- માતાની અંતિમવિધિમાં પણ દીકરાઓ ન આવ્યા
- પિતાએ બંને દીકરાઓને મિલકતમાંથી કર્યા બેદખલ
- પિતાએ બંગલો અને ઓફિસ આપી ટ્રસ્ટને દાનમાં
પિતાએ તેમની તમામ મિલકતો ટ્રસ્ટને દાનમાં આપી દેતાં તેમના બંન્ને પુત્રોએ મિલકત મેળવવા હાઇકોર્ટનાં દ્વાર ખટખટાવ્યા છે. મિલકતમાંથી બેદખલ થયેલા પુત્રોએ હક મેળવવા હાઈકોર્ટમાં અરજી કરી છે. જેથી હાઈકોર્ટે ખાનગી ટ્રસ્ટ અને પાવર ઓફ એટર્નીને નોટિસ કાઢીને જવાબ રજૂ કરવાનો આદેશ કર્યો છે. આ મામલે બે સપ્તાહ બાદ સુનાવણી હાથ ધરવામાં આવશે.
માતાની ખબર કાઢવા યુ.કેથી ન આવ્યા બંને દીકરાઓ
મળતી માહિતી અનુસાર, અમદાવાદ શહેરના સેટેલાઈટ વિસ્તારમાં રશ્મિકાંતભાઈ ઠક્કર તેમના પત્ની નીમાબેનની સાથે એકલા રહેતા હતા. જ્યારે ઇન્કમટેક્સ ઓફિસમાં ઉચ્ચ હોદ્દા પરથી નિવૃત થયેલા રશ્મિકાંતભાઈના બંને દીકરા યુ.કેમાં સ્થાયી થયા હતા. વર્ષ 2018માં રશ્મિકાંતભાઈના પત્ની નીમાબેનને કીડનીની બીમારી થતાં તેઓ પથારીવશ થઈ ગયા હતા.આ દરમિયાન રશ્મિકાંતભાઈએ યુ.કે ખાતે રહેતા બંને દીકરાઓને માતાને મળવા આવવા કહ્યું હતું. જોકે, તેઓ માતાને મળવા ભારત આવ્યા નહોતા.
માતાની અંતિમવિધિમાં પણ દીકરા રહ્યા ગેરહાજર
જે બાદ વર્ષ 2019માં નીમાબેનનું મૃત્યુ થયું હતું. જેથી બંને દીકરાઓને માતાની અંતિમવિધિ માટે આવવા કહ્યું હતું. છતાં એકય આવ્યા નહોતા. જેથી રશ્મિકાંતભાઈ અને તેમના પત્નીની સેવા ચાકરી કરતા તેમના મિત્રના દીકરા કિશોર ઓડેદરાને તમામ મિલકત આપી દેવાનો નિર્ણય રશ્મિકાંતભાઈએ કર્યો હતો. પરંતુ કિશોરે મિલકત સ્વીકારવાનો ઈનકાર કર્યો હતો. જેથી રશ્મિકાંતભાઈએ તેમના મૃત્યુ બાદ સેટેલાઈટમાં આવેલો બંગલો અને સીજી રોડ પર આવેલી ઓફિસ જ્ઞાતિના ટ્રસ્ટને દાનમાં આપવાનું નક્કી કર્યું હતું. જ્યારે રોકડ અને ઘરેણાં કિશોરને ભેટમાં આપી દીધા હતા. તેમણે પાવર ઓફ એટર્ની બનાવી લીધું હતું.
પિતાએ ટ્રસ્ટને દાનમાં આપી દીધી મિલકત
બે વર્ષ બાદ રશ્મિકાંતભાઈનું અવસાન થતાં તેમની ઈચ્છા મુજબ તેમનો બંગલો અને ઓફિસ તેમણે અગાઉથી જ નક્કી કર્યા મુજબ ટ્રસ્ટને આપી દીધાં હતાં. તેમના અવસાન બાદ બન્ને દીકરા યુ.કે.થી ઈન્ડિયા આવ્યા ત્યારે તેમને જાણ થઇ હતી કે તેમના પિતાએ બંગલો અને સીજી રોડ પર આવેલી ઓફિસ જ્ઞાતિના ટ્રસ્ટને દાનમાં આપી દીધી છે. તેમના પિતાની એક પાઇ પણ તેમને આપી નથી. જેથી બંને દીકરીએ મિલકત મેળવવા હાઈકોર્ટમાં પહોંચ્યા છે.
