લોકસભા ચૂંટણી જેમજેમ નજીક આવી રહી છે તેમ તેમ રાજકીય પક્ષો જીત માટે એડચોટીનું જોર લગાવી રહ્યાં છે...ચૂંટણીને ધ્યાને રાખીને વિકાસ કામોને વેગ મળી રહ્યો છે. પરંતુ વડોદરામાં આ જ વિકાસ કામો વિવાદનું કારણ બન્યા છે. વડોદરા મહાનગરપાલિકા દ્વારા ચૂંટણી પહેલા સ્ટેન્ડિંગ કમિટીમાં કરોડોના વિવિધ વિકાસ કામોની લ્હાણી કરવામાં આવી હતી. જોકે સ્ટેન્ડિંગ કમિટીમાં આવેલી દરખાસ્તમાં કેટલીક દરખાસ્ત એવી પણ છે કે જેને લઈને વિપક્ષે શાસક પક્ષ પર સવાલો ઉઠાવ્યા છે.
કોન્ટ્રાક્ટરોને ફાયદો કરાવવા માટે ફરીથી રોડ બનાવવાની દરખાસ્ત લાવવામાં આવીઃ વિપક્ષ
સ્ટેન્ડિંગ કમિટીમાં કાલાઘોડા સર્કલથી સિટી બસ સ્ટેન્ડ અને પરિવાર ચાર રસ્તાથી સોમા તળાવ ચાર રસ્તા સુધી નવો રોડ બનાવવાની દરખાસ્ત કરવામાં આવી છે. આ બંને રોડ પાછળ કોર્પોરેશન 18 કરોડનો ખર્ચ કરવા જઈ રહ્યું છે. જેના માટે પી.ડી.કન્સ્ટ્રક્શન અને ગાયત્રી કન્સ્ટ્રક્શન કંપનીને 29 ટકા વધુ ભાવે કામ આપવાનું નક્કી કરાયું છે. જેને લઈને સત્તાપક્ષ અને વિપક્ષ સામસામે આવી ગયા છે.
વિપક્ષનો આક્ષેપ
વિપક્ષનો આક્ષેપ છે કે, આ બંને રોડ સારા હોવા છતાં કોર્પોરેશનના શાસકો માત્ર કોન્ટ્રાક્ટરોને ફાયદો કરાવવા માટે ફરીથી રોડ બનાવવાની દરખાસ્ત લાવવામાં આવી છે. તો સ્ટેન્ડિંગ કમિટીના ચેરમેને વિપક્ષના આક્ષેપોને ફગાવ્યા છે. સ્ટેન્ડિંગ કમિટીના ચેરમેનનું કહેવું છે કે, અધિકારી, એન્જિનિયરના અભિપ્રાય અને સ્ટેન્ડિંગ કમિટી સભ્યોની વ્યક્તિગત સ્થળ મુલાકાત બાદ જ રોડ બનાવવાની દરખાસ્ત ચઢાવવામાં આવી છે.
વધુ વાંચોઃ BIG NEWS : આખી દુનિયામાં ડાઉન થયું ફેસબુક-ઈન્સ્ટાગ્રામ, કરોડો યૂઝર્સમાં મચ્યો હાહાકાર
બિસ્માર રોડથી સ્થાનિકો ત્રસ્ત
વડોદરા શહેરના અનેક વિસ્તારો એવા છે કે જ્યાં બિસ્માર રોડથી સ્થાનિકો ત્રસ્ત છે. તો કેટલીક જગ્યાએ લાંબા સમયથી રોડનું કામ ટલ્લે ચઢ્યું છે. ત્યારે આવી જગ્યાએ રોડ બનાવવાને બદલે કોર્પોરેશન સારા રોડ હોય ત્યાં ફરીથી રોડ બનાવવાને પ્રાથમિકતા આપી રહ્યું છે. એટલું જ નહીં કોન્ટ્રાકટરોને વધુ ભાવે રોડ બનાવવાનો ઈજારો આપી પાલિકના સત્તાધિશો કેવો વિકાસ કરી રહ્યા છે તે મોટો સવાલ છે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
