BIG BREAKING / નવસારીનો ચીખલી રોડ મોતની ચિચિયારીઓથી ગુંજી ઊઠ્યો, કન્ટેનર અને કાર વચ્ચે ટક્કર થતા 4 લોકોને કાળ ભરખી ગયો, 2 ઇજાગ્રસ્ત

• નવસારીના આલીપોર બ્રિજ પર કન્ટેનર અને કાર વચ્ચે અકસ્માત
• અકસ્માતમાં કારમાં સવાર 4 લોકોના મોત
• અન્ય 2 લોકોને ગંભીર ઈજા પહોંચતા હોસ્પિટલમાં સારવાર હેઠળ
• નવસારી DySP સહિતના સ્ટાફ પણ ઘટના સ્થળે

રાજ્યમાં વધતાં જતાં અકસ્માતોના બનાવો વચ્ચે વધુ એક ઘટના સામે આવી છે. પ્રાથમિક માહિતી મુજબ નવસારીના આલીપોર બ્રિજ પર કન્ટેનર અને કાર વચ્ચે ગમખ્વાર અકસ્માત સર્જાયો છે. આ દુર્ઘટનામાં કારમાં સવાર 4 લોકોના મોત થયા છે. જોકે અન્ય બે વ્યક્તિ ગંભીર રીતે ઇજાગ્રસ્ત હોય તેઓને તાત્કાલિક સારવાર અર્થે હોસ્પિટલ ખસેડાયા હતા. 

નવસારીના આલીપોર બ્રિજ પર કન્ટેનર અને કાર વચ્ચે અકસ્માતની ઘટના સામે આવી છે. વિગતો મુજબ આજે સવારના સમયે આલીપોર બ્રિજ પર કન્ટેનર અને કાર વચ્ચે ગમખ્વાર ટક્કર થઈ હતી. આ અકસ્માત એટલો બધો ભયંકર હતો કે, ઘટના સ્થળે જ 4 વ્યક્તિના કમકમાટીભર્યા મોત નિપજ્યાં હતા. અકસ્માત સર્જાયા બાદ હાઇવે મરણચીસોથી ગુણઝી ઉઠ્યો હતો. 

4 લોકોના મોતથી માતમ 
આલીપોર બ્રિજ પર કન્ટેનર અને કાર વચ્ચે અકસ્માતની ઘટનામાં 4 લોકોના મોત થયાનું સામે આવતા પરિવારમાં માતમ છવાઈ ગયો છે. આ તરફ અન્ય 2 લોકોને ગંભીર ઈજા પહોંચતા તાત્કાલિક અસરથી સુરતની હોસ્પિટલમાં સારવાર હેઠળ ખસેડાયા છે. આ સાથે ઘટનાની જાણ થતાં જ નવસારી DySP સહિતના સ્ટાફ પણ ઘટના સ્થળે દોડી આવ્યો હતો. હાલ સમગ્ર મામલે ચીખલી પોલીસે વધુ તપાસ હાથ ધરી છે. 

અકસ્માતને કારણે થયો હતો ટ્રાફિકજામ 
આલીપોર બ્રિજ પર કન્ટેનર અને કાર વચ્ચે અકસ્માત સર્જાયા બાદ ટ્રાફિકજામના દ્રશ્યો સર્જાયા હતા. જોકે ઘટનાની જાણ થતાં જ સ્થળ પર પહોંચેલી ચિખલી પોલીસે ટ્રાફિકને હળવો કરવામાં આવ્યો હતો.