મોટું નિવેદન / જાપાનના PM પર હુમલા બાદ G7 બેઠકની સુરક્ષા પર સવાલ, કહ્યું 'મારી જવાબદારી'

• જાપાનના વડાપ્રધાન ફ્યુમિયો કિશિદા પર હુમલા બાદ મોટું નિવેદન 
• જાપાનમાં આગામી મહિને  યપજનર G7 દેશોની બેઠકને લઈ આપ્યું નિવેદન 
• PM કિશિદાએ કહ્યું કે, આ બેઠકની સુરક્ષાની જવાબદારી મારી રહેશે

જાપાનના વડાપ્રધાન ફ્યુમિયો કિશિદા પર ભાષણ દરમિયાન સ્મોક બોમ્બથી હુમલો કરવામાં આવ્યો હતો. જોકે જાપાનના પીએમ સ્મોક બોમ્બ હુમલાથી બચી ગયા હતા. આ તરફ પોલીસે હુમલાના શંકાસ્પદને પકડી લીધો હતો. જોકે હવે આ ઘટના બાદથી જાપાનમાં યોજાનારી G7 બેઠકની સુરક્ષા વ્યવસ્થા પર સવાલો ઉભા થયા છે.  

જાપાનમાં આગામી મહિને  G7 દેશોની બેઠક યોજાવાની છે. આનાથી હુમલામાંથી બચી ગયાના એક દિવસ પછી જાપાનના પીએમ ફ્યુમિયો કિશિદાએ ઔદ્યોગિક શક્તિઓના જૂથ (G7) ની બેઠકની સલામતીની ખાતરી કરવા માટે શક્ય તેટલું બધું કરવાની પ્રતિજ્ઞા લીધી. કિશિદાએ કહ્યું કે, આ બેઠકની સુરક્ષાની જવાબદારી મારી રહેશે.

કેવી રીતે થયો હતો હુમલો ? 
પશ્ચિમ જાપાનના ચૂંટણી પ્રચાર દરમિયાન કિશિદા પર એક શકમંદ દ્વારા સ્મોક બોમ્બ વડે હુમલો કરવામાં આવ્યો હતો. પીએમ 23 એપ્રિલે સંસદના નીચલા ગૃહની પેટાચૂંટણી માટે પ્રચાર કરી રહ્યા હતા. એક ન્યૂઝ એજન્સીએ અહેવાલ આપ્યો છે કે, પોલીસ દ્વારા 24 વર્ષીય રિયુજી કિમુરા તરીકે ઓળખાયેલ શંકાસ્પદની ધરપકડ કરવામાં આવી ત્યારે તેની પાસે છરી હતી. શંકાસ્પદ વ્યક્તિ પાસે બીજું વિસ્ફોટક ઉપકરણ પણ હતું, જેને તેણે ઘટનાસ્થળે જ વિસ્ફોટ કર્યો હતો.

આવા જ એક હુમલામાં પૂર્વ PM શિન્ઝો આબેનું થયું હતું મોત 
કિશિદાએ કહ્યું કે, જેઓ જાપાનની લોકશાહીના પાયા પર હુમલો કરે છે તેમને હિંસાનો આશરો લેવાની મંજૂરી આપવામાં આવશે નહીં. જણાવી દઈએ કે, ગયા વર્ષે જ પૂર્વ પીએમ શિંજો આબેની ચૂંટણી સભામાં હત્યા કરવામાં આવી હતી. આબેને પ્રચાર દરમિયાન ભાષણ આપતી વખતે એક વ્યક્તિએ ગોળી મારી હતી, જે બાદ તેમનું મૃત્યુ થયું હતું.

G7માં કયા કયા દેશો સામેલ ? 
જાપાનમાં આગામી મહિને  G7 દેશોની બેઠક યોજાવાની છે. જોકે તમને જણાવી દઈએ કે, G7 એ કેનેડા, ફ્રાન્સ, જર્મની, ઇટાલી, જાપાન, યુનાઇટેડ કિંગડમ અને યુનાઇટેડ સ્ટેટ્સ સહિત વિશ્વની સાત મુખ્ય ઔદ્યોગિક શક્તિઓનું જૂથ છે. આ ઉપરાંત યુરોપિયન યુનિયન પણ તેનો સભ્ય છે.