- મહેસાણામાં નકલી ડિગ્રી પર નોકરી કરતા 11 હેલ્થવર્કર ઝડપાયા
- 10 વર્ષથી નકલી ડિગ્રી પર નોકરી કરી રહ્યા હતા 11 હેલ્થવર્કર
- રાજ્ય વિકાસ કમિશ્નરની ટીમ દ્વારા તપાસ કરાતાં ખુલાસો
- 11 હેલ્થવર્કર્સને DDOએ નોટિસ પાઠવી ખુલાસો આપવા આદેશ કર્યો
- તમામ 11 હેલ્થવર્કર્સને નોકરીમાંથી છૂટા કરવામાં આવશે
Mehsana Fake Health Workers : મહેસાણામાં હવે નકલી ડિગ્રી કૌભાંડ સામે આવ્યું છે. વાત જાણે એમ છે કે, અહીં છેલ્લા 10 વર્ષથી 11 હેલ્થ વર્કર ખોટી ડિગ્રી પર નોકરી કરતાં હોવાનું સામે આવ્યું છે. માર્ચ 2023માં શરૂ કરવામાં આવેલ તપાસમાં આ કૌભાંડ સામે આવતા ખળભળાટ મચી ગયો છે. પ્રાથમિક વિગતો મુજબ આ લોકોએ અન્ય રાજ્યોની યુનિવર્સિટીના નામથી નકલી ડિગ્રી મેળવી નોકરી મેળવી હતી. આ તરફ જિલ્લા વિકાસ અધિકારીએ તમામને નોટિસ આપી ખુલાસ માંગ્યો છે. આ સાથે હવે આ તમામ 11 હેલ્થ વર્કરને નોકરીમાંથી છૂટા કરવામાં આવશે.
ઉત્તર ગુજરાતના મહેસાણા જિલ્લામાં એક મસમોટું અને ચોંકાવી દે તેવું કૌભાંડ સામે આવ્યું છે. મહેસાણા જિલ્લામાં ખોટી ડિગ્રી પર નોકરી કરતા હેલ્થ વર્કર ઝડપાયા છે. આ ઇસમો 10 વર્ષથી નકલી ડિગ્રી પર નોકરી કરતા હોવાનું સામે આવ્યું છે. જેને લઈ હવે તમામ 11 હેલ્થ વર્કરને નોકરીમાંથી છૂટા કરાશે. મહત્વનું છે કે, રાજ્ય વિકાસ કમિશ્નરની ટીમ દ્વારા તપાસ કરતા ખુલાસો થયો છે.
DDOએ નોટિસ ફટકારી 15 દિવસમાં ખુલાસો માંગ્યો
આ તરફ આ ઘટનાને લઈ હવે મહેસાણા જિલ્લા વિકાસ અધિકારી એક્શન મોડમાં આવ્યા છે. જિલ્લા વિકાસ અધિકારીએ 11 હેલ્થ વર્કરને નોટિસ આપી છે. DDOએ હેલ્થ વર્કરોને નોટીસ આપી કેમ છૂટા ન કરવા 15 દિવસમાં ખુલાસો માંગ્યો છે.
વિગતો મુજબ આ ઇસમો તમિલનાડુ, અરુણાચલ પ્રદેશ અને મણિપુર સહીતની યુનિવર્સિટીની ડિગ્રી પર નોકરી લીધી હતી. આ તરફ આ 11 લોકો વર્ષ 2011-12 માં હેલ્થ વર્કર તરીકે નોકરી લાગ્યા હતા. હાલ આ 11 હેલ્થ વર્કર ખેરાલુ, વિજાપુર, વડનગર, ઉંઝા, બહુચરાજી, કડી અને સતલાસણામાં નોકરી કરી રહ્યા છે.
