- ગ્રામ પંચાયત ચૂંટણીને લઈ મહત્વના સમાચાર
- તલાટી મંત્રીને વહીવટદાર તરીકેની સત્તા સોંપવા આદેશ
- અન્ય ગામના તલાટીને વહીવટદાર તરીકે નિમણૂંક આપવા આદેશ
ગુજરાત વિધાનસભાની ચૂંટણી પહેલા રાજ્યમાં ગ્રામ પંચાયતની ચૂંટણી યોજાઈ તેવું લાગી રહ્યું છે ત્યારે ગ્રામ પંચાયતની ચૂંટણીને લઈને રાજ્ય સરકારે પણ તૈયારીઓ શરૂ કરી દીધી છે. મહત્વનું છે કે ગ્રામ પંચાયતની ચૂંટણી વર્ષના અંત સુધીમાં યોજાઈ શકે છે ત્યારે ચૂંટણીને લઈને મહત્વના સમાચાર સામે આવ્યા છે.
જુન મહિના સુધી નહી યોજાય ગ્રામ પંચાયતની ચૂંટણી
મહત્વનું છે કે ગ્રામપંચાયતોની ટર્મ પૂરી થતાં સરપંચ પાસેથી હોદ્દાની સત્તા લઈ લેવામાં આવી છે. જેથી ગ્રામ પંચાયતની ચૂંટણી મે મહિનામાં આવશે તેવી વાતો વહેતી થઈ હતી. પણ આજે પંચાયત વિભાગે મહત્વનો પરિપત્ર બહાર પાડ્યો છે જેમાં તલાટી મંત્રીને વહીવટદાર તરીકેની સત્તા સોંપવા આદેશ કરવામા આવ્યો છે. જેમાં અન્ય ગામના તલાટીને વહીવટદાર તરીકે નિમણૂંક આપવા આદેશ,તેમજ જ્યાં ફરજ બજાવતા હોય ત્યાં જ તલાટીને વહીવટદાર નહી બનાવાય તેવો ઉલ્લેખ પણ કરવામા આવ્યો છે. આથી એ નક્કી કહી શકાય છે કે જુન મહિના સુધી ગ્રામ પંચાયતની ચૂંટણી યોજાશે નહીં.
પંચાયતી રાજ સૌથી મોટી લોકશાહીની તાકાત
1957માં બળવંતરાય મહેતાની અધ્યક્ષતામાં સમિતિની રચના કરવામાં આવી હતી અને બળવંતરાય મહેતાએ 'પંચાયતી રાજ' એ શબ્દ માટે 'લોકશાહી વિકેન્દ્રીકરણ' શબ્દનો પ્રયોગ કર્યો હતો. સમિતિએ સત્તાના વિકેન્દ્રીકરણ માટે કહ્યું હતું કે, જવાબદારી અને સત્તા વગર વિકાસ થઇ શકતો નથી. આ દ્રષ્ટિએ ઉપલી કક્ષાએથી સત્તાનું વિકેન્દ્રીકરણ કરી લોકોએ ચૂંટેલા પ્રતિનિધિઓની બનેલી પંચાયતોને સત્તાની સોંપણી કરવી તે પંચાયતી રાજ કહેવાય છે. ભારત એ સૌથી મોટો લોકશાહી દેશ છે અને તેની આ લોકશાહીને ગ્રામ પંચાયતો વધુ મજબૂત બનાવે છે. ચોકકસ ઉદ્દેશ્યો અને હેતુઓ સાથે પંચાયતી રાજનું નિર્માણ કરવામાં આવ્યું છે. સત્તાનું વિકેન્દ્રીકરણ, લોકોની ભાગીદારી વધારવી, ગામડાનો સર્વાંગી વિકાસ સાધવા અને લોક સશક્તિકરણ જેવા હેતુઓ સાથે પંચાયતી રાજની સ્થાપના કરવામાં આવી. પ્રજાની ઉન્નતી માટે આ વ્યવસ્થા ગોઠવવામાં આવી છે. અંગ્રેજી રાજનિતિજ્ઞએ કહ્યું હતું કે અનેક ઉથલ પાથલ અને ઉતાર ચઢાવમાં પણ ભારતના લોકો મજબૂતીથી ટક્યા છે તેનું કારણ છે પંચાયતોની તાકાત છે કારણકે નાની નાની પંચાયતો એ પોતાનામાં જ પ્રજાસત્તાક રાજ્યો છે.
પંચાયતોના પરિણામ 2022ની દિશા નક્કી કરશે?
ત્યારે વિધાનસભાની ચૂંટણી પહેલા ગ્રામ પંચાયતોની ચૂંટણી યોજાશે તેવો સળવળાટ ઘણા સમયથી શરૂ થઈ ગયો છે ત્યારે જોવું રહ્યું કે પંચાયતોના પરિણામ 2022ની કેવી દીશા અને દશા નકકી કરે છે.
