મનોરંજન / ફિલ્મ આદિપુરુષ કરતાં પણ વધુ બજેટની હતી આ ટીવી સિરિયલ, 6 મહિનામાં જ થઈ ગઈ હતી બંધ! નામ સાંભળીને કહેશો કે બૌ કરી..

• ફિલ્મ આદિપુરુષની ચર્ચા બધી બાજુ થઈ રહી છે
• આદિપુરુષ ફિલ્મ 500 કરોડના બજેટમાં બની છે
• છ મહિનામા બંધ થઈ ગઈ એ સિરિયલનું બજેટ હતું 650 કરોડ રૂપિયા 

પ્રભાસ, કૃતિ સેનન અને સૈફ અલી ખાનની આવનારી ફિલ્મ આદિપુરુષની ચર્ચા બધી બાજુ થઈ રહી છે. આ ફિલ્મ વિશે એક રસપ્રદ માહિતી એમ પણ બહાર આવી હતી કે ફિલ્મ 500 કરોડના બજેટમાં બની છે. ફિલ્મના બજેટને લઈને લોકો લોકો ચોંકી ગયા હતા. પણ શું તમને ખબર છે કે ટીવીનો એક શો એવો હતો જે ફિલ્મ આદિપુરુષ કરતાં પણ મોંઘો હતો. એ સિરિયલનું બજેટ હતું 650 કરોડ રૂપિયા. આ સાથે જ રસપ્રદ વાત એ છે કે આ શો ફક્ત 6 મહિના જ ચાલી શક્યો હતો અને એ સાથે જ આ શોની ચર્ચા ક્યારેય સાંભળવા પણ નથી મળી. 

આ શો બીજો કોઈ નહીં પણ સ્વસ્તિક પ્રોડક્શન દ્વારા નિર્મિત ટીવી સિરિયલ રામ સિયા કે લવ કુશ છે. સમાચાર અનુસાર, આ સીરિયલ બનાવવામાં 650 કરોડ રૂપિયાનો ખર્ચ કરવામાં આવ્યો હતો. જણાવી દઈએ કે આ સીરિયલમાં શિવાયા પઠાનિયા, હિમાંશુ સોની, ક્રિશ ચૌહાણ અને હર્ષિત કાબરા મુખ્ય ભૂમિકામાં જોવા મળ્યા હતા. જ્યારે VFX સાથેની આ ટીવી સિરિયલ 5 ઓગસ્ટ 2019ના રોજ શરૂ થઈ હતી અને આ સિરિયલ 10 ફેબ્રુઆરી 2020ના રોજ બંધ થઈ હતી. 

નામ સૂચવે છે તેમ, તે રામાયણ પર આધારિત સિરિયલ હતી, જે ભગવાન રામ અને સીતાના પુત્રો લવ અને કુશના ઉછેર પર આધારિત હતી, જેઓ તેમના પિતા વિશે જાણવા માંગે છે. આ વાર્તાને ચાહકો તરફથી બહુ પ્રેમ મળ્યો નથી. પરંતુ તે બજેટને લઈને ઘણી હેડલાઈન્સમાં રહી હતી. જોકે આ પહેલી સિરિયલ નથી જેના પર કરોડોનો ખર્ચ કરવામાં આવ્યો હોય. આ પહેલા વર્ષ 2013માં આવેલી સીરિયલ મહાભારત બનાવવા માટે 100 કરોડ સુધીની રકમ ખર્ચવામાં આવી હતી. 

બોલિવૂડની આગામી ફિલ્મ આદિપુરુષ 500 કરોડના બજેટમાં બનાવવામાં આવી છે, જ્યારે એવું કહેવામાં આવી રહ્યું છે કે રિલીઝ પહેલા જ ફિલ્મે અડધાથી વધુ રકમ કલેક્ટ કરી લીધી છે. આ ફિલ્મ 16 જૂને રિલીઝ થવાની છે.