- રવિન્દ્ર જાડેજાએ ભારત અને ઓસ્ટ્રેલિયા વચ્ચેની મેચમાં મચાવ્યો તરખાટ
- પહેલા ડોમેસ્ટિક, પછી ઈન્ટરનેશનલ રમવું નિર્ણય સારો પૂરવાર સાબિત થયો
- તલવાર એ શક્તિનું પ્રતિક છે આજ તેમનું નાનું એક સેલિબ્રેશન છે: રિવાબા
સર્જરી બાદ એક લાંબા સમયના બ્રેક પછી રવિન્દ્ર જાડેજાએ આંતરરાષ્ટ્રીય ક્રિકેટમાં વાપસી કરી છે. ઈજાના કારણે લગભગ 5 મહિના સુધી મેદાનથી દૂર રહ્યા બાદ ટીમ ઈન્ડિયાના ઓલરાઉન્ડર રવિન્દ્ર જાડેજાએ વાપસી કરીને ટીમ ઈન્ડિયાને જીત અપાવવામાં મહત્વની ભૂમિકા ભજવી હતી. નાગપુરના વિદર્ભ સ્ટેડિયમમાં ભારત અને ઓસ્ટ્રેલિયા વચ્ચે રમાયેલી પ્રથમ ટેસ્ટ મેચમાં ભારતનો એક ઇનિંગ અને 132 રને શાનદાર વિજય થયો હતો. જેમાં લાંબા સમય બાદ આંતરરાષ્ટ્રીય મેચ રમી રહેલા રવિન્દ્ર જાડેજાએ પણ આ મેચમાં તરખાટ મચાવ્યો હતો. તેમણે સાત વિકેટ લીધી હતી અને બેટિંગ દરમિયાન 70 રન બનાવ્યા હતા.
રીવાબાએ કોચ અને ફિઝિયોનો માન્યો આભાર
ત્યારે આ મામલે vtvgujarati.com દ્વારા રવિન્દ્ર જાડેજાના પત્ની રિવાબા જાડેજા સાથે વાતચીત કરવામાં આવી હતી. જેમાં તેઓએ જણાવ્યું કે, 'સર્જરી પછી જ્યારે મેદાનમાં વાપસીની વાત આવે તો ચોક્કસપણે થોડું મુશ્કેલ લાગે છે, કારણે કે બોડી કેવી રીતે રિએક્ટ કરે છે, કેવી રીતે તેનું આઉટકમ આવશે. તેના માટે થઈને જ હું દિલથી તેમના કોચ અને ફિઝિયોનો આભાર માનું છે. તેમણે સતત ફોલોઅપ લઈને તેમનું કોન્ફિડન્ટ લેવલ પણ ડેવલોપ કર્યું અને ફિઝિકલી તેમની સ્ટ્રેન્થને રી-ડેવલોપ કરી. તેમણે નક્કી કર્યું હતું કે તેઓ પહેલા ડોમેસ્ટીક ક્રિકેટ રમશે અને પછી જ ઈન્ટરનેશનલ ક્રિકેટ રમશે. મારા માનવા પ્રમાણે રવિન્દ્રસિંહ માટે આ નિર્ણય જ સારો પૂરવાર થયો, ડોમેસ્ટિકમાં રમ્યા બાદ તેમનો આત્મવિશ્વાસ પણ વધી ગયો. આનંદની વાત છે કે તેઓ દેશ માટે સતત પોતાનું બેસ્ટ પરફોર્મન્સ આપતા રહે છે.'
દેશ માટે રમવાનો જુસ્સો તેમને સતત પ્રેરિત કરતો રહે છેઃ રિવાબા જાડેજા
રિવાબાએ જણાવ્યું કે, 'તેઓ જ્યારે મેન ઓફ જ મેચ થયા ત્યારે ખૂબ ખુશીની લાગણી છવાઈ ગઈ હતી. તેમને મેં ફોન કરીને શુભકામનાઓ પાઠવી હતી. તેઓએ ઇન્ટરનેશલ ક્રિકેટમાં 14 વર્ષ પૂર્ણ કર્યા છે. ત્યારે તેમને ટીમનો સંપૂર્ણ અનુભવ છે. સાથે જ તેઓ સામેની ટીમની સ્ટ્રેન્થ અને વીકનેસથી પણ વાકેફ હોય છે. તેમનો અનુભવ, ટીમ અને દેશ માટે રમવાનો જે જુસ્સો છે તે તેમને સતત પ્રેરિત કરતો રહે છે.'
તલવાર ફેરવવી એ આ રાજપૂતોની પરંપરા છેઃ રિવાબા
ક્રિકેટ મેદાનમાં તલવારની જેમ બેટ ફેરવવા અંગે રિવાબાએ કહ્યું કે, 'તેઓ ક્ષત્રિય સમાજમાં આવે છે. તલવાર છે એ શક્તિનું પ્રતિક છે. આજ તેમનું નાનું એક સેલિબ્રેશન છે કે જે તેમને બધાથી અલગ પાડે છે. તલવાર ફેરવવી એ રાજપૂતોની પરંપરા છે અને તેઓ તલવારબાજી સાથે ઉજવણી કરવાનો રિવાજ ધરાવે છે. તેથી જ તેઓ અડધી સદી અથવા સદી ફટકાર્યા પછી તલવારની જેમ બેટ ફેરવે છે.' અંતમાં તેમણે ટીમ ઈન્ડિયાને પણ શુભેચ્છા પાઠવી હતી.
ICCએ જાડેજાને ફટકાર્યો દંડ
આપને જણાવી દઈએ કે, ભારત અને ઓસ્ટ્રેલિયા વચ્ચેની આ ક્રિકેટ મેચને લઈને ભારતીય ટીમના ઓલ રાઉન્ડર રવિન્દ્ર જાડેજા વિવાદમાં પણ આવ્યા છે. ભારત અને ઓસ્ટ્રેલિયા વચ્ચેની ઈનિંગ્સના પહેલા દિવસે એટલે કે 9 ફેબ્રુઆરી ગુરુવારે પ્રથમ ઇનિંગની 46મી ઓવરમાં રવિન્દ્ર જાડેજા તેમની આંગળીમાં ક્રીમ લગાવતા હોય તેવા દાવા સાથેનો વીડિયો વાયરલ થયો હતો. આ મુદ્દે વિવાદ થતાં ICCએ જાડેજાને તેમની મેચ ફીના 25 ટકા દંડ ફટકારવામાં આવ્યો હતો.
