- લંડનમાંથી ચોરાયેલ લગ્જરી કાર પાકિસ્તાનના કરાચી શહેરમાં મળી આવી
- કારની કિંમત 300,000 ડોલર એટલે કે લગભગ 2 કરોડ જેટલી છે
- પાકિસ્તાનના અધિકારીએ પાડયા દરોડા
બ્રિટિશ રાજધાની લંડનમાંથી ચોરાયેલ એક ખૂબ જ લગ્જરી કાર અધિકારીઓને પાકિસ્તાનના કરાચી શહેરમાં મળી આવી છે. લંડનથી ચોરી કરીને Bentley Mulsanneને કરાચી લાવવામાં આવી હતી. આ વાતની કરાચી કસ્ટમ્સના અધિકારીઓએ પુષ્ટિ કરી છે કે યુકેની ઈન્ટેલિજન્સ એજન્સીએ પાકિસ્તાના અધિકારીઓને સૂચના આપી હતી કે ચોરી કરીને ગાડી કરાચીના ડિફેન્સ હાઉસિંગ ઓથોરિટી (DHA) વિસ્તારમાં એક મકાનમાં રાખવામાં આવી હતી. હાલ પાકિસ્તાનના કસ્ટમ વિભાગે મકાનના માલિકને કસ્ટડીમાં લઈ આ મામલે તપાસ શરૂ કરી છે.
આટલી છે કિંમત
Bentley Mulsanne એ ઘણી મોંઘી કારમાંથી એક છે અને તેની કિંમત 300,000 ડોલર એટલે કે લગભગ 2 કરોડ જેટલી છે અને આ કાર બ્રાન્ડની સૌથી મોટી અને સૌથી મોંઘી સેડાન છે. પાકિસ્તાની મીડિયા અનુસાર બ્રિટિશ ઈન્ટેલિજન્સ એજન્સીએ વિભાગને એક ગ્રે Bentley Mulsanne-V8 ઓટોમેટિક, વીઆઈએન નંબર SCBBA63Y7FC001375, એન્જિન નંબર CKB304693 વિશે માહિતી આપી હતી. સાથે એમ પણ જણાવ્યું હતું કે કરાચીના DHA વિસ્તારમાં પાર્ક કરીને તેને રાખવામાં આવી છે.
પાકિસ્તાનના અધિકારીએ પાડયા દરોડા
બ્રિટિશ ઈન્ટેલિજન્સ એજન્સીની આ માહિતીની પુષ્ટિ કરવા માટે પાકિસ્તાનના અધિકારીઓએ એ ઘર પર દરોડા પાડયા હતા અને એ જ ઘરમાંથી ગાડી મળી આવતા મકાન માલિક સાથે પૂછપરછ કરી હતી. એ સમયે મકાન માલિકે જણાવ્યું હતું કે 'અન્ય વ્યક્તિએ તેને આ કાર વહેંચી હતી. હાલ આ ખબર ટ્વિટર પર ઘણી વાયરલ થઇ રહી છે. દરેક લોકોને સવાલ એ છે કે આ કાર પાકિસ્તાન કેવી રીતે પહોંચી?
કાર પાકિસ્તાન કેવી રીતે પહોંચી?
જણાવી દઈએ કે કારની ચાવી ન હોવાના કારણે પાકિસ્તાની અધિકારીઓએ કાર ઉપાડી અને પોતાની સાથે લઈ ગયા હતા. મળતી માહિતી મુજબ, થોડા અઠવાડિયા પહેલા લંડનમાંથી એ કાર ચોરી થઈ હતી અને ચોરી કરનાર ગેંગના લોકોએ પૂર્વ યુરોપીય દેશના ટોચના રાજદ્વારીના દસ્તાવેજોનો ઉપયોગ કરીને એ કારને પાકિસ્તાન લાવ્યા હતા. એવું કહેવામાં આવ્યું છે કે રાજદ્વારીને હવે તેમની સરકાર દ્વારા પાછા બોલાવવામાં આવ્યા છે. અધિકારીઓએ હાલ મકાનમાલિક અને કાર વેચનાર દલાલને પૂરતા દસ્તાવેજો ન આપવા બદલ કસ્ટડીમાં લીધા છે.
