- તથ્યના પિતાની જામીન અરજી પર સુનાવણી
- મોઢામાં કેન્સરને લઇ જામીન માટે અરજી
- પ્રજ્ઞેશ પટેલે કેન્સરના સ્કેચ કોર્ટ સમક્ષ મુક્યા
- ગ્રામ્ય કોર્ટ 19 ઓગસ્ટે સંભળાવશે ચુકાદો
તથ્ય પટેલનાં પિતા પ્રજ્ઞેશ પટેલની જામીન અરજી મુદ્દે સુનાવણી પૂર્ણ થઈ છે. બંને પક્ષોની દલીલો બાદ ગ્રામ્ય કોર્ટે ચુકાદો અનામત રાખ્યો હતો. મોઢામાં કેન્સરનાં બહાનાં હેઠળ તથ્યનાં પિતાએ જામીન માંગ્યા હતા. જે બાબતે કોર્ટેમાં સારવારનાં દસ્તાવેજ અને કેન્સરનાં ભાગનો સ્કેચ કોર્ટ સમક્ષ મુકાયો હતો. પ્રજ્ઞેશ પટેલની જામીન અરજી સામે સરકારી વકીલ દ્વારા દલીલ કરાઈ હતી. જેમાં 4 નવેમ્બર 2019 બાદ કોઈ સારવાર લીધી નથી. તેમજ જેલમાં પણ સારવાર ઉપલબ્ધ છે. અમદાવાદ ગ્રામ્ય કોર્ટ 19 ઓગસ્ટનાં રોજ ચુકાદો સંભળાવશે.
અગાઉનાં કેસોમાં હાઈકોર્ટ-સેશન્સ કોર્ટે પણ સારવાર માટે રાહત આપી છેઃ પ્રજ્ઞેશ પટેલનાં વકીલ
પ્રજ્ઞેશ પટેલનાં જામીન અંગે પ્રજ્ઞેશ પટેલનાં વકીલે કોર્ટમાં દલીલ કરી હતી કે, 2019 થી મોઢાનું કેન્સર છે. અગાઉનાં કેસોમાં પણ હાઈકોર્ટે- સેશન્સ કોર્ટે સારવાર માટે રાહત આપી છે. તેમજ 23 ઓગસ્ટનાં રોજ એપોઈમેન્ટ છે.
વર્ષ 2019 સુધીની સારવારની માત્ર રસીદો જ રજૂ કરાઈ છેઃ સરકારી વકીલ
સરકારી વકીલ દ્વારા પ્રજ્ઞેશ પટેલનાં જામીનને લઈ દલીલ કરી હતી કે, 4 નવેમ્બર 2019 બાદ કોઈ સારવાર લીધી નથી. વર્ષ 2019 સુધીની સારવારની માત્ર રસીદો જ રજૂ કરાઈ છે. સારવાર લીધી કે નહીં તે સ્પષ્ટ થતું નથી. સારવાર અહીં પણ ઉપલબ્ધ છે. ઘટના બાદથી રેગ્યુલર જામીન અરજી સુધી કેન્સરનો કોઈ ઉલ્લેખ નથી.
પ્રજ્ઞેશ પટેલ કોણ છે
એકસાથે 9 લોકોનો જીવ લેનાર તથ્ય પટેલ ગોતાના કુખ્યાત પ્રજ્ઞેશ પટેલ દીકરો હોવાનું સામે આવ્યું હતું. એવું પણ જાણવા મળ્યું હતું કે, અકસ્માત સર્જાયા બાદ પ્રજ્ઞેશ પટેલે ઘટનાસ્થળે પહોંચીને પોલીસ સાથે દાદાગીરી કરી હતી અને તથ્યને છોડાવીને રાત્રે જ લઇ ગયો હતો. આપને જણાવી દઈએ કે, પ્રજ્ઞેશ પટેલ ગુનાહિત ઈતિહાસ ધરાવે છે. નવેમ્બર 2020માં તેની સામે દુષ્કર્મની ફરિયાદ નોંધાઈ હતી.
નવેમ્બર 2020માં શું બની હતી ઘટના?
રાજકોટની યુવતીને કોર્પોરેટ કંપનીમાં નોકરી અપાવવાનું કહીને અમદાવાદ શહેરના પાંચ યુવકે સામૂહિક દુષ્કર્મ આચર્યું હોવાની ફરિયાદ અમદાવાદ ખાતે નોંધાઈ હતી. આ તમામ યુવતીને આબુ અને ત્યાંથી ઉદેપુર લઈ ગયા હતા. જ્યાં કોલ્ડ્રિંકમાં દારૂ ભેળવી યુવતીને બેભાન કરી યુવતી સાથે સામૂહિક દુષ્કર્મ આચર્યું હતું. જે બાદ યુવતીનો વીડિયો ઉતારી વાયરલ કરવાની ધમકી આપી વારંવાર દુષ્કર્મ આચરવામાં આવ્યું હતું.
