કાર્યવાહી / અમરેલીમાં ખનીજ ચોરોને રાડ પડાવી દીધી મામલતદારે, 10 ટ્રેકટર- 2 જેસીબી કરી લીધા જપ્ત

• અમરેલીમાં ખનીજ ચોરો બેફામ
• વડીયા મામલતદારે કરી કાર્યવાહી
• 10 ટ્રેકટર, 2 જેસીબી મશીન જપ્ત કર્યા

અમરેલી જિલ્લામાં ખનીજ ચોરી કરતા તત્વો બેફામ બન્યા છે. વડીયા મામલતદારે બાતમી મળી હતી કે, ભુંખલી સાંથળી ગામે બિન અધિકૃત રીતે જમીનમાંથી કેટલાક લોકો માટી ઉઠાવે છે જેથી દરોડો પાડી મામલતદારે 10 ટ્રેકટરો અને 2 જે.સી.બી. ઘટના સ્થળેથી ઝપ્ત કર્યા છે. સ્થળ તપાસ દરમ્યાન મામલતદારને જાણવા મળ્યું કે સુજલામ સુફલામ્ યોજનાની મંજૂરી વાળી જગ્યાએ સ્થળ ફેરફાર કરીને માટીની ચોરી કરી રહ્યા છે. વડીયા પોલીસને સોંપીને ખનીજ વિભાગને રિપોર્ટ કરવાની કાર્યવાહી મામલતદાર પી.એમ મહેતાએ હાથ ધરી હતી.

વડીયા મામલતદારના દરોડા
અમરેલીમાં ખનીજ ચોરી કરતા તત્વો બેફામ બન્યા હોય તેમ હાલ સુજલામ સુફલામ્ યોજના તળે તળાવો ઉંડા ઉતારીને જળ સંગ્રહ કરવાના સરકારના અભિગમમાં ખનીજ ચોરો અવનવી તરકીબો અજમાવીને ખનીજ ચોરીને અંજામ આપતા હોય છે ત્યારે વડીયા મામલતદારની બાજ નજરમાં આ ખનીજ ચોરી થતી હોવાની મળેલી પૂર્વ બાતમીને આધારે વડીયાના ભુંખલી સાંથળી ગામે બિન અધિકૃત રીતે જમીન માંથી માટી ઉઠવતા હોવાની બાતમીને આધારે દરોડો પાડીને મામલતદારે 10 ટ્રેકટરો અને 2 જે.સી.બીને ઘટના સ્થળે જઈને જડપી લીધા હતા. 

10 ટ્રેકટર જપ્ત
સુજલામ સુફલામ્ યોજનાની મંજૂરી વાળી જગ્યાએ સ્થળ ફેરફાર કરીને માટી ચોરી કરતા તત્વો સામે વડીયા મામલતદાર લાલ આંખ કરતા ખનીજ ચોરોમાં ફફડાટ ફેલાઈ ગયો હતો. 10 ટ્રેકટર માટી ભરેલા જ વડીયા પોલીસને સોંપીને ખનીજ વિભાગને વધુ તપાસ સોંપી છે.