- કચ્છમાં અંધશ્રદ્ધામાં બાળકીને ડામ દેવાનો મામલો
- ડામ દેવાયેલ બાળકીનું સારવાર દરમિયાન મૃત્યુ
- 11 વર્ષની બાળકીને તાવ અને કમળો થયો હતો
આધુનિક સમયમાં આજે પણ અંધશ્રદ્ધાનું અસ્તિત્વ ઘણી જગ્યાએ જોવા મળે છે. અંધશ્રદ્ધાના અનેક કિસ્સાઓ છાશવારે સામે આવતા રહે છે. કચ્છના ગાંધીધામમાં અંધશ્રદ્ધાનો ચોંકાવનારો બનાવ સામે આવ્યો છે. ગાંધીધામના એરપોર્ટ ચોકડી નજીકના અંબાજી ચાર રસ્તા પાસે રહેતી 11 વર્ષની બાળકીને તાવ અને કમળો આવ્યો હતો. જે બાદ પરિવારે બાળકીને હોસ્પિટલ ભેગી કરવાને બદલે અંધશ્રદ્ધા તરફ દોરાઈ ભચાઉ ભુવા પાસે લઈ ગયા હતા. જ્યાં પાડોશીએ અગરબત્તી વડે ડામ દેતા બાળકીની હાલત ગંભીર થઇ હતી આથી તેણીને તાત્કાલીક સારવાર માટે રાજકોટ સિવિલ હોસ્પિટલમાં ખસેડવામાં હતી. ત્યારે આજે 2 દિવસની ટુંકી સારવાર બાદ દીકરીએ તરફડીને જીવ ગુમાવ્યો છે. મૃત્યુનુ સાચું કારણ જાણવા મૃતદેહનું ફોરેન્સિક પોસ્ટમોર્ટમ કરાયું છે.
દીકરીને સારું થઇ જશે તેમ કહી શખ્સે આપ્યા ડામ
કચ્છના ગાંધીધામમાં પરિવાર સાથે રહેતી જિજ્ઞા રમેશભાઈ મોરવાડિયા નામની બાળકીને 12 દિવસ પહેલા બીમાર પડતા તેમને તાવ આવતો હતો આ દરમિયાન તેણીને કમળાની અસર હોવાનું જાણવા મળ્યું હતું. જેથી પરિવાર બાળકીને દવા લેવા હોસ્પિટલમાં લઈ જવાને બદલે બાળકીના દાદી અને પરિવારજનો તેણીને સારવાર માટે ભચાઉ કમળો ઉતરાવવા લઈ ગયા હતા અને ત્યાં તેમને સારું થઈ જવાના બહાના હેઠળ શખ્સે શરીરે ડામ આપ્યા હતા ત્યારબાદ તેમને ઘરે લઈ ગયા હતા. થોડા દિવસ બાદ બાળકીને શરીરે દુખાવો ઉપાડતા તેણીને સારવાર માટે રાજકોટ સિવિલ હોસ્પિટલમાં ખસેડવામાં આવી હતી.આ ઘટના અંગે હોસ્પિટલ ચોકીના સ્ટાફે સામખીયાળી પોલીસમાં જાણ કરી હતી.
અંધશ્રદ્ધાને ક્યારે ડામશો?
ઉલ્લેખનીય છે કે,આજે પણ અંધશ્રદ્ધામાં મગ્ન બનેલા અમુક લોકો પોતાનાં બાળકો બીમાર પડે ત્યારે ડોકટર પાસે લઈ જવાને બદલે ભૂવા કે ઊંટવૈદો પાસે લઈ જાય છે. આજે પણ ઘણાં લોકો ડામ આપવાથી તેમનાં માંદા બાળકો સાજાં થઇ જશે એવી અંધશ્રદ્ધામાં રહે છે. પરંતુ આમાં બાળક વધુ પીડાય છે અને છેલ્લી ઘડીએ મા-બાપ બાળકને લઇને દવાખાને જ પહોંચે છે. અને બાળકને ખોવાનો વારો આવે છે કારણ કે સારવાર મોડી મળે છે અને ઉપરથી ધગધગતા ડામ બાળકીને માંદગીમાંથી ઊભી કરવાને બદલે તેણે વધુ તકલીફ આપે છે.
