રાજનીતિ / MPમાંથી કમલનાથની વિદાય નિશ્ચિત! ખડગેએ આપ્યા આ સંકેત, આખરે MPમાં કેમ કોંગ્રેસે કરવો પડ્યો હારનો સામનો?

• ત્રણ રાજ્યમાં કોંગ્રેસની હાર બાદ પાર્ટીની અંદર મનોમંથન શરૂ થઈ ગયું છે
• પાર્ટી હવે રાજ્યોમાં નવા નેતૃત્વને લાવવાની રણનીતિ પર કામ કરી શકે છે
• મધ્યપ્રદેશમાં હાર બાદ કમલનાથ પાર્ટી નેતાઓના નિશાના પર આવી ગયા છે 

મધ્યપ્રદેશ, રાજસ્થાન અને છત્તીસગઢમાં ભાજપની જીત અને કોંગ્રેસની હાર બાદ કોંગ્રેસની અંદર મનોમંથન શરૂ થઈ ગયું છે. આ વખતે પાર્ટી હાર બાદ તેની પાછળ કોણ જવાબદાર અને એ રાજ્યોમાં નવા નેતૃત્વને લાવવાની રણનીતિ પર કામ કરી શકે છે. હવે એ વાત તો જાણીતી છે કે કોંગ્રેસ પાર્ટીને સૌથી મોટો ફટકો મધ્યપ્રદેશથી પડ્યો છે. હાર બાદ દિલ્હી આવેલા અને ચૂંટણીમાં પાર્ટીનો ચહેરો બનેલા પ્રદેશ અધ્યક્ષ કમલનાથે મંગળવારે મોડી સાંજે કોંગ્રેસ અધ્યક્ષ મલ્લિકાર્જુન ખડગે સાથે મુલાકાત કરી હતી. 

મધ્યપ્રદેશ વિધાનસભા ચૂંટણી 2023માં કોંગ્રેસને કારમી હાર બાદ પ્રદેશ અધ્યક્ષ અને દિગ્ગજ નેતા કમલનાથ પાર્ટી નેતાઓના નિશાના પર આવી ગયા છે. સાથે જ રાષ્ટ્રીય અધ્યક્ષ મલ્લિકાર્જુન ખડગેએ પણ એવા સંકેત આપ્યા કે પાર્ટીના ઘણા નેતાઓ નથી ઈચ્છતા કે કમલનાથ રાજ્યની કમાન સંભાળે. જો કે, એવી શક્યતાઓ પહેલેથી જ વ્યક્ત કરવામાં આવી રહી હતી કે 77 વર્ષીય નેતા ટૂંક સમયમાં રાજીનામું આપી શકે છે.'

સૂત્રોના જણાવ્યા પ્રમાણે ખડગેએ તેમને સામેથી રાજીનામું આપવા કહ્યું છે. પાર્ટીના એક નેતાએ જણાવ્યું હતું કે, "તે હવે રાજીનામું આપે છે કે કેમ તે જોવાનું બાકી છે કે તેમાં થોડો સમય લાગશે. પરંતુ હાઈકમાન્ડે સ્પષ્ટ કર્યું છે કે તેમણે પદ છોડવું પડશે.'' ખાસ વાત એ છે કે કોંગ્રેસનું એક દાયકામાં આ સૌથી ખરાબ પ્રદર્શન છે. પાર્ટી 230માંથી માત્ર 66 સીટો જીતી શકી.

જો કે, કમલનાથ હજુ પણ ચૂંટાયેલા ધારાસભ્યો સાથે પાર્ટી નેતૃત્વ પર દબાણ લાવવાનો પ્રયાસ કરી રહ્યા છે, પરંતુ આ વખતે પાર્ટી તેમની વાત સાંભળવા તૈયાર નથી. પાર્ટીના એક વરિષ્ઠ નેતાએ કહ્યું કે પાર્ટી મધ્યપ્રદેશમાં નવા નેતૃત્વને મેદાનમાં ઉતારશે. તેવી જ રીતે રાજસ્થાનમાં પણ કોંગ્રેસ વિપક્ષના નેતા અને પ્રદેશ અધ્યક્ષ સાથે સંપૂર્ણપણે નવું નેતૃત્વ તૈયાર કરશે. આ વખતે પાર્ટી સ્પષ્ટપણે સચિન પાયલટને મોટી જવાબદારી આપવાના પક્ષમાં છે અને 2028ની ચૂંટણી માટે અત્યારથી જ સંદેશ આપવા માંગે છે.

મહત્વનું છે કે 9 ડિસેમ્બરે રાજસ્થાનના મુદ્દે પાર્ટીની બેઠક પણ યોજાવાની છે. જેમાં પાર્ટીના તમામ વરિષ્ઠ નેતાઓ ભાગ લેશે. હારના કારણોની પણ સમીક્ષા કરવામાં આવશે. બીજી તરફ, છત્તીસગઢમાં પાર્ટી તરત જ મોટા ફેરફારો કરવાના મૂડમાં છે. હારની સમીક્ષા માટે ટૂંક સમયમાં બેઠક યોજાશે. સૂત્રોના જણાવ્યા અનુસાર, કોંગ્રેસ હવેથી સામાન્ય ચૂંટણીની તૈયારી કરવા માંગે છે અને આ વખતે ત્રણેય રાજ્યોમાં મોટા નામોને મેદાનમાં ઉતારશે. તેલંગાણામાં જીત બાદ પાર્ટી પડોશી રાજ્યોમાં પોતાની જીતનો ફાયદો ઉઠાવવા માંગે છે. પાર્ટીને લાગે છે કે આ જીતનો ફાયદો આંધ્રપ્રદેશ અને ઓડિશામાં મળી શકે છે. હવે પાર્ટી આગામી થોડા દિવસોમાં બંને રાજ્યોમાં આક્રમક રીતે આગળ વધી શકે છે.