અણઘડ વહીવટ / તંત્ર તમારા ટેક્સના પૈસાનો કેવો વહીવટ કરે છે તે જોઈ લો, વડોદરામાં ગોડાઉન ખૂલતાં જે મળ્યું તે જોઈ લોકોની આંખો પહોળી થઈ ગઈ

• વડોદરા મનપાની મોટી બેદરકારી આવી સામે
• નાગરવાડામાં આવેલા ગોડાઉનમાંથી મળ્યો ડસ્ટબીનનો જથ્થો
• 6 વર્ષ વિત્યા બાદ પણ ડસ્ટબીનનો નથી કરાયો ઉપયોગ

વડોદરા મહાનગરપાલિકોનો અણઘડ વહીવટ ફરી બહાર આવ્યો છે. વર્ષ 2016માં સ્વચ્છ ભારત મિશન અભિયાન અંતર્ગત જે નાગરિકો વેરો ભરે છે, તેઓને ઘરદીઠ બે-બે ડોલ ફ્રીમાં આપવાની હતી. પરંતુ આ ડોલનું વિતરણ થયું નથી, આ ડોલ પડી રહી છે, તેવું આજે શહેરના નાગરવાડા વિસ્તારમાં આવેલા ગોડાઉનમાંથી મળી આવેલા ડોલના જથ્થાને જોઈને પ્રતીત થાય છે. આ ડોલ નાગરિકોને આપવાની હતી, પરંતુ હજુ સુધી અપાઈ નથી. 

નવેનવા ડસ્ટબીનો ભંગાર હાલતમાં જોવા મળ્યા
હાલ શહેરમાં ડિમોલેશનની કામગીરી ચાલી રહી છે, આ અંતર્ગત આવતીકાલે નાગરવાડા વિસ્તારમાં આવેલા મનપાના ગોડાઉનનું ડિમોલેશન કરવામાં આવનાર છે. ત્યારે આજે ગોડાઉનમાં પડેલી વસ્તુઓને અન્ય જગ્યાએ શિફ્ટ કરવા માટે ગોડાઉનનો દરવાજો ખોલવામાં આવતા અંદરથી ડસ્ટબીનનો મોટો જથ્થો અને સેફ્ટી શૂઝ મળી આવ્યા હતા. લાખોના ખર્ચે ખરીદવામાં આવેલ નવેનવા ડસ્ટબીનો વણવપરાયેલા અને ભંગાર હાલતમાં જોવા મળેલ હતા.
 
કોન્ટ્રાક્ટરોને ફાયદો કરાવવાનું રચવામાં આવી રહ્યું છે કૌભાંડ: સામાજિક કાર્યકર
આ અંગે સામાજિક કાર્યકર કમલેશભાઈએ જણાવ્યું કે, 'મનપાના કર્મચારીઓ સેફ્ટી શૂઝની માંગણી કરે છે, છતાં તેમને સેફ્ટી શૂઝ આપવામાં આવતા નથી. આ ગોડાઉનમાં મોટી સંખ્યામાં સેફ્ટી શૂઝ ધુળ ખાઈ રહ્યા છે. આ ઉપરાંત આ ડોલનો જથ્થો છેલ્લા 5-6 વર્ષથી આ ગોડાઉનમાં હતો. એટલે કહી શકાય કે શહેરમાં કોન્ટ્રાક્ટરોને ફાયદો કરાવવાનું કૌભાંડ જ રચવામાં આવી રહ્યું છે. આ એક જ વોર્ડનો ડોલનો જથ્થો છે. હજુ અલગ-અલગ વોર્ડમાં હિસાબ મારો તો કરોડોનો ભ્રષ્ટાચાર થયો છે.' 

ડિમોલિશન માટે ગોડાઉનનો દરવાજો ખોલતા મળી આવ્યો ડસ્ટબીનનો જથ્થો
જ્યારે સિનિયર સેનેટરી ઈન્સપેક્ટરને આ અંગે પૂછવામાં આવ્યું ત્યારે તેમણે જણાવ્યું કે, 'જ્યારે આ ડોલનું વિતરણ કરવાનું હતું, તે સમયે હું આ ઓફિસમાં નહોતો. અત્યારે અંદાજિત 700-800 ડોલ છેલ્લા 3 વર્ષથી આ ગોડાઉનમાં પડી છે. તે સમયે નાગરિકોને ડોલનું વિતરણ કરી દેવામાં આવ્યું હતું. આ એક્ટ્રા જથ્થો છે.'