વીડિયો વાયરલ / અમદાવાદમાં જાણે દેશી દારૂની બજાર હોય તેમ ખુલ્લેઆમ બેરોકટોક દેશી પોટલીઓનું વેચાણ, 'પોલીસ પણ પડખે'!

• રાજ્યમાં દારૂબંધીના ઉડ્યા લીરેલીરા
• ખુલ્લેઆમ દારૂ મળતા હોવાના વીડિયો વાયરલ
• અમદાવાદમાં ટ્રાફિક ચોકી નજીક જ દારૂનો અડ્ડો
• રાજકોટમાં સોશિયલ મીડિયામાં દારૂના એડ્રેસની મુકી પોસ્ટ

આમ તો ગુજરાતમાં દારૂબંધી છે. પરંતુ આ કહેવાતી દારૂબંધીની વચ્ચે ગુજરાતમાં બેફામ દારૂ વેચાઈ રહ્યો છે. રાજ્યમાંથી અવારનવાર દારૂ ઝડપાવાની ઘટનાઓ પણ સામે આવતી રહે છે. ત્યારે અમદાવાદના કાલુપુરમાં ખુલ્લેઆમ દેશી દારૂની હાટડી ધમધમી રહી છે. કાલુપુર સર્કલ નજીક ટ્રાફિક ચોકીની નજીક રસ્તા પર ખુલ્લેઆમ દેશી દારૂ વેચાઈ રહ્યો છે.  ખુલ્લેઆમ દારૂનું વેચાણ કરતા બુટલેગરોને પોલીસનો કોઈ જ ડર ન હોય તેવું લાગી રહ્યું છે.

બુટલેગરો પર કાર્યવાહી શા માટે થતી નથી

ખુલ્લે આમ વેચાતા દેશી દારૂને લઈ પોલીસની કામગીરી પર સવાલો ઉઠી રહ્યાં છે. રસ્તા પર ખૂલ્લેઆમ દારૂનું વેચાણ કરતા બુટલેગરો પર કાર્યવાહી શા માટે નથી થતી. શું પોલીસને આ વાતની જાણ નથી? કે પછી પોલીસની રહેમ નજર હેઠળ હપ્તા આપી બુટલેગરો પોતાનો દારૂનો વેપલો કરી રહ્યાં છે? ત્યારે અમદાવાદ પોલીસ દારૂબંધીનું કડક પાલન કરાવવામાં નિષ્ફળ સાબિત થઈ રહી છે. આ બધાની વચ્ચે હવે પોલીસ ક્યારે જાગશે અને ક્યારે દારૂની હાટડીઓ સામે કાર્યવાહી કરશે તે જોવું રહ્યું.

પોલીસની કામગીરી પર સવાલ ઉઠી રહ્યા છે

રાજકોટમાં દારૂના અડ્ડાનું એડ્રેસ બતાવતો યુવકનો વીડિયો વાયરલ થયો હતો. યુવકે દારૂના એડ્રેસની પોસ્ટ મુકી હતી. રાજકોટમાં ક્યાં દારૂ મળે છે તેનું લોકેશન બતાવતો વીડિયો ડી. કે ઓડેદરા નામના  ID પર યુવકે મુક્યો હતો. ખુલ્લે આમ દારૂ વેચાતો હોવાના વીડિયો વાયરલ થતા પોલીસની કામગીરી પર સવાલ ઉઠી રહ્યા છે.