રાજ્યમાં વરસાદને લઈ હવામાન વિભાગની વધુ એક આગાહી સામે આવી છે. જેમાં આગામી 5 દિવસ સુધી ગુજરાતના જુદા જુદા વિસ્તારોમાં ક્યાંય અનરાધાર તો ક્યાંય અમી છાંટણાં રૂપે વરસાદ પડી શકે છે.
Share
રાજ્યમાં 5 દિવસમાં 24 કલાકમાં ભારે વરસાદ રહેશે
સૌરાષ્ટ્રમાં 24 કલાકમાં અનેક વિસ્તારમાં વરસાદ થશે
આજે છોટાઉદેપુરમાં સૌથી વધુ ભારે વરસાદની આગાહી
આ વર્ષે મેઘરાજાએ સતત ધમાકેદાર બેટિંગ કરીને જળબંબાકારની સ્થિતિ સર્જાઇ છે. દ્વારકા, જામનગર, જૂનાગઢ બાદ હવે દક્ષિણ ગુજરાતમાં ધોધમાર વરસાદ પડવાની આગાહી કરવામાં આવી છે. રાજ્યમાં ફરીએકવાર વરસાદનો મોટો રાઉન્ડ આવી રહ્યો હોવાની આગાહી હવામાન વિભાગે કરી છે. હવામાન ખાતાએ જણાવ્યું આગામી 5 દિવસ રાજ્યમાં વરસાદી માહોલ રહેશે. જ્યારે અનેક વિસ્તારોમાં તો છોતરાકાંઠી નાખે એવો વરસાદ પડી શકે છે. ખાસ કરીને અમદાવાદ, દક્ષિણ ગુજરાતમાં અતિભારે વરસાદની આગાહી કરવામાં આવી છે. પંચમહાલ, સુરત, તાપી, નવસારીમાં હવે મેઘરાજાની ધમાકેદાર બેટિંગ જોવા મળશે. તો સૌરાષ્ટ્રમાં ગીર સોમનાથ, રાજકોટ અને જામનગર સુધી વરસાદી માહોલ જામશે.
ભાવનગર અને સોમનાથમાં પણ વરસાદની શક્યતા
આ વર્ષે ચોમાસાની સીઝનનો 85 ટકા વરસાદ પડી ગયો છે. હજુ પણ સીઝનના બે મહિના બાકી છે એવામાં સતત વરસાદને કારણે જળબંબાકારની સ્થિતિ સર્જાઇ છે. હવામાન ખાતાના જણાવ્યા પ્રમાણે અમદાવાદ, છોટાઉદ્દેપુરમાં આગામી 24 કલાકમાં ભારેથી અતિભારે વરસાદ પડવાની શક્યતાઓ છે. ખાસ કરીને અમદાવાદ ગ્રામ્ય, ખેડા, આણંદમાં વરસાદની આગાહી કરવામાં આવી છે. બનાસકાંઠા જિલ્લામાં ઉપરાંત પાટણ, મહેસાણા, સાબરકાંઠા, ગાંધીનગર, અરવલ્લી સહિતના જિલ્લાઓમાં 28 જુલાઈ થી 1 ઓગસ્ટ દરમિયાન ગાજવીજ સાથે વરસાદ પડવાની શક્યતા જોવા મળી રહી છે. તે જ રીતે ખેડા, અમદાવાદ, આણંદ, વડોદરા સહિતના વિસ્તારોમાં વરસાદની શકયતા વ્યકત કરાઈ છે.
— VTV Gujarati News and Beyond (@VtvGujarati) July 28, 2023
રાજ્યમાં 24 કલાક બાદ ધીમે ધીમે વરસાદ ઘટશે
હવામાન વૈજ્ઞાનિક અભિમન્યુ ચૌહાણે જણાવ્યું કે દક્ષિણ ગુજરાત તરફ શિયર ઝોન હોવાથી રાજ્યભરમાં વરસાદી વાતાવરણ જોવા મળશે, જેમાં કેટલાક સ્થળે અતિભારે વરસાદ પડવાની શક્યતાઓ છે. મોન્સુન સિસ્ટમને કારણે દક્ષિણ અને મધ્ય ગુજરાતમાં વરસાદ પડશે. તો 24 કલાક બાદ ગુજરાતમાં વરસાદનું પ્રમાણ ઘટશે.
