- સુરેન્દ્રનગરના બજાણા નજીક અકસ્માતની હૈયુ હચમચાવી નાખતી ઘટના
- રિક્ષા અને સ્વીફ્ટ કાર વચ્ચે ધડાકાભેર અકસ્માત
- આધેડ દંપતી સહિત ત્રણ લોકોના કમકમાટીભર્યા મોત
સુરેન્દ્રનગર જિલ્લાના પાટલી તાલુકાના બજાણા નજીક અકસ્માતની હૈયુ હચમચાવી નાખતી ઘટના સામે આવી હતી. જેમાં રિક્ષા અને સ્વીફ્ટ કાર વચ્ચે ધડાકાભેર અકસ્માત થયો હતો. આ દરમિયાન પીપળીના આધેડ દંપતી સહિત ત્રણ લોકોના કમકમાટીભર્યા મોત નીપજતા અરેરાટી મચી જવા પામી હતી. મહત્વનું છે કે બે લોકોના ઘટનાસ્થળે મોત નિપજયા હતા. જ્યારે આધેડ મહિલાને ગંભીર ઇજા થતાં તેને લોહી લુહાણ હાલતમાં સારવાર અર્થે ખસેડવામાં આવી હતી. આ દરમિયાન સારવાર મળે તે પહેલાં જ તેને માર્ગમાં કાળ આંબી જતા પરિવારજનોમાં કાળો કલ્પાત ફેલાયો છે. આ મામલે સ્થાનિક પોલીસ કાફલો ઘટનસ્થળે દોડી ગયો હતો.
3 ના મોતથી માર્ગ મરણચીસોથી ગુંજયો
આ ગોઝારી ઘટનાની પ્રાથમિક વિગત એવી છે કે પાટડી તાલુકાના બજાણા પુલ પાસે રીક્ષા અને સ્વીફ્ટ ગાડી વચ્ચે જોરદાર ટક્કર થઈ હતી. આ અકસ્માત એટલો ગંભીર હતો કે રિક્ષાનું રીતસરનું પડીકું વળી ગયું હતું. આ રીક્ષામાં કુલ પાંચ લોકો સવાર હોવાનું જાણવા મળી રહ્યું છે. જે રીક્ષામાં સવાર પીપળી ગામના બાલાભાઈ મોતીભાઈ વાણીયાનું મોત નિપજ્યું હતુ. જ્યારે પત્નિ પરેમબેન બાલાભાઇ વાણીયાને પ્રથમ વિરમગામ હોસ્પિટલ બાદ વધુ સારવારની જરૂર જણાતા અમદાવાદ હોસ્પિટલે લઇ જવાતા રસ્તામા જ તેઓએ આખરી શ્વાસ ખેંચ્યા હતા. ઉપરાંત રીક્ષામાં સવાર મુસાફરોને ગંભીર ઇજાઓ થવા પામી હતી.તો રીક્ષા ચાલક બજાણાના જાવેદભાઈ રહીમભાઈ બારૈયાનું ઘટનાસ્થળે જ કમકમાટીભર્યું મોત નિપજ્યુ હતુ.
બજાણા પોલીસે નાસી છૂટેલા કાર ચાલક સામે ગુન્હો નોંધ્યો
ઘટનાને પગલે સ્થાનિકો અને વાહન ચાલકોના ટોળેટોળા એકઠા થયા હતા જેમણે તાત્કાલિક 108 નો સંપર્ક કરતા 108 એમ્બ્યુલન્સ વાન મારફતે તાત્કાલિક સારવાર માટે પાટડી સામુહિક આરોગ્ય કેન્દ્ર ખાતે લઈ જવામાં આવ્યા હતા. લ હાલ બજાણા પોલીસે નાસી છૂટેલા કાર ચાલક વિરુદ્ધ અકસ્માતે મોત અંગેનો ગુન્હો દાખલ કરી કાર્યવાહી આગળ ધપાવી છે.
