ગીર સોમનાથ / દિવાળીના દિવસનું આ મિલન સૌથી સુંદર! 80 માછીમારો પાકની કેદમાંથી છૂટી વતન પરત ફર્યા, હર્ષના આસું રેલાયા

• ઇતિહાસમાં પ્રથમ વખત દિવાળીએ 80 માછીમારો પાકિસ્તાનથી વતન પહોંચ્યા 
• પાકિસ્તાનની જેલમાંથી મુક્ત થયેલ માછીમારો હર્ષના આંસુઓ સાથે પરિવારજનોને મળ્યા
• 12 જેટલા ભારતીય માછીમારો પાકિસ્તાન જેલમાં મૃત્યુ પામ્યા
• બંને સરકારોને માછીમાર આગેવાનોએ વિનંતી કરી,  કેદમાં રહેલા માછીમારોને યોગ્ય સારવાર અપાવે 

Gir Somnath Diwali News : માછીમારોના ઇતિહાસમાં કદાચ પ્રથમ વખત દિવાળીના પર્વ પર જ 80 જેટલા માછીમારો માદરે વતન પહોંચી હર્ષના આંસુઓ સાથે પરિવારજનોને મળ્યા તો 12 જેટલા ભારતીય માછીમારો પાકિસ્તાન જેલમાં મૃત્યુ પામ્યા છે તે બાબતે બંને સરકારોને માછીમાર આગેવાનોએ વિનંતી કરી કે, કેદમાં રહેલા માછીમારોને યોગ્ય સારવાર અપાવે. એક તરફ દિવાળીનો ઉત્સાહ અને બીજી તરફ પરિવાર સાથે મુલાકાત થતાં ભાવુક દ્રશ્યો સર્જાયા હતા. 

માછીમારોની રાહ જોઈ રહ્યા હતા પરિજનો 
આજે એક તરફ દેશભરમાં દિવાળી નુતન વર્ષનો પર્વ ઉજવાઈ રહ્યો છે, ચોમેર ભારે આતશબાજી થઈ રહી છે. આ બધાની વચ્ચે આજે પાકિસ્તાન જેલમાંથી મુક્ત થઈ અને 80 માછીમારો વેરાવળ પહોંચ્યા હતા ત્યારે વહેલી સવારથી મોડી રાત સુધી ભારે માત્રામાં માછીમારોના સ્વજનો ચાતક નજરે પોતાનો સ્વજન ક્યારે પોતાને મળશે તેની આતુરતાથી રાહ જોઈ રહ્યા હતા.

બે સ્પેશિયલ બસમાં માછીમારો પહોંચ્યા વતન 
દિવાળીના પર્વની મોડી સાંજે બે સ્પેશિયલ બસ દ્વારા વડોદરા થી વેરાવળ સુધી ફીસરકસ વિભાગ અને પોલીસ વિભાગ દ્વારા 80 માછીમારોને વેરાવળ લવાયા હતા. આ પહેલા તમામ માછીમારોનું વિવિધ સુરક્ષા એજન્સીઓ દ્વારા તપાસ અને પૂછપરછ કરી હતી. જે બાદમાં માછીમારો જ્યારે વેરાવળ પહોંચ્યા ત્યારે બસમાંથી નીચે ઉતરતા ની સાથે જ માછીમારો અને તેમના સ્વજનો ભારત માતાકી જય.. ના નારાઓ સાથે તમામ માછીમારોનું સ્વાગત કરાયું હતું. 

ત્રણ વર્ષથી પાકિસ્તાનની જેલમાં હતા બંધ 
વિગતો મુજબ અનેક માછીમારો છેલ્લા ત્રણ વર્ષથી પાકિસ્તાન જેલમાં કેદ હતા. મહત્વનું છે કે, અગાઉ જેમના નામ મુક્ત થવાની યાદીમાં ન હતા તેવા ત્રણ વર્ષ કેદની સજા ભોગવી પાકિસ્તાનથી આજે ભારત પહોંચી અને દિવાળીની સાંજે પોતાના સ્વજનોને મળતા હર્ષના આંસુઓ સાથે સૌ ભેટી પડ્યા હતા. તો ખરા અર્થમાં દિવાળી અને નૂતન વર્ષ માછીમાર રોના પરિવારમાં અનેરો ઉમંગ અને ઉત્સાહ લાવ્યો હતો. 

શું કહી રહ્યા છે માછીમારો ? 
માછીમારો જ્યારે પોતાના સ્વજનોને મળ્યા ત્યારે તમામને ફૂલોનો હાર પહેરાવી હર્ષના આંસુઓ સાથે ભેટી અને દરેકે તેમને આવકાર્યા હતા. માછીમાર આગેવાનોએ એવી વેદના વ્યક્ત કરી છે કે, પાકિસ્તાન જેલની અંદર 12 જેટલા માછીમારો મોતને ભેટ્યા છે અને તેનું કારણ એવું મનાય છે કે, તેઓને પૂરતી યોગ્ય સારવાર અપાતી નથી અને તેમનું મૃત્યુ થાય છે. આ સાથે મૃત્યુ થયા બાદ પણ 2-4 માસ બાદ તેમની લાશ તેમના પરિવારને અંતિમક્રિયા માટે પહોંચાડાય છે. આ બાબતે ભારત સરકાર અને પાકિસ્તાન સરકાર બંનેને માછીમારો દ્વારા રજૂઆત કરાઇ છે કે, પાકિસ્તાન જેલમાં યોગ્ય સારવાર કરાવાય અને જ્યારે માછીમારનું મૃત્યુ થાય ત્યારે માનવતાના ધોરણે તાકીદે તેમનો મૃતદેહ તેમના સ્વજનોને પહોંચાડાય. ત્યારે આજે 80 માછીમારો માદરે વતન પહોંચ્યા છે. તો હજુ 184 જેટલા માછીમારો પાકિસ્તાન જેલમાં કેદ છે તેઓની જલ્દી મુક્તિ થાય તેવું માછીમારો ઈચ્છી રહ્યા છે.