- અરવલ્લીના કઉ મોતીપુરાનો વ્યક્તિ ઓનલાઈન ભેંસ ખરીદતા છેતરાયો
- ફેસબુક ઉપર 2 ભેંસોની ખરીદી કરતા 1.25 લાખનો થયો સાયબર ફ્રોડ
- ફેસબુક પરથી પંજાબની ભેંસો ખરીદવી પડી ભારે
ડિજિટલ યુગમાં સાયબર ગઠિયાઓ બેફામ બન્યા છે. જે છાશવારે અવનવા કીમિયાઓ કરી ગુન્હાને અંજામ આપતા હોય છે. ત્યારે આવો જ એક ચોંકાવનારો કિસ્સો અરવલ્લીમાં સામે આવ્યો છે. જેમા મોડાસાના કઉ મોતીપુરાનો વ્યક્તી સાયબર ફ્રોડનો શિકાર બન્યો છે. જેમાં ભેંસ ખરીદવા મામલે સોશિયલ મીડિયામાં વાતચીત થયા બાદ આરોપીઓએ 1.25 લાખ રૂપિયાનું કરી નાખ્યું હોવાનું સામે આવ્યું છે.
મોડાસાના કઉ મોતીપુરાનો વ્યક્તી બન્યો સાયબર ફ્રોડનો શિકાર
મોડાસાના કઉ મોતીપુરા ખાતે રહેતા ફકીર મહંમદ વણઝારાએ સાયબર ક્રાઇમમાં ફરિયાદ નોંધાવી સમગ્ર વિગત આપી હતી. જેમાં જણાવ્યું હતું કે ફેસબૂક પરથી બે ભેંસો ખરીદવા બાબતે તેઓની સાથે 1.25 લાખ રૂપિયાનો સાયબર ફ્રોડ થયું છે. આધેડને ફેસબુક પર પંજાબની બે ભેંસો ખરીદવા બાબતે વાત થઈ હતી. બાદમાં ભેજાબાજ ઠગે વિશ્વાસમાં લઈ બે ભેંસોનો ભાવ એક લાખ રૂપિયા નક્કી કર્યા હતો.
ફ્રોડે ભોગ બનનાર પાસે વારંવાર વિવિધ યુક્તિઓથી 1.25 લાખ પડાવ્યા
ફ્રોડે ભેંસોની પંજાબથી ડિલિવરી કરવા પ્રથમ ડિપોઝીટ પેટે ઓનલાઈન 10,000 રૂપિયાની માંગ કરી હતી. ત્યારબાદ ફ્રોડે ભોગ બનનાર પાસે 20 અને 30 હજાર સહિત વારંવાર વિવિધ યુક્તિઓથી 1.25 લાખ પડાવી લીધા હતા. ખાસ વાત એ છે કે 1 લાખ કિંમતની ભેંસોનું નક્કી થયા બાદ રૂપિયા 1.25 લાખ ઓનલાઇન ટ્રાન્સફર કરી લીધા હતા. બાદમાં ભોગ બનનારે સાયબર ક્રાઇમમાં ફરીયાદ નોંધાવતા પોલીસે તપાસ હાથ ધરી છે.
