તરણેતરના મેળામાં સ્ટેજ પર સ્થાન ન મળતા MLA ગિન્નાયા
CM સમક્ષ પ્રજાનો પક્ષ મૂકવાનો મારો અધિકાર છીનવાયો: ઋત્વિક
સુરેન્દ્રનગરના ચોટીલાના ધારાસભ્યએ તરણેતરના મેળામાં સ્ટેજ પર સ્થાન ન મળતા ઋત્વિક મકવાણાએ બળાપો કાઢ્યો છે. તરણેતરના મેળાના કાર્યક્રમમાં CM ભૂપેન્દ્ર પટેલ પણ હાજર રહ્યાં હતા. ત્યારે MLA ઋત્વિક મકવાણાએ બળાપો કાઢતા કહ્યું કે, 'હું સ્થાનિક ધારાસભ્ય હોવા છતાં મને સ્થાન ન અપાયું. હું CM સામે સ્ટેજ સુધી ના પહોંચી શક્યો. મને જિલ્લા વહિવટી તંત્ર દ્વારા રોકવામાં આવ્યો. તરણેતર વિસ્તાર ચોટીલા વિધાનસભામાં આવે છે. સ્થાનિક MLAને પ્રોટોકોલ મુજબ CM સમક્ષ બોલવાનો હક હોય છે. CM સમક્ષ પ્રજાનો પક્ષ મૂકવાનો મારો અધિકાર છીનવાયો.'
તરણેતરના મેળાનું નિમંત્રણ કાર્ડ
તરણેતરના મેળાના નિમંત્રણ કાર્ડને લઈ સર્જાયો હતો વિવાદ
ઉલ્લેખનીય છે કે, તરણેતરના મેળાના આમંત્રણ કાર્ડમાંથી સ્થાનિક ધારાસભ્ય અને કોંગ્રેસમાંથી ચોટીલા વિધાનસભાની બેઠક ઉપર જીતેલા ઋત્વિક મકવાણાનું સ્થાન કાઢી નાખવામાં આવ્યું હતું. આમંત્રણ કાર્ડમાં કોઈ પણ પ્રકારનો સ્થાનિક ધારાસભ્યોનો ઉલ્લેખ કરવામાં ન આવતા ભારે ચકચાર મચી ગઇ હતી. આ મામલે સુરેન્દ્રનગરની કલેક્ટર કચેરી ખાતે વિરોધ પ્રદર્શન પણ કરવામાં આવ્યું હતું. ત્યારે બીજી તરફ વારંવાર પ્રશાસન વિભાગ તરફથી અવગણના થતી હોય અને કોંગ્રેસના ધારાસભ્યોને આમંત્રણ પણ આપવામાં ન આવતા હોવાનો આક્ષેપ કરવામાં આવ્યો હતો.
તરણેતરનો મેળો
સોશ્યલ મીડિયામાં પણ આ મુદ્દો વધારે ચર્ચાયો હતો
વધુમાં જણાવી દઇએ કે, સુરેન્દ્રનગર જીલ્લાનાં થાનગઢ તાલુકાનાં તરણેતર ગામે ત્રિનેત્રેશ્વર મહાદેવ મંદિર ખાતે શરૂ થયેલા તરણેતર મેળાની આમંત્રણ પત્રિકામાં પાંચાળ પ્રદેશનો એક પણ ફોટો નહીં મૂકવામાં આવેલ અને ડાંગ જિલ્લાનાં ફોટા મૂકી સરકારી તંત્ર દ્વારા ગંભીર ભૂલ કરવામાં આવતાં સમગ્ર ઝાલાવાડ વિસ્તારનાં સાહિત્ય પ્રેમીઓમાં રોષ ભભૂકી ઉઠયો હતો ત્યારે સોશ્યલ મીડિયામાં પણ આ મુદ્દો 'ટોક ઓફ ધ ટાઉન' બન્યો હતો.
