ પંચાયત હસ્તકના 15 રસ્તા બંધ કરાયા છે. 

આસપાસના ગ્રામ્ય વિસ્તારમાં વરસાદ
નડિયાદમાં ધોધમાર વરસાદ પડ્યો હતો. ત્યારે ભારે પવન સાથે વરસાદ પડ્યો હતો. નડિયાદ પંથક સહિત આસપાસનાં ગ્રામ્ય વિસ્તારમાં પણ વરસાદી માહોલ છવાયો હતો. 

સેવાલીયાની SBI બેંકમાં પાણી ઘૂસી ગયા
ખેડાનાં સેવાલીયામાં વરસાદી માહોલ છવાયો હતો. સેવાલીયામાં ભારે વરસાદને કારણે SBI બેંકમાં પાણી ઘુસી ગયા હતા. બેંકમાં પાણી ઘુસી જતા બેંક બહાર મુકેલ ATM માં પણ પાણી ઘુસી ગયા હતા. બેંકમાં બે દિવસમાં બીજીવાર પાણી ઘુસ્યું છે. સમયસર બેંકમાંથી ફાઈલો ખસેડી દેતા નુકશાન ટળ્યું હતું. સેવાલીયાનાં બજાર અને રોડ ઉપર પાણી જ પાણી થઈ જવા પામ્યું હતું. 

 

 

 

 

View this post on Instagram

 

 

 

 

 

 

 

 

 

 

 

A post shared by VTV Gujarati News and Beyond (@vtv_gujarati_news)

ખાડી ઉપર પાણી ફરી વળતા અવરજવર બંધ
વલસાડ જીલ્લામાં અવિરત વરસાદ પડી રહ્યો છે. વરસાદનાં કારણે ઝૂલવણ ખાડી ઉપર પાણી ફરી વળ્યા હતા. ચીંચાઈ અને કોસમ કુવા વચ્ચેથી ખાડી પસાર થાય છે. ખાડી ઉપર પાણી ફરી વળતા અવર જવર બંધ કરવામાં આવી હતી. વહેતા પાણીમાં વાહન ચાલકો જોખમી રીતે વાહન ચલાવી રહ્યા છે. કોઝ-વે પાણીમાં ગરકાવ થતા વાહન ચાલકોની મુશ્કેલી વધી હતી. ધરમપુર સુધી આવન-જાવન માટે બ્રિજ ઉપયોગી છે.