- ભારતમાં ડાયાબિટીસના દર્દીઓની સંખ્યા ઝડપથી વધી રહી છે
- સંશોધનમાં ડાયાબિટીસના દર્દીઓનો વાસ્તવિક આંકડો 10.1 કરોડ હોવાનું બહાર આવ્યું
- ભારતમાં ડાયાબિટીસના સૌથી વધુ દર્દીઓ ગોવામાં છે
ભારતમાં ડાયાબિટીસના દર્દીઓની સંખ્યા સતત વધી રહી છે. આવી સ્થિતિમાં, એક નવા સંશોધનમાં ભયાનક આંકડાઓ સામે આવ્યા છે, જે પુષ્ટિ કરે છે કે ભારત ઝડપથી વિશ્વની 'ડાયાબિટીસ કેપિટલ' બની રહ્યું છે. તાજેતરના અભ્યાસ મુજબ, ભારતમાં 101 મિલિયન લોકો ડાયાબિટીસ છે. અભ્યાસમાં કહેવામાં આવ્યું છે કે છેલ્લા ચાર વર્ષમાં ડાયાબિટીસના કેસમાં 44%નો વધારો થયો છે.
આ અભ્યાસ ઈન્ડિયન કાઉન્સિલ ઓફ મેડિકલ રિસર્ચ-ઈન્ડિયા ડાયાબિટીસ (ICMR-INDIAB) દ્વારા કરવામાં આવ્યો છે, જેમાં બહાર આવ્યું છે કે ભારતમાં ડાયાબિટીસના દર્દીઓની સંખ્યા ઝડપથી વધી રહી છે.
અભ્યાસમાં કહેવામાં આવ્યું છે કે, 2019માં જ્યાં ભારતમાં ડાયાબિટીસના સાત કરોડ દર્દીઓ હતા ત્યાં હવે આ સંખ્યામાં 44%નો ઉછાળો આવ્યો છે. સંશોધનમાં જણાવાયું છે કે ભારતની 15.3% વસ્તી (ઓછામાં ઓછા 136 મિલિયન લોકો) પ્રી-ડાયાબિટીસ છે. ભવિષ્યમાં ડાયાબિટીસ થવાનું જોખમ પ્રિ-ડાયાબિટીસ કહેવાય છે. આ આંકડો ડાયાબિટીસ સંબંધિત અગાઉના અંદાજો કરતા ઘણો વધારે છે, જેના કારણે આરોગ્ય નિષ્ણાતો ચિંતિત છે.
વર્લ્ડ હેલ્થ ઓર્ગેનાઈઝેશન (WHO)એ અનુમાન લગાવ્યું હતું કે, ભારતમાં લગભગ 7.7 કરોડ લોકો ડાયાબિટીસથી પીડિત હશે, જ્યારે સંશોધનમાં ડાયાબિટીસના દર્દીઓનો વાસ્તવિક આંકડો 10.1 કરોડ હોવાનું બહાર આવ્યું છે. તે જ સમયે, ડબ્લ્યુએચઓએ અનુમાન લગાવ્યું હતું કે 2.5 કરોડ પ્રી-ડાયાબિટીસ હશે પરંતુ વાસ્તવિક આંકડો તેનાથી ઘણો મોટો છે.
10 વર્ષ ચાલી શોધ
ડાયાબિટીસ પર કરવામાં આવેલ આ સંશોધન 10 વર્ષ સુધી ચાલ્યું, જેને ભારતનો અત્યાર સુધીનો સૌથી મોટો સર્વે કહેવામાં આવી રહ્યો છે. મદ્રાસ ડાયાબિટીસ રિસર્ચ ફાઉન્ડેશને આ સંશોધન કરવામાં ICMRને મદદ કરી છે. જેમાં ભારતના દરેક રાજ્યમાંથી લોકોએ ભાગ લીધો હતો.
મીડિયા સાથે વાત કરતા, સંશોધનના મુખ્ય લેખક અને મદ્રાસ ડાયાબિટીસ રિસર્ચ ફાઉન્ડેશનના પ્રમુખે કહ્યું, 'આ સ્થિતિ ટાઈમ બોમ્બ જેવી છે. જો તમે પ્રી-ડાયાબિટીસ છો તો તમને ડાયાબિટીસ થવાની શક્યતા વધુ છે. પ્રી-ડાયાબિટીસ ધરાવતા 60 ટકા લોકો આગામી પાંચ વર્ષમાં આ રોગ વિકસાવે છે.
ભારતના કેટલા રાજ્યમાં છે કેટલા ડાયાબિટીસના કેસ?
સંશોધનમાં જાણવા મળ્યું છે કે ભારતમાં ડાયાબિટીસના સૌથી વધુ દર્દીઓ ગોવામાં છે. ગોવાની 26.4% વસ્તી ડાયાબિટીસથી પીડિત છે. તે પછી પુડુચેરી (26.3%) અને કેરળ (25.5%) આવે છે. ઉત્તર પ્રદેશમાં ડાયાબિટીસના સૌથી ઓછા 4.8% દર્દીઓ છે, પરંતુ અહીંની લગભગ 18% વસ્તી પ્રી-ડાયાબિટીસ છે, જે એક મોટો ખતરો છે.
સંશોધનમાં કહેવામાં આવ્યું છે કે, હાલમાં ઉત્તર પ્રદેશ, મધ્યપ્રદેશ, બિહાર અને અરુણાચલ પ્રદેશમાં ડાયાબિટીસનો વ્યાપ ઓછો છે, પરંતુ સાથે જ આ રાજ્યોમાં ડાયાબિટીસમાં ઝડપથી વધારો થવાનો ખતરો પણ છે. .
ડાયાબિટીસ શું છે?
ડાયાબિટીસ એક એવી બીમારી છે જેમાં શરીરમાં બ્લડ શુગરનું પ્રમાણ વધી જાય છે. તે ત્યારે થાય છે જ્યારે શરીર પૂરતા પ્રમાણમાં ઇન્સ્યુલિન હોર્મોન બનાવી શકતું નથી અથવા ઇન્સ્યુલિનનો યોગ્ય રીતે ઉપયોગ કરી શકતું નથી. ઇન્સ્યુલિન એ સ્વાદુપિંડ દ્વારા બનાવવામાં આવેલ હોર્મોન છે જે શરીરને ઊર્જા માટે કાર્બોહાઇડ્રેટ્સના ભંગાણથી ગ્લુકોઝનો ઉપયોગ કરવામાં મદદ કરે છે.
ડાયાબિટીસના લક્ષણોઃ
- વારંવાર પેશાબ થવો,
- સંપૂર્ણ ઊંઘ લીધા પછી પણ થાક લાગવો,
- વારંવાર ભૂખ લાગવી,
- વજન ઘટવું,
- દ્રષ્ટિ ગુમાવવી- ધૂંધળુ દેખાવુ,
- ઘાવ ધીમો રુઝવો વગેરે.
ડાયાબિટીસથી બચવાના ઉપાય
યોગ્ય લાઇફસ્ટાઇલ,સંતુલિત આહાર અને નિયમિત કસરતથી આપણે ઘણી બીમારીઓનું જોખમ ઘટાડી શકીએ છીએ. ડાયાબિટીસ આનુવંશિક કારણોસર પણ થાય છે, તેથી કેટલીકવાર તેને રોકવું મુશ્કેલ હોઈ શકે છે, પરંતુ સાવચેતી રાખીને, આપણે તેનું જોખમ ઘટાડી શકીએ છીએ. દરરોજ અડધો કલાક ચાલવાથી પણ ડાયાબિટીસનું જોખમ ઘટાડી શકાય છે.
Disclaimer: અહીં આપેલી માહિતી માત્ર અનુમાન અને માહિતી પર આધારિત છે. આથી અત્રે અહીં ઉલ્લેખ કરવો જરૂરી છે કે VTV ગુજરાતી આવી કોઈ પણ પ્રકારની માહિતીની પુષ્ટિ કરતું નથી. કોઈપણ માહિતી અથવા માન્યતાને અમલમાં મૂકતા પહેલા તેના વિશે વધુમાં માહિતી મેળવવી તેમજ સંબંધિત નિષ્ણાંતની સલાહ લેવી જરૂરી.
