મનોરંજન / બોલિવુડની આ હિરોઇનો ભારતીય આર્મી સાથે ધરાવે છે અનેરો નાતો, એકના તો પિતા પણ થઇ ચૂક્યાં છે શહીદ

• અનેક સેલેબ્સ આર્મી પરિવારમાંથી આવે છે
• લિસ્ટમાં પ્રિયંકા ચોપરાથી લઈને અનુષ્કા શર્માનું નામ શામેલ
• આ અભિનેત્રીના પિતા દેશ સેવામાં થયા શહીદ

ફિલ્મોમાં સેલેબ્સ અલગ અલગ પાત્ર ભજવે છે. કોઈ ડોકટરનું પાત્ર ભજવે છે, તો કોઈ વકીલનું પાત્ર ભજવે છે. કેટલાક સેલેબ્સે આર્મીનું પાત્ર ભજવ્યું છે. અનેક એવી સેલેબ્સ છે, જે આર્મી પરિવારમાંથી આવે છે. આ લિસ્ટમાં પ્રિયંકા ચોપરાથી લઈને અનુષ્કા શર્માનું નામ શામેલ છે. 

ઐશ્વર્યા રાય બચ્ચન
મિસ વર્લ્ડ રહી ચૂકેલ ઐશ્વર્યા રાયનો જન્મ એક આર્મી પરિવારમાં થયો છે. તેમના પિતા ઈન્ડિયન આર્મીમાં એક ઓફિસરની પોસ્ટ પર ફરજ બજાવી ચૂક્યા છે. 

અનુષ્કા શર્મા
અનુષ્કા શર્માના પિતાએ આર્મીમાં રહીને દેશની સેવા કરી છે. અનુષ્કા શર્માના પિતા અજય કુમાર શર્મા ભારતીય સેનામાં કર્નલ હતા. તેમણે વર્ષ 1999માં ઐતિહાસિક કારગિલ યુદ્ધમાં દુશ્મનો સામે લડાઈ લડી હતી. અનુષ્કાએ બેંગલુરુમાં આર્મી સ્કૂલમાં શિક્ષણ મેળવ્યું છે. 

પ્રિયંકા ચોપરા
પ્રિયંકા ચોપરાના માતા-પિતા બંનેએ આર્મીમાં યોગદાન આપ્યું છે. તેમના પિતા ડૉ.અશોક ચોપરા અને તેમની માતા મધુ ચોપરાએ ભારતીય સેનામાં ડૉકટર તરીકે કામ કર્યું હતું.  પ્રિયંકા ચોપરાના પિતાએ કેન્સર સામે જંગ લડ્યા પછી 10 જૂન 2013ના રોજ મૃત્યુ પામ્યા હતા. 

પ્રીતિ ઝિંટા
પ્રીતિ ઝિંટાના પિતા દુર્ગાનંદ ઝિંટા ભારતીય સેનામાં મેજર હતા. એક રોડ દુર્ઘટનામાં તેમનું મૃત્યુ થયું હતું. 

સુષ્મિતા સેન
આ લિસ્ટમાં સુષ્મિતા સેનનું નામ પણ શામેલ છે. સુષ્મિતા સેનના પિતા વિંગ કમાંડર શુબીર સેન ઈન્ડિયન એરફોર્સ વિંગ કમાન્ડર હતા. 

નેહા ધૂપિયા
નેહા ધૂપિયા નેવીના બેકગ્રાઉન્ડમાંથી આવે છે. અભિનેત્રીના પિતા પ્રદીપ સિંહ ધૂપિયા એક્સ-કમાન્ડર તરીકે દેશની સેવા કરી ચૂક્યા છે. 

લારા દત્તા
બોલીવુડ અભિનેત્રી લારા દત્તાના પિતા એલ.કે. દત્તા ‘ઈન્ડિયન એરફોર્સ’માં વિંગ કમાન્ડર રહી ચૂક્યા છે. લારા દત્તાની બહેન ચેરિલ દત્તા પણ આર્મ્ડ ફોર્સમાં સેવા આપી રહી છે. 

નિમ્રત કૌર
નિમ્રત કૌરના પિતા ભુપિંદર સિંહ ભારતીય સેનામાં મેજર હતા અને સેનામાં એક એન્જિનિયર પણ હતા. તેઓ હિબ્જ-ઉલ-મુદજાહિદ્દીન હુમલામાં શહીદ થઈ ગયા હતા. 

ગુલ પનાગ 
બોલીવુડમાં પોતાનો જલવો દેખાડનાર અભિનેત્રી ગુલ પનાગના પિતા હરચરણજીત સિંહ પનાગ ભારતીય સેનાના રિટાયર્ડ લેફ્ટનન્ટ જનરલ છે.