આતંકી / ચોંકાવનારો ખુલાસો : જમ્મુ-કાશ્મીરની જેલમાં પણ ચાલતું હતું આતંકીઓનું રાજ

ખતરનાક આતંકી સંગઠન લશ્કર-એ-તોઈબાના આતંકવાદી નવીદ જટ ગયા વર્ષે ફેબ્રુઆરી મહિનામાં જેલમાંથી નાસી છૂટ્યો ત્યારબાદ જમ્મુ-કાશ્મીરના પોલીસવડા દિલબાગસિંહની આગેવાનીમાં જેલ વિભાગે શ્રીનગર સેન્ટ્રલ જેલમાંથી કટ્ટર આતંકવાદીઓને અન્ય જેલોમાં મોકલવા ઉપરાંત જેલોને આતંકી ગતિવિધિ મુક્ત બનાવવા માટે અનેક કડક પગલાં ભર્યા હતા.

તાજેતરમાં જ જેલોના ડીજી તરીકે સેવામુક્ત થયેલા દિલબાગસિંહે જણાવ્યું કે, જમ્મુ-કાશ્મીરની તમામ જેલોનું સંપૂર્ણ અને વિસ્તૃત વિશ્લેષણ કરવામાં આવ્યું હતું. અમે આતંકીઓને સ્પષ્ટ સંદેશ આપ્યો કે, જેલની અંદર આતંકવાદીઓના નિયંત્રણ અને શાસનને ખતમ કરવામાં આવશે અને હવે જેલમાં કાયદાનું જ રાજ ચાલશે.

જમ્મુ-કાશ્મીર પોલીસે સુરક્ષા એજન્સીઓની મદદ લઈને જેલમાં ખાસ પ્રકારના નિયમો લાગુ પાડ્યા છે. હવે આતંકવાદીઓ અને અલગતાવાદીઓને પહેલી વખત જેલમાં આવેલા અને જેમનામાં સુધારાની શક્યતા હોય તેવા લોકોથી દૂર જ રાખવામાં આવે છે.

પોલીસ છેલ્લા ઘણા સમયથી રાજ્યની વિવિધ જેલમાં દરોડા પાડીને આતંકીઓને મળતી મદદ ખતમ કરવામાં સફળ રહી છે. કટ્ટર આતંકીઓને અલગ તારવીને તેમને જમ્મુ અને ઉધમપુર સ્થિત અન્ય જેલોમાં મોકલી દેવામાં આવ્યા છે.

શ્રીનગર સેન્ટ્રલ જેલને આતંકીઓએ તેમનો સલામત અડ્ડો બનાવી દીધો હતો અને જેને દિલબાગસિંહે નષ્ટ કરી દીધો છે. આ જેલમાંથી જ આતંકીઓ તેમના આકાઓ અને સ્લીપર સેલ સાથે પણ નિયમિત સંપર્કમાં રહેતા હોવાનો ખુલાસો થયો છે.

આતંકીઓ જેલની દરથી જ 'શૂરા-એ-ઝિંદાન' (Shuara-e-Zindan) નું સંચાલન કરતા હતા. જેલમાં નવા આવેલા લોકોને પોતાના પ્રભાવમાં લઈને તેઓ ભવિષ્યના હુમલા માટે તેમને તૈયાર કરતા હતા.

આતંકવાદીઓને મળતી હતી વીઆઈપી સુવિધાઓ!

'શૂરા-એ-ઝિંદાન' કેદીઓને કટ્ટરવાદ અને આતંકના ક્ષેત્રમાં તેમના અનુભવના આધારે સુવિધાઓ પૂરી પાડતું હતું. જેમાં તેમની પસંદગીનું ભોજન અને અન્ય વીઆઈપી સુવિધાઓનો સમાવેશ થાય છે. આજીવન કેદની સજા કાપી રહેલો આશિક હુસૈન ફકટુ આ જૂથનો સુપ્રીમ કમાન્ડર હતો. જેલ પરિસરની અંદર સંચાલિત તમામ ખાનગી રસોડા પણ હવે બંધ કરી દેવામાં આવ્યા છે અને તમામ કેદીઓને સરકારી રસોડે લાઈનમાં ઉભા રાખીને ભોજન પીરસવામાં આવે છે.