રાજ્ય / જન્માષ્ટમી પર ગુજરાતનાં અનેક જિલ્લાઓમાં વરસાદ: અમદાવાદ આખું ભીંજાયું, વડોદરા-સુરત સહિત જુઓ ક્યાં કેવો વરસાદ

• રાજ્યનાં અનેક જિલ્લાઓમાં વરસાદની શરૂઆત
• અમદાવાદ,વડોદરા સહિત ખેડામાં પણ મેઘરાજાનું આગમન
• છેલ્લાં 24 કલાકમાં 112 તાલુકામાં વરસાદ

રાજ્યભરમાં ભારે બફારા બાદ મેઘરાજા આશરે એક મહિના બાદ વરસી રહ્યાં છે. રાજ્યનાં અનેક રાજ્યોમાં વરસાદની ફરી શરૂઆત થવાને લીધે ખેડૂતો આનંદિત થયાં છે એટલું જ નહીં સ્થાનિકોને પણ ગરમીથી રાહત મળતાં હાશકારો અનુભવાયો છે. વડોદરા, અમદાવાદ, ખેડા, મહેસાણા વગેરે જિલ્લાઓમાં વરસાદે આગમન કર્યું છે. 

વડોદરા જિલ્લાના અનેક વિસ્તારોમાં વરસાદ
વડોદરા જિલ્લાનાં અનેક શહેરી અને ગ્રામ્ય વિસ્તારોમાં ધીમો વરસાદ શરૂ થયો. શાકરદા, રણોલી, પદમલા સહિતના ગ્રામ્ય વિસ્તારોમાં લાંબા સમય બાદ વરસાદ આવતા લોકો ખુશ ખુશ ખુશાલ થઈ ગયાં છે. વરસાદ આવતાં ખેડૂતોના પાકને ફરી જીવનદાન મળશે. 
 
ખેડા જિલ્લામાં વરસાદનું આગમન
ખેડા જિલ્લાના કઠલાલ અને કપડવંજમાં મેઘરાજાનું આગમન થયું છે. કઠલાલના ભાટેરા,ભાનેર,અનારા,છીપડી સહિતના ગામમાં વરસાદ થતા ખેડૂતોમાં ખુશીનો માહોલ જોવા મળી રહ્યો છે. 

મહેસાણા અને અમદાવાદના વાતાવરણમાં પલટો
મહેસાણા જિલ્લામાં પણ વાતાવરણમાં નોંધનીય ફેરફારો જોવા મળી રહ્યાં છે. જિલ્લામાં કાળા ડિબાંગ વાદળ સાથે વરસાદ શરૂ થતાં ગરમીમાંથી લોકોને રાહત મળી હોય તેવું લાગી રહ્યું છે. મહેસાણા સિવાય અમદાવાદનાં પણ અનેક વિસ્તારોમાં વરસાદ શરૂ થઈ ગયો છે. શહેરના પાલડી વિસ્તારમાં ધોધમાર વરસાદ થયો છે જ્યારે CTM ,દાણીલીમડા, ખોડિયારનગરમાં પણ વરસાદે આગમન કર્યું છે. 

લાંબા વિરામ બાદ ફરી મેઘસવારી
રાજ્યમાં છેલ્લા 24 કલાકમાં 112 તાલુકામાં વરસાદ નોંધાયો છે. જેમાં સૌથી વધુ નવસારી જિલ્લાના વાંસદામાં 3.7 ઇંચ, પારડીમાં અને ધરમપુરમાં 3.4 ઇંચ વરસાદ, વલસાડમાં 3.2 ઇંચ, કપરાડામાં 3.1 ઇંચ, ખેરગામમાં 2.8 ઇંચ વરસાદ, વાપી 2.6 ઇંચ, માંડવી 2.6 ઇંચ, વધઇ 2.6 ઇંચ વરસાદ નોંધાયો છે. વધુમાં જણાવીએ કે, વાલોડ, ઉમરપાડા, ચીખલીમાં 2.4 ઇંચ વરસાદ જ્યારે સોજીત્રા, કુકરમુંડા, ડેડીયાપાડા, નીઝર, દાહોદમાં 2 ઇંચ વરસાદ નોંધાયો છે. તેમજ સાગબારા, ડોલવણ, ડાંગમાં પોણ બે ઇંચ વરસાદ નોંધાયો છે.