- રાજકોટમાં સ્ટેટ મોનીટરિંગ સેલના દરોડા
- નવાગામના કારખાનામાંથી દારૂ બનાવવાનું કેમિકલ ઝડપાયું
- પોલીસે વિદેશી દારૂની મીનિ ફેક્ટરી ઝડપી લઈ સ્થાનિક પોલીસનું નાક વાઢી લીધું
રાજકોટ પોલીસની લાલિયાવાડીનો વધુ એક વખત સ્ટેટ મોનિટરિંગ સેલે પર્દાફાશ કર્યો છે. જેમાં વિદેશી દારૂની મીનિ ફેક્ટરી ઝડપી લઈ સ્થાનિક પોલીસનું નાક વાઢી લીધું છે. સ્ટેટ મોનિટરિંગ સેલે કુવાડવા પોલીસ સ્ટેશનના 200 મીટરના અંતરે આવેલી ફેક્ટરી ઝડપી લેતા સ્થાનિક પોલીસની કામગીરી સામે સવાલો ઉભા થયા છે.
દારૂની સાથે સાથે શંકાસ્પદ કેમિકલ પણ કબજે લેવાયું
રાજકોટમાં 31મી ડિસેમ્બર પહેલા મોટી કાર્યવાહી કરાઈ છે.રાજકોટના નવાગામ ઇન્ડસ્ટ્રીયલ વિસ્તારમાંથી સ્ટેટ મોનિટરિંગ સેલે દરોડો પાડી ધમધમતી વિદેશી દારૂની મીનિ ફેક્ટરી ઝડપી લીધી હતી. પોલીસ સ્ટેશનથી આટલી નજીક દારૂનો જથ્થો ઝડપાતા લોકોમાં પણ અનેક સવાલો ઉઠ્યા છે. મહત્વનું છે કે અગાઉ રાજકોટમાં જનતાએ દારૂ મામલે દરોડા પાડ્યા હતા. ત્યારબાદ આજે SMC ના દરોડામાં પ્લાસ્ટિકના પાર્સલના પેકિંગમાં દારૂનો જથ્થો મળી આવ્યો હતો.વધુમાં દારૂની સાથે સાથે શંકાસ્પદ કેમિકલ પણ કબજે લેવાયું છે. એટલું જ નહીં દારૂની બોટલોનું રિફ્લિંગ થતું હોવાનું પણ પોલીસ અધિકારીએ જણાવ્યું હતું.જ્યારે આ પ્રકરણમાં સંડોવાયેલ 2 આરોપીઓની અટકાયત પણ કરી લેવામાં આવી છે.
પ્લાસ્ટિકના પાર્સલના પેકિંગમાંથી ઝડપાયો હતો દારૂનો જથ્થો
રાજકોટમાં દારુનુ ગોડાઉન ઝડપાવાનો મામલે પોલીસે તપાસ હાથ ધરતા રોહિત વોરા અને હસમુખ સાકોરિયા ગોડાઉનના માલીક હોવાનું ખુલ્યુ છે. વધુમાં આ બંન્ને શખ્સો હડમતીયા ગામના રહેવાસી હોવાનું પોલીસની પ્રાથમિક તપાસમાં બહાર આવ્યું છે. વધુમાં તપાસ દરમિયાન બેટરીના પાણી માટે ગોડાઉન રાખ્યું હોવાનું ગોડાઉન માલીકએ રટણ રટયું હતું. ત્યારબાદ આ પ્રકરણમાં FSLની ટીમ પણ ઘટના સ્થળે પહોંચી તપાસમાં જોડાઇ છે.
