કર્ણાટકની કોંગ્રેસ સરકારને મોટો ઝટકો લાગ્યો છે. કર્ણાટક સરકાર દ્વારા લાવવામાં આવેલ 'હિન્દુ ધાર્મિક સંસ્થાઓ અને ચેરિટેબલ એન્ડોમેન્ટ્સ (એમેન્ડમેન્ટ) બિલ' વિધાન પરિષદ દ્વારા પસાર થઈ શક્યું નથી. વિરોધ પક્ષો ભાજપ અને જેડીએસે આનો વિરોધ કર્યો હતો. વિપક્ષ પાસે વિધાન પરિષદમાં બહુમતી છે, તેથી વિપક્ષના કારણે આ બિલ વિધાન પરિષદમાં પસાર થઈ શક્યું નથી. મંદિર બિલ ગયા અઠવાડિયે જ વિધાનસભા દ્વારા પસાર કરવામાં આવ્યું હતું અને શુક્રવારે વિધાન પરિષદમાં રજૂ કરવામાં આવ્યું હતું.
બિલમાં શું છે જોગવાઈઓ
બિલમાં એવી જોગવાઈ છે કે રાજ્યના મંદિરો જેની વાર્ષિક આવક 10 લાખ રૂપિયાથી લઈને 1 કરોડ રૂપિયા સુધીની હોય છે તેના પર પાંચ ટકા ટેક્સ લગાવવાની જોગવાઈ છે. જે મંદિરોની વાર્ષિક આવક 1 કરોડ રૂપિયાથી વધુ છે તેના પર 10 ટકા ટેક્સ લગાવવાની જોગવાઈ છે. મંદિરોની કમાણીમાંથી મળતું ભંડોળ એક સામાન્ય પૂલ ફંડમાં રાખવાની જોગવાઈ છે, જેનું સંચાલન રાજ્ય ધાર્મિક પરિષદ દ્વારા કરવામાં આવશે. બિલમાં કહેવામાં આવ્યું છે કે આ ભંડોળનો ઉપયોગ રાજ્યના 'C' શ્રેણીના મંદિરોના પૂજારીઓના કલ્યાણ માટે કરવામાં આવશે, જેમની વાર્ષિક આવક પાંચ લાખથી ઓછી છે.
વધુ વાંચો : દેશના આ રાજ્યમાં મુસ્લિમ મેરેજ એન્ડ ડિવોર્સ એક્ટ ખતમ, કહ્યું 'હવે બાળ લગ્ન અટકશે'
વિપક્ષનો આરોપ
ભાજપ અને જેડીએસનો આરોપ છે કે સરકાર મંદિરો પર ટેક્સ લગાવીને પોતાની ખાલી તિજોરી ભરવા માંગે છે. વિપક્ષના મતે સરકારે ઓછી કમાણી કરતા મંદિરના પૂજારીઓના કલ્યાણ માટે બજેટમાં અલગ ફંડની જોગવાઈ કરવી જોઈએ. કોંગ્રેસ સરકારનું કહેવું છે કે વર્ષ 2011માં ભાજપ સરકાર પણ આવું જ એક બિલ લાવી હતી, જેમાં મંદિરોની 5 થી 10 લાખ રૂપિયાની વાર્ષિક આવક પર પાંચ ટકા ટેક્સ લગાવવાની જોગવાઈ હતી. સરકારની દલીલ છે કે વર્તમાન બિલમાં ઓછો ટેક્સ લાદવામાં આવ્યો છે. વર્તમાન બિલમાં એવી જોગવાઈઓ પણ છે કે સરકાર દ્વારા નિયંત્રિત મંદિરોની સમિતિના અધ્યક્ષ સરકાર નિયુક્ત કરશે. વિપક્ષે પણ આનો વિરોધ કર્યો હતો. વિપક્ષના વિરોધ પર સરકારના પ્રધાન રામલિંગા રેડ્ડીએ દાવો કર્યો હતો કે સરકાર મંદિર સમિતિના અધ્યક્ષની નિમણૂકમાં દખલ નહીં કરે અને મંદિરોમાંથી એકત્ર કરાયેલા ટેક્સને ઘટાડવા પર પણ વિચાર કરશે. જોકે, વિપક્ષ આનાથી સંતુષ્ટ નહોતા અને બિલ પસાર થઈ શક્યું ન હતું.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલને ફોલો કરવા આ લિંક પર ક્લિક કરો
_6.jpg)
