- મધ્યપ્રદેશના ઈન્દોરની અજીબ ઘટના
- શખ્સને 40,000 પાનામાં મળ્યો RTIનો જવાબ
- ગાડી ભરીને ઘેર લાવવા પડ્યાં કાગળિયા
મધ્ય પ્રદેશના ઈન્દોરમાં ધર્મેન્દ્ર શુક્લા નામના એક શખ્સને આરટીઆઈ અરજીના જવાબમાં 40,000 પાનાનો જવાબ મળતાં તેઓ ચોંકી ઉઠ્યાં હતા. હકીકતમાં શુક્લાએ કોરોના સંબંધિત એક માહિતી મેળવવા આરટીઆઈ અરજી કરી હતી જેના જવાબમાં તેમને 40,000 પાનાનો જવાબ મળ્યો હતો. આ જોઈને તેઓ ચોંકી ઉઠ્યાં હતા. સામાન્ય રીતે કોઈ વાતનો જવાબ આપવો હોય કે એક બે વધારેમાં વધારે બે કાગળિયા ઘણા કહેવાય પરંતુ અહીં તો એક-બે કે દશ નહીં પરંતુ 40,000 પાનાનો જવાબ મળ્યો હતો જે કોઈને પણ નવાઈ કરી મૂકે તેમ છે.
40,000 પાનાના પૈસા ન લવાયા
સામાન્ય રીતે આરટીઆઈ અરજી કરનાર જેટલા પેજમાં જવાબ અપાયો હોય તેટલા પેજના પાના દીઠ બે રુપિયા ચુકવવા પડે છે પરંતુ શુક્લાને કોઈ પૈસા ચુકવવા પડ્યાં નહોતા કારણ કે તેમની અરજીનો નિકાલ એક મહિનાની અંદર આવ્યો નહોતો. શુક્લાએ આજે જણાવ્યું હતું કે, "મેં ઈન્દોરના મુખ્ય તબીબી અને આરોગ્ય અધિકારી (સીએમએચઓ) સમક્ષ એક આરટીઆઈ અરજી રજૂ કરી હતી, જેમાં કોવિડ -19 રોગચાળાના સમયગાળા દરમિયાન દવાઓ, ઉપકરણો અને આનુષંગિક સામગ્રીની ખરીદી સાથે સંકળાયેલા ટેન્ડરો અને બિલ ચુકવણીની વિગતો માંગવામાં આવી હતી. એક મહિનામાં માહિતી પૂરી ન પડાતાં તેમણએ પ્રથમ અપીલ અધિકારી ડો.શરદ ગુપ્તાનો સંપર્ક સાધ્યો હતો, જેમણે આ અરજી સ્વીકારી હતી અને તેમને આ માહિતી વિનામૂલ્યે આપવામાં આવે એવો નિર્દેશ આપ્યો હતો.
આખી ગાડી ભરાઈ જાય તેટલા કાગળિયા મળ્યાં
શુક્લાએ કહ્યું કે દસ્તાવેજો પાછા લાવવા માટે હું મારી એસયુવી લઈ ગયો અને આખું વાહન ભરાઈ ગયું. માત્ર ડ્રાઇવરની સીટ જ મુક્ત રહી હતી.
આ અંગે રાજ્યના આરોગ્ય વિભાગના અપીલ અધિકારી અને પ્રાદેશિક સંયુક્ત નિયામક ડો.શરદ ગુપ્તાનો સંપર્ક સાધવામાં આવતા તેમણે જણાવ્યું હતું કે, તેમણે આ માહિતી વિનામૂલ્યે આપવાનો આદેશ આપ્યો છે.
સરકારને થયું 80,000નું નુકશાન
ડો.ગુપ્તાએ જણાવ્યું હતું કે તેમણે સીએમએચઓને તે કર્મચારીઓ સામે યોગ્ય કાર્યવાહી કરવા નિર્દેશ આપ્યો હતો કે જેમના કારણે સરકારી તિજોરીને રૂ. 80,000નું નુકસાન થયું હતું કારણ કે માહિતી સમયસર આપવામાં આવી ન હતી.
