ગુજરાતમાંથી ડ્રગ્સની બદીને દૂર કરવા પોલીસ અને એજન્સીઓ દ્વારા એક વર્ષમાં 300 ડ્રગ્સ પેડલર્સને દબોચી લઈ કાયદાના પાઠ ભણાવાયા છે.
Share
ડ્રગ્સ પેડલર્સ વિરૂદ્ધ પોલીસની લાલ આંખ
300 આરોપીઓને ઝડપી લેતી ક્રાઇમ બ્રાન્ચ
છેલ્લા 1 વર્ષમાં 300 પેડલર્સ વિરૂદ્ધ કાર્યવાહી
ગુજરાતને મળેલ સૌથી લાંબા દરિયા કિનારાની ભેટ આવારા તત્વો માટે આશીર્વાદરૂપ બની હોય તેવું લાગી રહ્યું છે. ગુજરાત, સૌરાષ્ટ્રનો દરિયા કિનારો ડ્રગ્સ, હેરોઇન, ગાંજા, ચરસ અને હથિયાર તસ્કરીનું એપી સેન્ટર ગણી શકાય છે. ત્યારે ગુજરાતના યુવા ધનને નશાના રવાડે ચડાવતા ડ્રગ્સના દૂષણને અટકાવા પોલીસ અને સુરક્ષા એજન્સીઓએ કડક વલણ અપનાવ્યું છે. પોલીસે છેલ્લા 1 વર્ષમાં 300 ડ્રગ્સના પેડલર્સ વિરૂદ્ધ આકરી કાર્યવાહી કરી હોવાનું સામે આવ્યું છે. યુવાનોને ડ્રગ્સની લત લગાવવા પેડલર્સ પ્રથમ ફ્રી માં જથ્થો પહોંચાડતા હોવા સહિતના અનેક ચોકાવનારા ખુલાસા પણ થયા છે.
એક વર્ષમાં 300 જેટલા આરોપીઓને ઝડપ્યા
ગુજરાતમાં ડ્રગ્સના દૂષણનો સફાયો બોલાવવા હવે પોલીસ અને સુરક્ષા એજન્સીઓ રીતસર જંગે ચડી છે. અત્યાર સુધી ડ્રગ્સ પેડલરો સામે કાર્યવાહીનું પ્રમાણ નહિવત પ્રમાણમાં જોવા મળતું હતું. જો કે હવે ક્રાઇમ બ્રાન્ચ સહિતની એજન્સીઓએ આવા ડ્રગ્સ પેડલરો સામે સખ્ત કાર્યવાહી શરૂ કરી છે. અને માત્ર એક જ વર્ષમાં 300 જેટલા આરોપીને જેલ હવાલે કર્યા છે. છેલ્લા કેટલાક સમયમાં દરિયાઈ વિસ્તારમાંથી મોટા પ્રમાણમાં ડ્રગ્સનો જથ્થો ઝડપ્યા બાદ હવે પોલીસે ડ્રગ્સ પેડલરો સામે પણ લાલ આંખ કરી છે. આ કાર્યવાહીમાં સામે આવ્યુ છે કે, ઝડપાયેલા ડ્રગ્સ પેડલરો પણ પોતે ડ્રગ્સના બંધાણી હોય છે. જેઓ યુવાધનને ડ્રગ્સના બંધાણી બનાવવા તેઓ પ્રથમ બે ત્રણ વાર ફ્રીમાં ડ્રગ્સ આપતાં હોય છે પરંતુ બાદમાં યુવક કે યુવતીઓ બંધાણી બની જાય ત્યારે તેઓની પાસેથી પૈસા વસુલી તગડી કમાણી રોળતા હોવાનું પણ સામે આવ્યું છે.
નશાના રવાડે ચડેલ યુવાઓને ડ્રગ્સની લતમાંથી ઉગારવા પોલીસના પ્રયાસો
મહત્વનું છે કે નશાના રવાડે ચડી ગયેલ યુવક-યુવતીઓને ડ્રગ્સની લતમાંથી ઉગારવા પણ પોલીસ દ્વારા અનેક પ્રયાસો હાથ ધરવામાં આવ્યા છે. સફેદ ઝેરના અઝગરી ભરડામાં સપડાઈ બરબાદીના ખપ્પરમાં હોમાયેલ યુવક કે યુવતી રીહેબિલિટેશન સેન્ટરમાં જઈ ડ્રગ્સની લત છોડાવવા માગે છે પરંતુ પોલીસના ડરથી જતાં નથી. તેઓ વિરૂદ્ધ પોલીસ કોઈ પણ પ્રકારની કાર્યવાહી નહી કરે તેવી બાહેંધરી આપવા સહિતના આવકારદાયક પગલા પોલીસ દ્વારા લેવામાં આવી રહ્યા છે.
