સગીરા છેડતી કેસ / છોકરીનો દુપટ્ટો ખેંચવો, સેક્સના ઈરાદાથી હાથ પકડવો દંડનીય અપરાધ- સ્પેશિયલ કોર્ટનો મોટો ચુકાદો

• મુંબઈમાં 23 વર્ષીય યુવાનની સગીરાની છેડતીનો મામલો 
• યુવાને સગીરાનો દુપટ્ટો ખેંચ્યો, ઈચ્છા વિરૃદ્ધ હાથ પકડ્યો 
• સ્પેશિયલ કોર્ટે આ ઘટનાને દંડનીય ગુનો માન્યો 
• આરોપીને ત્રણ વર્ષની જેલની સજા કરી

મુંબઈની એક સ્પેશિયલ કોર્ટે 15 વર્ષની સગીરાની છેડતી કેસમાં એવો ચુકાદો આપ્યો છે કે છોકરીનો દુપટ્ટો ખેંચવો અને સેક્સના ઈરાદાથી હાથ પકડવો પણ દંડનીય અપરાધ ગણાય છે અને તેને માટે સજા થઈ શકે છે. સગીરાની છેડતી કરવાના ગુનામાં 23 વર્ષીય યુવાનને ગુનેગાર ઠેરવતા કોર્ટે તેને 3 વર્ષની જેલની સજા કરી છે. સ્પેશિયલ કોર્ટના જસ્ટિસ પ્રિયા બાંકરે આરોપી યુવાનને ભારતીય દંડ સંહિતાની કલમ 354 (તેની નમ્રતાને ઠેસ પહોંચાડવાના ઇરાદાથી મહિલા પર હુમલો અથવા ગુનાહિત બળ) અને 506 (ગુનાહિત ધાકધમકી) તેમજ પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સિસ એક્ટ (પોક્સો એક્ટ), 2012ની કલમ 8 (જાતીય હુમલો માટે સજા) હેઠળ દોષિત ઠેરવ્યો હતો. એટલું જ નહી પરંતુ કોર્ટે આરોપીને 15,000 રૂપિયાનો દંડ ફટકાર્યો હતો. દંડની રકમ પીડિતાને આપવી પડશે. 

જાણો છેડતીની ઘટના 
સીઆરપીસીની કલમ 357(1) હેઠળ ફરિયાદી પક્ષનો કેસ એવો હતો કે સગીર યુવતી જ્યારે ઘરવખરીનો સામાન લેવા બજાર જઈ રહી હતી ત્યારે આરોપી યુવાને પીડિતાનો દુપટ્ટો ખેંચીને તેનો હાથ પકડી લીધો હતો. જ્યારે પીડિતાએ બૂમ પાડી કે તે આ ઘટનાની જાણ તેના પિતાને કરશે, ત્યારે આરોપીએ ધમકી આપી હતી કે તે તેના પિતાને મારી નાખશે. આ પછી પીડિતાના પિતાએ માહિમ પોલીસ સ્ટેશનમાં ફરિયાદ નોંધાવી હતી. સુનાવણી દરમિયાન પણ, પીડિતાએ રજૂઆત કરી હતી કે આરોપી તેના ઘરની સામે ઉભો રહેતો હતો અને તેનો પીછો કરતો હતો. જ્યારે તેના પરિવારના સભ્યોને આ વાતની જાણ થઈ તો તેમણે આરોપીનો પીછો કર્યો પરંતુ પોલીસ ફરિયાદ ન કરી.

પીડિતા સાથે અફેર ચાલતું હોવાનો આરોપીનો કોર્ટમાં દાવો 
કોર્ટમાં આરોપીએ એવો બચાવ કર્યો હતો કે તેનું અને પીડિતાનું અફેર ચાલી રહ્યું હતું. ઘટના સમયે પીડિતા સગીર હોવાથી કોર્ટે બચાવ પક્ષ સ્વીકારવાનો ઇનકાર કર્યો હતો. કોર્ટે તારણ કાઢ્યું હતું કે, આરોપીએ ઘટના સ્થળે હાજર રહીને સગીર પીડિત યુવતી સાથે જાતીય ઇરાદાથી ગુનો કર્યો હતો અને પીડિત યુવતી સાથે શારીરિક સંબંધ બાંધ્યો હતો અને આ રીતે જાતીય શોષણનો ગુનો કર્યો હતો. કોર્ટે કહ્યું કે પુરાવા દર્શાવે છે કે આરોપીએ ઘરમાં ઘૂસીને પીડિતાના પિતાને માર મારવાની ધમકી આપી હતી. આ ગુનાહિત ધાકધમકી સમાન છે અને ફરિયાદી પક્ષે આઈપીસીની કલમ 506 હેઠળ ગુનો સાબિત કર્યો છે.