- વિદેશથી ગૌતમ અદાણી માટે આવ્યાં સારા સમાચાર
- મોરેશિયસ સરકારે આપી ક્લિનચીટ
- 38 કંપનીઓ અને 11 ગ્રૂપના પૈસામાં કોઈ ગેરરીતિ થઈ નથી
હિન્ડનબર્ગ રિસર્ચના રિપોર્ટથી સતત મુશ્કેલીમાં મુકાઈ રહેલા અદાણી જૂથને છેલ્લા એક પખવાડિયામાં પહેલાં રાહતના સમાચાર મળ્યા છે. અમેરિકન શોર્ટ સેલર કંપની હિન્ડનબર્ગ રિસર્ચે અદાણી જૂથ પર રોકાણકારો સાથે છેતરપિંડી અને કંપનીઓના કામકાજમાં ગેરરીતિ આચરવાનો આરોપ મૂક્યો છે ત્યારે મોરેશિયસના રેગ્યુલેટર ફાઈનાન્સિયલ કમિશને અદાણી જૂથને ક્લિન ચીટ આપી છે.
38 કંપનીઓ અને 11 ગ્રૂપના પૈસામાં કોઈ ગેરરીતિ થઈ નથી
મોરેશિયસ રેગ્યુલેટર ફાઈનાન્સિયલ સર્વિસ કમિશન (એફએસસી)એ કહ્યું છે કે તેને અદાણી જૂથ સાથે સંકળાયેલી 38 કંપનીઓ અને 11 ગ્રૂપના ફંડોમાં કાયદાનો કોઈ ભંગ થયો હોવાનું જણાયું નથી. હિન્ડનબર્ગે 24 જાન્યુઆરીએ તેના એક રિપોર્ટમાં દાવો કર્યો છે કે અબજોપતિ ગૌતમ અદાણીએ તેમની લિસ્ટેડ કંપનીઓના શૅરોના ભાવમાં હેરાફેરી કરવા માટે મોરેશિયસ સ્થિત શૅલ કંપનીઓનો ઉપયોગ કર્યો છે.
હિંડનબર્ગના રિપોર્ટ બાદ મોરિશિયસમાં શરુ થઈ તપાસ પણ કંઈ વાંધાજનક ન મળ્યું
હિંડનબર્ગના રિપોર્ટ બાદ મોરિશિયસમાં પણ ગૌતમ અદાણી સામેની કંપનીઓની તપાસ ચાલુ કરવામાં આવી હતી પરંતુ તપાસને અંતે સરકારને ગૌતમ અદાણીની કંપનીઓ સામે કંઈ વાંધાજનક ન જણાતાં તેને ક્લિનચીટ આપી દેવાઈ હતી. ફાઈનાન્સિયલ સર્વિસ કમીશનના વડા એક્ઝિક્યુટિવ ઓફિસર ધનેશ્વરનાથ વિકાસ ઠાકુરે જણાવ્યું કે, મોરેશિયસમાં અદાણી જૂથ સાથે સંકળાયેલા બધા જ એકમોના પ્રારંભિક આકલન અને એકત્ર કરાયેલી માહિતીના આધારે અત્યાર સુધી અમને કાયદા અથવા નિયમો તોડવાના કોઈ પુરાવા મળ્યા નથી.
મોરેશિયસની નકલી કંપનીઓ દ્વારા કાળા નાણાને ધોળા કરવાનો ખેલ
ભારતીય કંપનીઓ પર ટેક્સ ચોરી માટે મોરેશિયસ સ્થિત નકલી કંપનીઓનો ઉપયોગ કરવાના આરોપો લાંબા સમયથી લાગતા રહ્યા છે. બોલીવૂડ અભિનેતા અમિતાભ બચ્ચન, ઐશ્વર્યા રાય બચ્ચન સહિત અનેક ઉદ્યોગપતિઓ અને કંપનીઓ પર મોરેશિયસ સ્થિત કંપનીઓ મારફત ભારતમાં કાળા નાણાંને ધોળુ કરવાના આક્ષેપો લાગ્યાં હતા.
શું છે હિંડનબર્ગ રિપોર્ટ
અમેરિકન શોર્ટ સેલર કંપની હિંડનબર્ગ રિસર્ચે અદાણી જૂથ પર રોકાણકારો સાથે છેતરપિંડી અને કંપનીઓના કામકાજમાં ગેરરીતિ આચરવાનો આરોપ મૂકતા હડકંપ મચ્યો હતો. પરંતુ હિંડનબર્ગના રિપોર્ટ બાદ પહેલી વાર ગૌતમ અદાણીને વિદેશ તરફથી મોટી રાહત મળી છે.
અદાણી એન્ટરપ્રાઇઝના ફાઈનાન્સિયલ રિઝલ્ટ બાદ શેરબજારમાં તેજી
મંગળવારે સપ્તાહના બીજા કારોબારી દિવસે શેરબજારમાં જોરદાર તેજી જોવા મળી હતી. ગૌતમ અદાણીની આગેવાની હેઠળની અદાણી એન્ટરપ્રાઇઝે તેના Q3ના પરિણામો જાહેર કર્યા બાદ બજારમાં તેજી આવી હતી અને છેલ્લે સુધી ચાલુ રહી હતી. કારોબારના અંતે બોમ્બે સ્ટોક એક્સચેંજના 30 શેરો વાળા ઈન્ડેક્સ સેન્સેક્સ 600 અંક ઉછળીને 61,032.26 ના સ્તર પર બંધ થયા છે. તે જ સમયે, નેશનલ સ્ટોક એક્સચેંજનો નિફ્ટી ઇન્ડેક્સ 159 પોઇન્ટના વધારા સાથે 17,929.85 ના સ્તરે બંધ રહ્યો હતો.
