- હવે સિંહની ડણક સંભળાશે દક્ષિણમાં
- પ્રવાસીઓને ઘર આંગણે મળશે સિંહ જોવાનો લહાવો
- દાદરા નગર હવેલીમાં પણ જોઈ શકાશે સાવજ
દાદરા નગર હવેલીના પાટનગર સેલવાસથી 12 કિલોમીટર દૂર આવેલા વાસોણા વિસ્તારમાં લાયન સફારી પાર્ક બનાવવામાં આવેલું છે. 20 હેક્ટર વિસ્તારમાં બનાવેલ આ લાયન સફારી પાર્કમાં હવે ત્રણ સિંહ જોવા મળી રહ્યા છે. ગુજરાતથી લાવવામાં આવેલા આ ત્રણ સિંહ કુદરતી જંગલ વિસ્તારમાં દેખાઈ રહ્યા છે.
વાસોણા વિસ્તારમાં બનાવાયું લાયન સફારી પાર્ક
આ સફારી પાર્કમાં હાલ અશોકા નામનો સિંહ અને ગિરજા અને મીરા નામની સિંહણ રાખવામાં આવેલી છે. દાદરા નગર હવેલી એક પ્રવાસન સ્થળ છે. અહીં જંગલ પહાડો અને નદીઓ જેવા કુદરતી વાતાવરણને માણવા મોટી સંખ્યામાં પ્રવાસીઓ દર વર્ષે આવે છે. ત્યારે પ્રવાસીઓ માટે લાયન સફારી પાર્ક જેવું એક નવું નજરાણું જોવા મળી રહ્યું છે. જેમાં હિંસક વન્યજીવને જોવા માટે વન વિભાગ દ્વારા ખાસ વ્યવસ્થા કરવામાં આવી છે. આ લાયન સફારીમાં પ્રવાસીઓ માટે ખાસ બે બસોની વ્યવસ્થા કરવામાં આવી છે. માત્ર 25 રૂપિયા જેવી નજીવી ટિકિટમાં પ્રવાસીઓ અડધો કલાક સુધી આ 20 હેક્ટરમાં બનાવવામાં આવેલ જંગલમાં સિંહના દર્શન કરી શકે છે.
20 હેક્ટર વિસ્તારમાં ફેલાયેલુ લાયન સફારી પાર્ક
મહત્વનું છે કે સંઘપ્રદેશ દાદરા નગર હવેલીમાં પ્રવાસનને વેગ આપવા માટે બનાવેલા આ લાયન સફારી પાર્ક દ્વારા લોકોને ઘર આંગણે સિંહદર્શનનો મોકો મળી રહ્યો છે. અગાઉ આ લાયન સફારીમાં માત્ર એક જ સિંહ હતો. જો કે, હવે સિંહ અને સિંહણ લાવવામાં આવ્યા છે. જેને પગલે હવે આ પંથકમાં પણ ડાલામથ્થાની ડણક સાંભળવા મળી રહી છે.20 હેક્ટર વિસ્તારમાં ફેલાયેલા લાયન સફારી પાર્કમાં હવે ગુજરાતથી લાવવામાં આવેલા ત્રણ સિંહ કુદરતી જંગલ વિસ્તારમાં વિચરણ કરી રહ્યા છે.
