ખુલાસો / બનાસકાંઠામાં તીડના સંભવિત ખતરા મુદ્દે રાહતના સમાચાર, જુઓ સરવેમાં શું થયો ખુલાસો

• બનાસકાંઠામાં તીડ દેખાવા મુદ્દે ખુલાસો
• તીડ નિયંત્રણ ટીમના સરવેમાં થયો ખૂલાસો 
• બનાસકાંઠાના વિસ્તારોમાં તીડ ન હોવાનું સામે આવ્યું 

બનાસકાંઠામાં તીડનાં સંભવિત ખતરાને લઈને તીડ નિયંત્રણ ટીમનાં સર્વેમાં ખુલાસો થયો છે. બનાસકાંઠાના વિસ્તારોમાં તીડ ન હોવાનું સામે આવ્યું છે. રાજસ્થાન તીડ નિયંત્રણ વિભાગે તીડનાં ફેલાવાને કંટ્રોલ કર્યો છે. તેમજ બનાસકાંઠા વહીવટી તંત્ર રાજસ્થાન તીડ નિયંત્રણ વિભાગનાં સંપર્કમાં છે. તેમજ સમયાંતરે તીડ નિયંત્રણ ટીમ દ્વારા સર્વે કરાશે. 

હાલ બનાસકાંઠામાં તીડનો કોઈ પણ જાતનો પ્રશ્ન છે નહીઃ કલેક્ટર
આ બાબતે બનાસકાંઠા કલેક્ટર વરૂણ બરનવાલાએ જણાવ્યું હતું કે,  રાજસ્થાનમાં તીડનાં સમાચાર અમારા સુધી આવ્યા છે. ત્યારે અત્યારે મળતી માહિતી મુજબ ત્યાં પણ તેને કંટ્રોલમાં કરી લેવામાં આવ્યા છે. હાલ બનાસકાંઠામાં તીડનો કોઈ પણ જાતનો પ્રશ્ન છે નહી. દર વર્ષે જે પ્રમાણે રૂટીનમાં સર્વે થાય છે. તે જ પ્રમાણે  આ વર્ષે પણ ટીમ આવીને સર્વે કરી ગઈ છે. અને તેમણે પણ કોઈ ખાસ ઓબ્ઝર્વેશન આપ્યા નથી. 

3 વર્ષ અગાઉ તીડ આક્રમણથી ખેડૂતોને લાખોનું થયું હતું નુકસાન 
બનાસકાંઠાનાં સરહદી વિસ્તારમાં તીડને લઈ ફરી ખેડૂતોમાં ચિંતા જોવા મળી રહી છે. પાકિસ્તાન- રાજસ્થાન બોર્ડર પર આવેલા રાધાનેસડા ગામનાં ખેડૂતો ચિંતામાં છે. રાજસ્થાનમાં આવેલા તીડથી સરકાર યોગ્ય પગલા ભરે તેવી માંગ છે. સરહદી વિસ્તારોમાં તીડ આવે તે પહેલાં દવાનો છંટકાર કરવાની માંગ ઉચ્ચારી છે. જેમાં 3 વર્ષ અગાઉ તીડ આક્રમણથી ખેડૂતોને લાખોનું નુકશાન થયું હતું. સરકારે તીડમાં થયેલા નુકસાનમાં કોઈ સહાય ન આપી હોવાનો પણ ખેડૂતોનો આરોપ છે. 3 વર્ષ અગાઉ પણ આજ ગામમાં તીડનાં આક્રમણથી ભારે નુકશાન થયું હતું. તેમજ તમામ લીલા ખેતરો તીડ આક્રમણથી રણ જેવા બની ગયા હતા.