- રામ કથાવાચક મોરારી બાપૂએ આપ્યું નિવેદન
- કહ્યું 'જય શ્રી રામ એક પવિત્ર ઉદ્ઘોષ છે'
- રામનાં નામે ચાલતી રાજનીતિ અંગે કરી આ વાત
બીજા ધર્મનાં લોકોને જબરદસ્તી 'જય શ્રી રામ'ના નારાઓ બોલાવાનાં મામલે રામ કથાવાચક મોરારી બાપૂએ કહ્યું કે નારાઓથી કંઈ નથી થતું, જે થાય છે એ ઉન્માદથી થાય છે. વર્ષોથી આપણે ત્યાં જય સિયારામ બોલવામાં આવી રહ્યું છે અને લોકો તેને મંત્ર સમજે છે પરંતુ જય શ્રી રામ એક પવિત્ર ઉદ્ઘોષ છે. તેનો શુદ્ધ ઉપયોગ થાય તો સારું છે.
'રામને સાધન બનાવવામાં આવી રહ્યું છે'
ભગવાન રામ અને હનુમાનજી પર પૂછવામાં આવેલા સવાલનો જવાબ આપતાં મોરારી બાપૂએ કહ્યું કે, 'રામ આત્મ તત્વ છે અને હનુમાનજી વાયુ તત્વ છે. બંને તત્વોની માણસોને જરૂર હોય છે. આત્મા પણ જરૂરી છે અને શ્વાસ લેવા માટે વાયુ પણ જરૂરી છે. પરંતુ હું સ્પષ્ટપણે કહેવા ઈચ્છું છું કે તે સાધ્ય છે, સાધન નથી. રામને સાધન બનાવવામાં આવી રહ્યું છે.'
'સત્ય હંમેશા સત્ય રહેશે'
તેમણે કહ્યું કે હું રામચરિત માનસ ગ્રંથને લઈને નિકળ્યો છું, તે સંવાદનું શાસ્ત્ર છે. તેમાં વિવાદો ઉમેરવું યોગ્ય નથી. ગૌરીશંકર શિખરને એક બરફનો નાનકડો ટૂકડો પણ પાડી શકતો નથી, તે ટૂકડો પોતે પડી જશે. આ શાશ્વત સત્ય છે. તેની આસપાસ ભ્રમ પેદા કરવામાં આવી રહ્યો છે પરંતુ સત્ય હંમેશા સત્ય રહેશે.
'રામનો આ રીતે ઉપયોગ ન કરવો જોઈએ'
મોરારી બાપૂએ કહ્યું કે,' હનુમાનજી સીતાજીની શોધમાં લંકામાં મંદિરે-મંદિરે ગયાં હતાં પરંતુ આજે કેટલાક લોકો સત્તાની શોધ માટે મંદિર જાયે છે.' રામનાં નામ પર રાજનીતિ અને વોટ માંગવાનાં સવાલ પર બાપૂએ કહ્યું કે,' રામનો આ રીતે ઉપયોગ ન કરવો જોઈએ. રામનાં નામનો ઉપયોગ પોતાના હિત માટે ન કરવો જોઈએ. હું જોઈ રહ્યો છું કે કેટલાક ક્ષેત્ર એવા છે જે રામનો ઉપયોગ કરીને કંઈક મેળવવા ઈચ્છે છે, જે યોગ્ય નથી.'
