ખુલાસો / ખેલૈયાઓએ તો ખેલ કર્યો! લક્ષ્મી વિલાસ પેલેસના ગરબામાં 1500 જણાએ પાસની ફોટોકોપી કરીને એન્ટ્રી લીધી, હવે કડક કાર્યવાહીની શક્યતા

• વડોદરામાં 1500 ખેલૈયાઓએ આયોજકો સાથે કર્યો ખેલ 
• ખેલૈયાઓએ ઓરિજનલ પાસની કલર ફોટોકોપી કરી હોવાનો ખુલાસો
• ડુપ્લિકેટ પાસ મામલે આયોજકોએ હજુ સુધી પોલીસ ફરિયાદ કરી નથી

વડોદરાનાં લક્ષ્મી વિલાસ પેલેસ દ્વારા આ વર્ષે હેરીટેજ ગરબા-2023 આયોજન કરવામાં આવ્યું છે. ત્યારે આ વર્ષે લક્ષ્મી વિલાસ પેલેસ દ્વારા "નારી તું નારાયણી દેવી"  થીમ પર ગરબાનું આયોજન કર્યું છે. ત્યારે કેટલાક ખેલૈયાઓ દ્વારા લક્ષ્મી વિલાસ પેલેસનાં ગરબાનાં નકલી પાસ બનાવતા આયોજકો ચોંકી ઉઠ્યા હતા. વડોદરામાં 1500 જેટલા ખેલૈયાઓ પાસેથી લક્ષ્મી વિલાસ પેલેજનાં નકલી પાસ ઝડપાવા પામ્યા હતા. એન્ટ્રી પાસની કલર ઝેરોક્ષ સાથે પ્રવેશ કરતા આશરે 1500 થી વધુ ખેલૈયાઓને સિક્યુરીટી ગાર્ડે ઝડપી પાડ્યા હતા. 

ખેલૈયાઓએ ઓરિજનલ પાસની કલર ફોટોકોપી કરી હોવાનો ખુલાસો
વડોદરામાં લક્ષ્મી વિલાસ પેલેસનાં નકલી પાસ ઝડપાતા આયોજકો મૂંઝવણમાં મુકાઈ જવા પામ્યા હતા. ત્યારે નકલી પાસ સાથે ઝડપાયેલા ખેલૈયાઓ સામે પોલીસ કાર્યવાહીની શક્યતાઓ છે. આ બાબતે ખેલૈયાઓએ ઓરિજનલ પાસની કલર ફોટોકોપી કરી હોવાનો ખુલાસો કર્યો હતો. ત્યારે RFID  ની તપાસનાં આધારે ડુપ્લિકેટ પાસ હોવાનું બહાર આવ્યું હતું. 

સમગ્ર મામલે આયોજકોએ નથી કરી હજી સુધી પોલીસ ફરિયાદ
વડોદરામાં લક્ષ્મી વિલાસ પેલેસ દ્વારા આ વર્ષે ગરબાનું ખૂબ જ સરસ આયોજન કરવામાં આવ્યું છે. ત્યારે ગઈકાલે હજારોની સંખ્યામાં ખેલૈયાઓની ભીડ ગરબામાં ઉમટી પડી હતી. ભીડમાં કલર ફોટોકોપીથી કેટલાક લોકોએ એન્ટ્રી મેળવી હોવાનો ખુલાસો થવા પામ્યો હતો. ત્યારે આ સમગ્ર મામલે આયોજકો દ્વારા હજુ સુધી કોઈ ફરિયાદ કરવામાં આવી નથી.