- આખરે મુંબઈમાં ચોમાસાનું આગમન
- મહારાષ્ટ્રના અનેક જિલ્લામાં મેઘમહેર
- ચાર અઠવાડિયાંમાં દેશભરમાં ચોમાસાંનું આગમન થઇ જશેઃ હવામાન વિભાગ
આજથી મુંબઈમાં ચોમાસાનું આગમન થઇ ચૂક્યું છે. દેશના હવામાન વિભાગે મુંબઈમાં ચોમાસું ૨૪મી સુધીમાં પહોંચે તેવી આગાહી કરી હતી.જે આજે સાચી પડશે. આજે અનેક વિસ્તારોમાં હળવાથી મધ્યમ વરસાદની આગાહી છે. બીજી તરફ કોંકણ બાદ આજે મહારાષ્ટ્રના કેટલાક ભાગોમાં ચોમાસાનું આગમન થઇ પણ ચૂક્યું છે.
મહારાષ્ટ્રનાં અનેક જીલ્લામાં મેઘમહેર
હવે ચોમાસું વધુ તીવ્ર બને તેવી શક્યતા છે. આગામી બે દિવસમાં ચોમાસું રાજ્યમાં પ્રવેશ કરશે. કેરળમાં મોનસુનનાં મોડાં આગમનને કારણે સમગ્ર દેશમાં વિલંબ થયો છે. જોકે ચોમાસાએ હવે વેગ પકડ્યો છે. સામાન્ય રીતે ચોમાસું દર વર્ષે ૭ જૂને મહારાષ્ટ્રમાં પ્રવેશે છે પરંતુ આ વર્ષે ચક્રવાત બિપોરજોયે ચોમાસાની ગતિને અટકાવી દીધી હતી. હવે ચોમાસું ફરી સક્રિય થયું છે અને આગામી બે દિવસમાં ચોમાસું મહારાષ્ટ્ર અને આગામી ચાર અઠવાડિયાંમાં દેશભરમાં ચોમાસાંનું આગમન થઇ ચૂક્યું હશે તેવી હવામાન વિભાગની આગાહી છે .
દક્ષિણ-પશ્ચિમમાં ચોમાસાની સિસ્ટમ સક્રિય થઇ જશે
આગામી ત્રણ ચાર દિવસ દરમિયાન કર્ણાટક અને તેલંગાણાના અન્ય ભાગો, દક્ષિણ-પશ્ચિમમાં ચોમાસાની સિસ્ટમ સક્રિય થઇ જશે. હવે કેરળમાંથી ચોમાસાએ આગળ વધવાનું શરૂ કર્યું છે અને મોટાભાગના વિસ્તારોને આવરી લીધા છે. ઓડિશા, છત્તીસગઢ, ઝારખંડ, બિહાર અને ઉત્તર પ્રદેશના ભાગોમાં પણ ચોમાસું પહોંચી જશે. વિદર્ભના અનેક જિલ્લામાં આજે ભારે વરસાદ પડ્યો છે.
ગરમીમાંથી લોકોએ રાહત મેળવી
ભીષણ ગરમીનો સામનો કરી રહેલા લોકોને ચોમાસાના આગમનથી રાહત મળી રહી છે. વાદળો અને વરસાદને કારણે તાપમાનમાં સતત ઘટાડો જોવા મળી રહ્યો છે. આગામી પાંચ દિવસ દરમિયાન દેશના પશ્ચિમ, મધ્ય અને પૂર્વ ભાગમાં તાપમાનમાં ત્રણથી પાંચ ડિગ્રીનો ઘટાડો થવાનું અનુમાન છે. આ દરમિયાન દેશના મોટા ભાગના વિસ્તારમાં છૂટા છવાયાથી લઈને ભારે વરસાદની શક્યતા છે. હવામાન વિભાગ અનુસાર દેશમાંથી હીટવેવ ખતમ થઈ ગઈ છે. ભારતમાં આ વર્ષે જોરદાર ગરમી પડી છે.
