ચોંકાવનારી ઘટના / જમ્મુ-કાશ્મીરની 107 મેડિકલ સ્ટુડન્ટ્સને પાકિસ્તાન જવું ભારે પડ્યું, હવે ડૉ.ની ડિગ્રી મેળવવામાં પડી રહ્યાં છે ફાંફા!

• કાશ્મીરના લગભગ 107 મેડિકલ સ્ટુડન્ટ્સને મુશ્કેલી
• વિદ્યાર્થીનીઓને પ્રમાણપત્ર મળી રહ્યા નથી
• પાકિસ્તાન સાથે ભારતના ખરાબ સંબંધને લઈને વિઝાનું કોકડું ગૂંચવાયું

ભારતમાં ઓછી સરકારી મેડિકલ સીટ અને મોંઘા પ્રાઈવેટ મેડિકલ એજ્યુકેશનના કારણે વિદ્યાર્થીઓને અભ્યાસ કરવો ખૂબ કઠિન બને છે. પરિણામેં વિદ્યાર્થીઓ અભ્યાસ માટે બાંગ્લાદેશ અને યુક્રેન સહિત ઘણા દેશોની પસંદગી કરતા હોય છે. પંરતુ વિદેશમાં ઘણી વખત વિદ્યાર્થીઓને ઘણી મુશ્કેલીનો સામનો કરવાની નોબત આવતી હોય છે. જમ્મુ-કાશ્મીરના લગભગ 107 મેડિકલ સ્ટુડન્ટ્સ સાથે પણ આવુ જ થયું. આ વિદ્યાર્થીનીઓએ મેડિકલ અભ્યાસ માટે પાકિસ્તાનની પસંદગી કરી હતી. જેને હવે પસ્તાવો થઈ રહ્યો છે. 

મેડિકલ ગ્રેજ્યુએટ પરીક્ષામાં બેસી શકતા નથી
જાણવા મળી રહ્યું છે કે પાકિસ્તાનથી મેડિકલનો અભ્યાસ પૂરો કરવા છતાં આ વિદ્યાર્થીનીઓને પ્રમાણપત્ર મળી રહ્યા નથી. જેનું મુખ્ય કારણ છે ભારત અને પાકિસ્તાન વચ્ચે સંબંધો. સારા સંબંધો અને સુરક્ષા મંજૂરીના અભાવે લોકોને પાકિસ્તાન જવા માટે વિઝા નથી મળી રહ્યા. જમ્મુ-કાશ્મીરના 107 મેડિકલ કોલેજના વિદ્યાર્થીનીઓ હવે ભારત અને પાકિસ્તાન વચ્ચેના ખરાબ સંબંધોને કારણે આ પાડોશી દેશમાં જઈ શકતી નથી. જેથી ડિગ્રી અટકી પડી છે. સાથે જ મેડિકલ સર્ટિફિકેટના અભાવે આ વિદ્યાર્થીનીઓ મેડિકલ કાઉન્સિલ ઓફ ઈન્ડિયાની ફોરેન મેડિકલ ગ્રેજ્યુએટ પરીક્ષામાં બેસી શકતા નથી.

ભારતની સરખામણીમાં ગર્લ સ્ટુડન્ટ્સ માટે તે સસ્તું છે.
ત્યારે આ મામલે નેશનલ કોન્ફરન્સના સાંસદ હસનૈન મસૂદીએ જણાવ્યું કે અમે ગૃહ મંત્રાલયના રાજ્ય મંત્રી નિત્યાનંદ રાય સમક્ષ આ મુદ્દો ઉઠાવ્યો છે. હજુ પણ સરકાર પાસે ન્યાયની માંગ કરીશ કે તમામ કાશ્મીરી મેડિકલ વિદ્યાર્થીઓને પાકિસ્તાન જવાની પરવાનગી આપવામાં આવે જેથી તેઓ ત્યાંથી તેમના મેડિકલ સર્ટિફિકેટ લાવી શકે.નોંધનિય છે કે પાકિસ્તાની કોલેજોમાં મેડિકલ અભ્યાસનો ખર્ચ લગભગ 10 થી 15 લાખ રૂપિયા છે. ભારતની સરખામણીમાં ગર્લ સ્ટુડન્ટ્સ માટે તે સસ્તું છે.