રોચક / કોર્ટમાં ટ્રક છોડાવવાની સામે બાઈક રજૂ કર્યુ તો જજ અને વકીલોના હોશ ઊડી ગયા, જાણો રોચક મામલો

• એક અકસ્માત બાદ ટ્રક જમા થઇ ગયો હતો 
• ટ્રકના બદલે બાઈક જમાનત પર આપી 
• બાઈકની કિંમત ટ્રક કરતા પણ દસ લાખ વધારે 

ઘણીવાર કોર્ટમાં એવા કેસ સામે આવતા હોય છે કે જેને જોઇને જજના પણ હોશ ઉડી જાય. આવો જ એક રોચક કિસ્સો શનિવારે જોધપુરની અદાલતમાં આવ્યો જ્યાં એક કેસમાં સીઝ કરવામાં આવેલ ટ્રકને છોડાવવા માટે માલિક પોતાની 29 લાખ રૂપિયાની બાઈક મૂકવા આવ્યો. 

થોડા દિવસ પહેલા સૂરસાગર ક્ષેત્રમાં કાલીબેરીમાં ત્રણ ગાડીઓની ટક્કર થઇ ગઈ હતી. જેમાં એક ટ્રક પણ સામેલ હતો, જે બાદ પોલીસે તે ટ્રક જમા કરી લીધો હતો. હવે તે ટ્રક ત્યારે જ છોડાવી શકાય જ્યારે તે જ કિંમતની વસ્તુ ત્યાં જમા કરાવવામાં આવે. આ પરિસ્થિતિમાં ટ્રકનો માલિક પોતાની સુપર બાઈક અને સાથે તેના કાગળ લઈને કોર્ટમાં આવ્યો અને ટ્રક છોડાવીને લઇ ગયો. 

નોંધનીય છે કે જે બાઈક લઈને તે વ્યક્તિ આવ્યો હતો તેની કિંમતના કાગળ જ્યારે કોર્ટમાં જજને બતાવવામાં આવ્યા ત્યારે જજ પણ વિચારમાં પડી ગયા. આખરે બાઈક આટલી મોંઘી હોય કઈ રીતે ? પણ તપાસમાં ખબર પડી કે બાઈકની કિંમત 29 લાખ રૂપિયા છે. જજે તે અરજી મંજૂર કરી અને ટ્રકને મુક્ત કર્યો. 

જ્યારે ટ્રકને જમા કરવામાં આવ્યો ત્યારે તેની કિંમત 20 લાખ રૂપિયા હતી. હવે કોર્ટના કાયદા અનુસાર જો ટ્રક છોડાવવું હોય તો તે જ કિંમતની વસ્તુ ત્યાં મૂકવી પડશે. કોર્ટમાં બધા વિચારમાં પડી ગયા કે આ બાઈક એક બે લાખથી વધારે મોંઘી નહીં હોય પણ અસલી કિંમત જાણીને બધા ચોંકી ગયા.