રાજનીતિ / ફરી જૂના સાથીઓ થશે એક! ગૃહમંત્રી શાહે આ દિગ્ગજ નેતા સાથે મીટિંગ કરતાં રાજકારણ ગરમાયું

• 2024માં યોજાનાર લોકસભા ચૂંટણીને લઈ તમામ પક્ષો હરકતમાં
• ભાજપ દ્વારા NDAનો પરિવાર વધારવાનો પ્રયાસ 
• TDPના વડા એન ચંદ્રબાબુ નાયડુ અમિત શાહને મળ્યા
• કેન્દ્રીય ગૃહમંત્રી અમિત શાહના નિવાસસ્થાને યોજાયેલ બેઠકથી અનેક ચર્ચા 

દેશમાં 2024માં યોજાનાર લોકસભા ચૂંટણીને લઈ તમામ પક્ષોએ અત્યારથી જ કવાયત શરૂ કરી દીધી છે. બિહારના મુખ્યમંત્રી નીતિશ કુમાર PM મોદીના વિજયરથને રોકવા માટે વિપક્ષોને એક કરવાની પહેલ કરી રહ્યા છે. આ તરફ ભાજપ પણ NDAનો પરિવાર વધારવાનો પ્રયાસ કરી રહી છે. વાત જાણે એમ છે કે, TDPના વડા એન ચંદ્રબાબુ નાયડુ શનિવારે રાજધાની દિલ્હીમાં કેન્દ્રીય ગૃહમંત્રી અમિત શાહને મળ્યા હતા. મહત્વનું છે કે, આ બેઠકમાં ભાજપના રાષ્ટ્રીય અધ્યક્ષ પણ હાજર હતા. 

કેન્દ્રીય ગૃહમંત્રી અમિત શાહના નિવાસસ્થાને યોજાયેલ આ બેઠક ભાજપ અને ભૂતપૂર્વ સહયોગી TDP વચ્ચે સંભવિત જોડાણની અટકળો વચ્ચે આવી છે. જેમાં આ નેતાઓએ આંધ્રપ્રદેશમાં એકસાથે આવવાની શક્યતા અને ચર્ચા કરી છે. નોંધનીય છે કે, અહીં ચંદ્રબાબુ નાયડુની પાર્ટી મુખ્ય વિપક્ષ પાર્ટી છે. આ ઉપરાંત બંનેએ તેલંગણામાં પણ સાથે આવવાની ચર્ચા કરી છે. 

બીજેપી નેતૃત્વએ તેલંગણાને તેના "મિશન સાઉથ"નું કેન્દ્ર બનાવ્યું
મહત્વનું છે કે, બીજેપી નેતૃત્વએ તેલંગણાને તેના "મિશન સાઉથ"નું કેન્દ્ર બનાવ્યું છે. આ રાજ્યમઅ સ્થાનિક સ્વરાજ્યની ચૂંટણીમાં ભાજપ પ્રવેશ કરી રહ્યું છે. સૂત્રોનું કહેવું છે કે , આંધ્રપ્રદેશના વિભાજન બાદ વિશેષ દરજ્જાની માંગને લઈ 2018માં BJPથી અલગ થયેલા ચંદ્રબાબુ નાયડુ ભાજપ સાથે ચૂંટણી સંધિ કરવા આતુર છે, પરંતુ ભાજપનાઅ રાજ્ય એકમનાઅ કેટલક નેતાઓએ તેનો વિરોધ કર્યો છે. વર્ષોથી બંને પક્ષો વચ્ચેના સંબંધોમાં તિરાડ પડી હતી. આ નેતાઓએ 2019ની લોકસભા ચૂંટણી પ્રચાર દરમિયાન વડાપ્રધાન નરેન્દ્ર મોદીની નાયડુની ટીકા અને ત્યારપછી કોંગ્રેસ પ્રત્યેની ટેનમની હૂંફને ટાંકી હતી. 

કર્ણાટક વિધાનસભા ચૂંટણીમાં મળેલી હાર બાદ BJP નેતૃત્વનું ધ્યાન દક્ષિણ ભારતના અન્ય રાજ્યો ખાસ કરીને આંધ્રપ્રદેશ અને તેલંગાણા પર કેન્દ્રિત છે. અહીં કોઈપણ ભોગે, તે કોંગ્રેસ માટે કોઈ નફાનું માર્જિન છોડવા માંગતી નથી. અગાઉ જ્યારે અમિત શાહને TDP સાથે ગઠબંધનની સંભાવના વિશે પૂછવામાં આવ્યું હતું. ત્યારે તેમણે તેનો ઇનકાર કર્યો હતો. પરંતુ ગયા વર્ષથી ચંદ્રબાબુ નાયડુ બીજેપી નેતાઓને મળવા માટે ઘણી વખત દિલ્હી ગયા છે. તેઓ PM મોદીને પણ મળ્યા હતા. નોંધનીય છે કે, TDPએ ગયા વર્ષે રાષ્ટ્રપતિની ચૂંટણી માટે NDAના ઉમેદવાર દ્રૌપદી મુર્મુને સમર્થન આપ્યું હતું.