- બહુચરાજીના ભાજપ ઉમેદવાર સુખાજી ઠાકોરને લોકોએ કર્યા સવાલો
- મોહનપુરા ગામમાં પ્રચાર અર્થે આવેલા સુખાજી ઠાકોરએ લોકોએ સવાલો કર્યા
- એક પણ મત નહીં આપો તો પણ હું કામ કરીશઃ સુખાજી ઠાકોર
ગુજરાત વિધાનસભાની ચૂંટણી માટે રાજકીય પક્ષોએ ઉમેદવારોના નામો જાહેર કર્યા બાદ તમામ રાજકીય પક્ષો મતદારોને આકર્ષવા માટે અડીચોટીનું જોર લગાવી રહ્યા છે. જોકે, ચૂંટણી સમયે મતદારોએ પણ પોતાનો મીજાજ બતાવવાનું શરુ કરી દીધુ છે. બહુચરાજીમાં પ્રચાર દરમિયાન ભાજપના ઉમેદવાર સુખાજી ઠાકોરને લોકોના રોષનો સામનો કરવો પડ્યો હતો. સુખાજી સમક્ષ લોકોએ મોટી દાઉ ખુમાપુરા વચ્ચે બ્રિજને લઈને ઉગ્ર રજૂઆત કરી હતી. આ દરમિયાન સુખાજી ઠાકોરે એક પણ મત નહીં આપો તો પણ આ વખતે કામ કરવાની બાંહેધરી આપી હતી.
ભાજપના ઉમેદવારને લોકોએ કર્યા સવાલો
મહેસાણા જિલ્લાની 7 બેઠક પર ભાજપ, કોંગ્રેસ અને આપના 21 ઉમેદવારોએ ચૂંટણીમાં ઝંપલાવ્યું છે. બહુચરાજીની વાત કરીએ તો આ બેઠક પર ભાજપે સુખાજી ઠાકોરને ચૂંટણીના મેદાનમાં ઉતાર્યા છે, જ્યારે કોંગ્રેસે અમૃતજી (ભોપાજી) ઠાકોર અને આમ આદમી પાર્ટીએ સાગર રબારીને ટિકિટ આપી છે. ત્રણેય ઉમેદવારોએ પોતાના પ્રચારનો ધમધમાટ તેજ કરી દીધો છે, ત્યારે બહુચરાજીના મોહનપુરા ગામમાં પ્રચાર અર્થે આવેલા સુખાજી ઠાકોરને મોટી દાઉ ખુમાપુરા વચ્ચે બ્રિજ નહીં બનતા સ્થાનિકોએ સવાલો કર્યા હતા. વર્ષ 2017માં ખાતમુહૂર્ત કર્યા બાદ બ્રિજનું કામ હજુ સુધી હાથ ધરવામાં ન આવતા લોકોએ સવાલો કર્યા હતા.
એક પણ મત નહીં આપો તો પણ કામ કરીશઃ સુખાજી ઠાકોર
આ દરમિયાન ભાજપના ઉમેદવાર સુખાજી ઠાકોરે કહ્યું હતું કે, હું તમારો ભાઈ છું, તમે મને એક પણ મત નહીં આપો તો પણ હું તમારું કામ કરીશ. તેમણે સ્થાનિકના ખભે હાથ મૂકીને વિશ્વાસ અપાવ્યો હતો.
