સર્વે / ઇન્ટરનેટનો વધુ ઉપયોગ કરશો તો થઇ જશો આ બિમારીનો શિકાર

ઇન્ટરનેટે આપણા જીવનને સરળ બનાવી દીધું છે તે વાત સાચી, પરંતુ તેનો વધુ પડતો ઉપયોગ પણ નુકસાન કરે છે. હવે આ વાત વૈજ્ઞાનિકોએ પણ સાબિત કરી દીધી છે. 

ઓસ્ટ્રેલિયામાં કરાયેલા એક અભ્યાસમાં એવો દાવો કરાયો છે કે ઇન્ટરનેટનો હદથી વધુ ઉપયોગ આપણા મગજમાં બદલાવ લાવે છે. જે આપણા ધ્યાન, યાદશક્તિ અને સામાજિક વ્યવહારને પ્રભાવિત કરે છે.

વર્લ્ડ સાઇકિયાટ્રી જર્નલમાં પ્રકાશિત થયેલા અભ્યાસમાં દાવો કરાયો છે કે ઇન્ટરનેટ આપણી ચેતનાના એક વિશિષ્ટ વિસ્તારમાં સતતઅને તેજ પરિવર્તન લાવે છે. જે મગજમાં આવતા બદલાવનું કારણ બને છે. હવે સંશોધકોએ એ શોધ કરી છે કે આપણી ચેતનાની પ્રક્રિયાને બદલવામાં ઇન્ટરનેટ કેવી રીતે ભુમિકા ભજવે છે. 

ઓસ્ટ્રેલિયાની વેસ્ટર્ન સિડની યુનિવર્સીટિના જોસેફ ફર્થે જણાવ્યુ કે આ અભ્યાસમાં સામે આવેલી મુખ્ય બાબત એ છે કે ઇન્ટરનેટના વધુ પડતા ઉપયોગથી મગજના ઘણા ભાગ પ્રભાવિત થાય છે.ઓનલાઇન દુનિયા તથ્યો અ સુચનાઓનો બહુ મોટો ભંડાર છે. તેને મેળવવા માટે વધુ મહેનત કરવી પડતી નથી. ઇન્ટરનેટની તમામ સુચનાઓ અને સંકેત આપણા ધ્યાનને સતત વિભાજિત કરે છે. એક કામ પર એકાગ્રતા બનાવી રાખવા માટે આપણી ક્ષમતાને પણ તે ભટકાવી દે છે. 

વિશ્વ સ્વાસ્થ્ય સંગઠન 2018ના દિશા નિર્દેશો અનુસાર બેથી પાંચ વર્ષના બાળકોએ દિવસમાં માત્ર એક અથવા તેથી પણ ઓછા કલાક સ્ક્રીનના સંપર્કમાં રહેવું જોઇએ. પરિવારજનોએ પણ એ વાતનું ધ્યાન રાખવું કે બાળકો વધુ સમય ડિજિટલ પ્લેટફોર્મ પર ન વિતાવે.