- જમ્મૂ-કાશ્મીરની સુરક્ષાને લઈને ગૃહમંત્રી શાહે કરી બેઠક
- સુરક્ષા અધિકારીઓએ J&Kની હાલની સ્થિતિ અંગે કરી સમીક્ષા
- LoC અને માઈનોરિટીની સ્થિતિ અંગે કરવામાં આવી ચર્ચા
દિલ્હી: કેન્દ્રીય ગૃહમંત્રી અમિત શાહે ગુરુવારે જમ્મૂ-કાશ્મીરની સુરક્ષાને લઈને ગૃહમંત્રાલયમાં એક ઉચ્ચ સ્તરીય સમીક્ષા બેઠક કરી. આ બેઠકમાં રાષ્ટ્રીય સુરક્ષા સલાહકાર NSA અજીત ડોભાલ, જમ્મૂ-કાશ્મીરનાં LG મનોજ સિન્હા, ગૃહ સચિવ અજય ભલ્લા, DGP જમ્મૂ-કાશ્મીર દિલબાગસિંહ અને MHA તેમજ કેન્દ્રીય સશસ્ત્ર પોલીસ બળનાં અન્ય વરિષ્ઠ અધિકારીઓએ હાજરી આપી હતી.
બેઠકમાં શું ચર્ચા થઈ?
કેન્દ્ર સરકાર અને કેન્દ્રશાસિત પ્રદેશ પ્રશાસનનાં સુરક્ષા અધિકારીઓએ જમ્મૂ-કાશ્મીરની હાલની કાયદા અને વ્યવસ્થાની સ્થિતિ અંગેનું એક પ્રેઝેંટેશન ગૃહમંત્રી અમિત શાહની સમક્ષ રજૂ કર્યું હતું. સૂત્રો અનુસાર મીટિંગમાં નિયંત્રણ રેખા LOC અને આંતરરાષ્ટ્રીય સીમાની નજીક આવેલા ક્ષેત્રોમાં સ્થિતિ, ઘુસણખોરીનાં પ્રયાસો અને માઈનોરિટી સમુદાયોનાં સદસ્યોને ટાર્ગેટ બનાવવાનાં પ્રયત્નો જેવા વિષયો પર ચર્ચા કરવામાં આવી .
જમ્મૂ-કાશ્મીરમાં આતંકવાદની સંપૂર્ણ નાબૂદી નજીક...
DGPએ 6 એપ્રિલનાં કહ્યું હતું કે જમ્મૂ-કાશ્મીરમાંથી આતંકવાદ હજુ નાશ પામ્યો નથી પરંતુ આતંકવાદીઓની સંખ્યા ન્યૂનતમ થવાને લીધે આતંકવાદ પણ નાશ પામવાની નજીક છે. તેમણે કહ્યું કે સ્થાનીય યુવાનો કે જેમને આતંકવાદ તરફ ધકેલી દેવામાં આવ્યું હતું હવે તેઓ આ માર્ગ છોડીને પાછા આવી ગયાં છે.
116 અલ્પસંખ્યકોનું થયું મૃત્યુ
સરકારે સંસદને જણાવ્યું કે બંધારણમાંથી જમ્મૂ-કાશ્મીર પર લાગેલી 370ની કલમ દૂર કર્યાં બાદ ઓગસ્ટ 2019થી જૂલાઈ 2022 સુધી કેન્દ્રશાસિત પ્રદેશમાં પાંચ કાશ્મીરી પંડિતો અને 16 અન્ય હિંદુ તેમજ શીખો સહિત 118 સામાન્ય નાગરિકોનું મૃત્યુ થયું છે.
